The Phnom Penh Post Search

Search form




Logo of Phnom Penh Post newspaper Phnom Penh Post - បក្ស​កាន់​អំណាច​ ហៅ​ការវាយប្រហារ​​លើ​ការបោះឆ្នោត ​គឺជា​ការឈ្នានីស

បក្ស​កាន់​អំណាច​ ហៅ​ការវាយប្រហារ​​លើ​ការបោះឆ្នោត ​គឺជា​ការឈ្នានីស

Content image - Phnom Penh Post
ក្បួន​យុទ្ធនាការ​ឃោសនា​បោះឆ្នោត​របស់ CPP​។ ហេង ជីវ័ន

បក្ស​កាន់​អំណាច​ ហៅ​ការវាយប្រហារ​​លើ​ការបោះឆ្នោត ​គឺជា​ការឈ្នានីស

ភ្នំពេញៈ ប្រតិកម្ម​ខ្លាំងៗ​តប​នឹង​ការលើក​ឡើង​ពី​ក្រុម​អង្គការ​អន្តរជាតិ​ដែល​ថា ការរៀបចំ​ការបោះឆ្នោត​នៅ​កម្ពុជា​នា​ប៉ុន្មាន​ថ្ងៃ​ខាង​មុខ​ទៀត​នេះ​ប្រៀប​ដូចជា​ការបោះឆ្នោត​បែប​ឆាកល្ខោន​បន្លំ​ភ្នែក​នោះ គណបក្ស​កាន់អំណាច​ហៅ​ការចោទប្រកាន់​បែប​នេះ​ថា​ជា​ការ​វាយប្រហារ​តាម​បែប​ឈ្នានីស និង​លម្អៀង​ទៅ​រក​អតីត​គណបក្ស​ប្រឆាំង​។

អ្នក​នាំពាក្យ​គណបក្ស​ប្រជាជន​កម្ពុជា​ដែល​ជា​បក្ស​កាន់អំណាច​លោក​ សុខ ឥសាន ថ្លែង​ធ្ងន់ៗ​ថា​ជនបរទេស​យក​ចិត្ត​ទុកដាក់​ឈ្នានីស​នៅក្នុង​សភាពការណ៍​កម្ពុជា​ដែល​កំពុង​ឆ្ពោះ​ទៅ​រក​ការលើក​កម្ពស់​លទ្ធិប្រជាធិបតេយ្យ​នៅ​កម្ពុជា​។ លោក​បញ្ជាក់​ថា​៖ «​គ្មាន​ជនបរទេស​ណា​មាន​សិទ្ធិ​ដ៏តិចតួច​ឡើយ​ក្នុង​ការ​លូកដៃ​ចូល​កិច្ចការ​ផ្ទៃក្នុង​កម្ពុជា​។ ការ​វាយតម្លៃ​ប្រកប​ដោយ​អវិជ្ជមាន​ស្តីអំពី​សភាពការណ៍​បោះឆ្នោត​នៅ​កម្ពុជា វា​គ្រាន់​តែ​ឆ្លុះបញ្ចាំង​ឲ្យ​ឃើញ​ថា​ជនបរទេស​នោះ​លូកដៃ​ជ្រៀតជ្រែក​កិច្ចការ​ផ្ទៃក្នុង​កម្ពុជា​ផ្ទុយ​អំពី​ធម្មនុញ្ញ​អង្គការ​សហប្រជាជាតិ​ក៏​ដូច​ធម្មនុញ្ញ​អាស៊ាន​»​។

លោក​ ឥសាន ថា​៖ «​អ៊ីចឹង​ខ្ញុំ​យល់​ថា​វា​សបញ្ជាក់​ឲ្យ​ឃើញ​ថា ជនបរទេស​ទាំងអស់​នោះ​ជា​អ្នក​ឃុបឃិត​ជាមួយ​នឹង​អតីត​បក្សប្រឆាំង​ដែល​ក្បត់ជាតិ ដែល​យក​ផែនការ​បរទេស​មក​អនុវត្ត​ចង់​ផ្តួលរំលំ​រាជរដ្ឋាភិបាល​ស្រប​ច្បាប់​នៅ​កម្ពុជា​»​។

លោក​ ឥសាន បាន​អះអាង​ថា ការបោះឆ្នោត​គឺ​រៀបចំ​ឡើង​ស្រប​ទៅ​តាម​ការចង់​បាន​របស់​ពលរដ្ឋ ដែល​ចង់​បាន​ការបោះឆ្នោត​មួយ​ប្រកប​ដោយ​ប្រជាធិបតេយ្យ សេរី និង​ត្រឹមត្រូវ​។

លោក​បញ្ជាក់​ថា​៖«​ហើយ​ការដែល​ទទួល​ស្គាល់​ពី​បរទេស ឬ​មិន​ទទួល​ស្គាល់ អត់​មាន​សំខាន់​ទេ វា​សំខាន់​ទៅ​លើ​ប្រជាពលរដ្ឋ​កម្ពុជា​ដែល​ជា​អ្នក​ទទួល​ស្គាល់​។ ពីព្រោះ​អាហ្នឹង​វា​ផ្សារភ្ជាប់​នឹង​សភាពការណ៍​ពិត​នៅ​កម្ពុជា មិនមែន​ផ្អែក​ទៅ​លើ​ពួក​បរទេស​ហ្នឹង​ឲ្យ​ពិន្ទុ ហើយ​ថា​ធ្វើ​បាន​មិន​បាន​នោះ​ទេ​»​។

លោក​ សាម អ៊ីន អ្នក​នាំពាក្យ​គណបក្ស​ប្រជាធិបតេយ្យ​មូលដ្ឋាន​ (GDP) ដែល​ចូលរួម​ប្រកួត​ក្នុង​ការ​បោះឆ្នោត​ខាង​មុខ​បាន​ថ្លែង​ថា​៖ «​ការលើកឡើង​ពី​ក្តីបារម្ភ​របស់​ពួកគាត់ យើង​យល់ ប៉ុន្តែ​ខ្ញុំ​គ្រាន់​តែ​ចង់​បញ្ជាក់​ថា​រឿង​សំខាន់​ជា​រឿង​ប្រយុទ្ធ និង​ការតស៊ូ​របស់​ប្រពលរដ្ឋ​ខ្មែរ និង​អ្នក​ដឹកនាំ​ខ្មែរ​នៅ​ក្នុង​ស្រុក​។ យើង​ត្រូវ​ប្រឹងប្រែង​បន្ត​ដំណើរ​ទៅ​មុខ​ទៀត​។ គេ​ជួយ​យើង​វា​ទាល់​តែ​យើង​ប្រឹង​ខ្លួនឯង​សិន ហើយ​បើ​យើង​នាំគ្នា​ចាកចេញ​ពី​ប្រទេស​ចោល​ប្រជាពលរដ្ឋ​ហើយ​យើង​សង្ឃឹម​ឲ្យ​គេ​ជួយ​ប្រជាធិបតេយ្យ​អត់​អាច​កើតឡើង​តាមរយៈ​បែប​នេះ​ទេ​»​។

ក្នុង​សន្និសីទ​សារព័ត៌មាន​មួយ​កាលពី​ថ្ងៃទី​ ២៤ ខែ​កក្កដា​នៅ​ទីក្រុង​បាងកក ប្រទេស​ថៃ​ដែល​រៀបចំ​ឡើង​ដោយ​ក្រុម​សមាជិក​សភា​អាស៊ាន ដើម្បី​សិទ្ធិ​មនុស្ស (APHR) ដោយ​មាន​ស្ថាប័ន​អន្តរជាតិ​ចំនួន ៤ ចូលរួម​គឺ​អង្គការ​ឃ្លាំមើល​សិទ្ធិ​មនុស្ស​អន្តរជាតិ​ (Human Rights Watch) វិទ្យាស្ថាន​ជាតិ​ប្រជាធិបតេយ្យ​ (NDI) បណ្តាញ​អាស៊ី ដើម្បី​ការបោះឆ្នោត​ដោយ​សេរី​ (ANFREL) និង​មន្ត្រី​នៃ​ក្រុមប្រឹក្សា​អ្នក​ច្បាប់​នៃ​ (ICJ) គឺ​ពួកគេ​បាន​ចាត់ទុក​ការរៀបចំ​ការបោះឆ្នោត​នា​ថ្ងៃទី​ ២៩ ខែ​កក្កដា​នេះ​គ្រាន់​តែ​ជា​ឆាកល្ខោន ដោយ​ចាត់​ទុក​ថា​ការបោះឆ្នោត​នោះ​មិនមាន​ភាព​យុត្តិធម៌ សេរី និង​ត្រឹមត្រូវ ស្រប​តាម​ដំណើរការ​ប្រជាធិបតេយ្យ​នោះ​ឡើយ ក្រោយ​ពី​អតីត​គណបក្ស​សង្គ្រោះ​ជាតិ​ដែល​ជា​បក្ស​ប្រឆាំង​ត្រូវ​បាន​ផាត់​ចេញ​ពី​សង្វៀន​ប្រកួត​៕

អត្ថបទគួរចាប់អារម្មណ៍

  • ភ្នំពេញៈ អង្គការ​មូលនិធិ​សកល​សម្រាប់​ធម្មជាតិ​ (WWF) និង​រដ្ឋបាល​ជលផល​ដែល​បាន​រកឃើញថា ត្រី​គល់រាំង ត្រី​ត្រសក់​ក្រហម ត្រី​ខ្លា ត្រី​ក្របី ត្រី​ត្រចៀកដំរី និង​បបែល​យក្ស​ទឹកសាប កំពុង​ត្រូវ​បាន​គេ​ដាក់លក់​នៅ​តាម​ទីផ្សារ​ត្រី​នានា ហើយ​ខ្លះ​បាន​នាំ​ចេញ​ទៅ​ក្រៅ​ប្រទេស​បាន​ទាមទារ​ឲ្យ​មាន​ការរឹតបន្តឹង​ច្បាប់​ឱ្យ​បាន​ម៉ឺងម៉ាត់​ជាង​ពេលណាៗ​ទាំងអស់ ដើម្បី​ការពារ​ត្រី​ជិត​ផុត​ពូជ​ទាំងនោះ​។

  • ភ្នំពេញៈ កំពង់ផែ​ស្វយ័ត​ក្រុងភ្នំពេញ (PPAP) ដែល​ចុះបញ្ជី​នៅ​ផ្សារ​មូលបត្រ​កម្ពុជា (CSX) បាន​រាយការណ៍​អំពី​ភាពប្រសើរ​ឡើង​នៃ​ប្រតិបត្តិការ​អាជីវកម្ម​របស់ខ្លួន​ក្នុង​ឆមាស​ទី​ ១ ឆ្នាំ​នេះ ទោះបី​ជំងឺ​កូវីដ​ ១៩ បាន​ធ្វើឲ្យ​ប៉ះពាល់​យ៉ាងខ្លាំង​ដល់​សេដ្ឋកិច្ច​នៅក្នុង​តំបន់ និង​ពិភពលោក​ក៏ដោយ​។

  • ភ្នំពេញៈ តុលាការ​កំពូល​កាលពី​ម្សិលមិញ​បាន​បើក​សវនាការ​ជម្រះក្ដី​កំបាំងមុខ​លើ​សំណុំរឿង​សុំ​នៅក្រៅ​ឃុំ​របស់​ជន​ត្រូវ​ចោទ​​ ១០ ​នាក់ ​ដែលជា​សមាជិក​អតីត​គណបក្ស​សង្គ្រោះជាតិ​ដែល​បាន​ជាប់ចោទ​ពី​បទ​រួមគំនិត​ក្បត់ និង​ញុះញង់​ឲ្យ​​ប្រព្រឹត្ត​បទឧក្រិដ្ឋ​ជាអាទិ៍​កាលពី​ចុង​ឆ្នាំ​ ២០១៩ ខណៈ​ដែល​ពួកគេ​កំពុង​នៅ​ក្រៅ​ឃុំ​។

  • ភ្នំពេញ: ក្រសួង​វប្បធម៌ និង​វិចិត្រសិល្បៈ​ពី​ម្សិលមិញ​បាន​កោះហៅ​ម្ចាស់​ផលិតកម្ម​មរតក​មេឌៀ​ (Morodok Media) ​ឲ្យ​ចូល​បំភ្លឺ​ជុំវិញ​ការផលិត​វីដេអូ​ចម្រៀង​មាន​ខ្លឹមសារ​ប្រមាថ​ពលរដ្ឋ​ខេត្តព្រៃវែង​តាម​ការស្នើសុំ​របស់​លោក ជា សុមេធី អភិបាលខេត្ត​ព្រៃវែង ប៉ុន្ដែ​អ្នកគ្រប់គ្រង​ផលិតកម្ម​នេះ​ថា វីដេអូ​នោះ​គ្រាន់តែ​ចង់​អប់រំ​កុំឲ្យ​រើសអើង​អ្នក​ព្រៃវែង​ប៉ុណ្ណោះ​។

  • ព្រះសីហនុៈ អភិបាល​ខេត្ត​ព្រះសីហនុ លោក គួច ចំរើន បាន​ព្រមាន​ចាត់វិធានការ​តឹងរ៉ឹង​ទៅ​តាម​ផ្លូវច្បាប់​ដោយ​គ្មាន​ការលើកលែង​ទៅលើ​ជន​ប្រព្រឹត្ត​បទល្មើស​កាប់បំផ្លាញ​ព្រៃ​កោងកាង​ដើម្បី​ទន្ទ្រាន​យក​ដី​រដ្ឋ​ធ្វើ​ជា​កម្មសិទ្ធិ​ឯកជន​ខុសច្បាប់​។

  • ត្បូងឃ្មុំ: អ្នកកាប់ជ្រូក​លក់​ចំនួន​ ៧៤ ​គ្រួសារ​នៅ​ផ្សារសួង ខេត្ត​ត្បូងឃ្មុំ​បាន​កំពុង​ទាមទារ​ដល់​អាជ្ញាធរខេត្ត​បញ្ឈប់​ការយក​ពន្ធ​លើ​អាជីវកម្ម​របស់​ពួកគេ​ច្រើន​ហួសហេតុ និង​ផ្ទុយ​ពី​​សេចក្ដី​ណែនាំ​របស់​ក្រសួង​សេដ្ឋកិច្ច និង​ហិរញ្ញវត្ថុ ប៉ុន្តែ​អាជ្ញាធរ​បាន​អះអាង​លើ​ហេតុផល​ផ្សេង​ក្នុង​ការប្រមូល​ពន្ធ​នេះ​។