.jpg)
ភ្នំពេញៈ លោក សុខសុវណ្ណ វឌ្ឍនាសាប៊ុង សមាជិកក្រុមប្រឹក្សាពិគ្រោះ និងផ្ដល់យោបល់កាលពីថ្ងៃចន្ទបានដាក់របាយការណ៍ជូនលោកនាយករដ្ឋមន្ត្រី ហ៊ុន សែន ករណីភាពមិនប្រក្រតីក្នុងដំណើរការប្រឡងសិស្សចៅក្រមជំនាន់ទី ១០ ហើយក៏គ្រោងកោះហៅរដ្ឋមន្ត្រីក្រសួងយុត្តិធម៌មកបំភ្លឺជុំវិញបញ្ហានេះផងដែរ។
លោក វឌ្ឍនាសាប៊ុង បានថ្លែងប្រាប់ភ្នំពេញប៉ុស្តិ៍កាលពីថ្ងៃចន្ទថាកាលពីដើមខែមករា បេក្ខជនប្រឡងចៅក្រមចំនួន ៣ រូបតំណាងឲ្យ ៥ រូបបានដាក់ពាក្យប្ដឹងមកកាន់លោកចំពោះភាពមិនប្រក្រតីលើនីតិវិធីនៃការប្រឡងសិស្សចៅក្រមជំនាន់ទី ១០ ដែលរៀបចំដោយក្រសួងយុត្តិធម៌ និងរាជបណ្ឌិត្យសភាវិជ្ជាជីវៈតុលាការដែលប្រព្រឹត្តទៅកាលពីខែវិច្ឆិកាឆ្នាំមុន។
លោកបន្តថា ក្រោយពីបើកការស៊ើបអង្កេតជុំវិញបញ្ហានេះលោកបានដាក់របាយការណ៍ទៅលោក ហ៊ុន សែន ដើម្បីពិនិត្យជុំវិញការរកឃើញទាំងនេះ។
លោកបញ្ជាក់ថា៖ «ពាក់ព័ន្ធនឹងភាពមិនប្រក្រតីពីការអនុវត្តច្បាប់ភាពមិនប្រក្រតីនៃការប្រឡងជ្រើសរើសសិស្សចៅក្រមជំនាន់ ១០ និងភាពមិនប្រក្រតីនៃការប្រឡងផ្ទៃក្នុងនៃការជ្រើសរើសសិស្សចៅក្រមព្រះរាជអាជ្ញា ឆ្នាំ ២០១៩ យើងពិនិត្យឃើញមាន ២ ចំណុច។ ខ្ញុំមិនទាន់អាចបញ្ជាក់បានទេ ចំពោះភាពមិនប្រក្រតីដែលបានស្រាវជ្រាវឃើញ ព្រោះកំពុងស្ថិតក្នុងការស៊ើបអង្កេត ដែលមិនអាចទម្លាយបាននោះទេ ដោយរង់ចាំលោកនាយករដ្ឋមន្ត្រីជាអ្នកពិនិត្យផ្ទាល់»។
ក្រៅពីដាក់របាយការណ៍ទៅលោក ហ៊ុន សែន ប្រធានគណបក្សខ្មែរក្រោករូបនេះបានអះអាងថា លោកក៏នឹងកោះហៅលោក អង្គវង្សវឌ្ឍានា រដ្ឋមន្ត្រីក្រសួងយុត្តិធម៌ដែលមានសមត្ថកិច្ចក្នុងការរៀបចំការប្រឡងមកសាកសួរតាមរយៈឧត្តមក្រុមប្រឹក្សាផងដែរ។
លោកបន្ថែមថា៖ «យើងមើលឃើញថា មិនថាតែនិស្សិតខ្លួនឯងដែលប្រឡងគ្រប់ជំនាន់ទេសូម្បីតែគ្រប់ស្ថាប័នរដ្ឋដែលដឹងរឿង (មិនប្រក្រតី) ហ្នឹង ក៏មិនហ៊ានធ្វើដែរ ព្រោះករណីនេះធ្វើឲ្យប៉ះពាល់ដល់អ្នកមានអំណាចគ្រាក់ៗ។ ប៉ុន្តែស្ថិតក្នុងឋានៈជាឧត្តមក្រុមប្រឹក្សា យើងត្រូវតែធ្វើ បើយើងមិនធ្វើនឹងមិនមានអ្នកណាធ្វើនោះទេ»។
លោក ជិន ម៉ាលីន អ្នកនាំពាក្យក្រសួងយុត្តិធម៌ថ្លែងពីថ្ងៃចន្ទថាការចូលទៅបំភ្លឺចំពោះមុខយន្តការរបស់ឧត្តមក្រុមប្រឹក្សា ជុំវិញបញ្ហាទាំងនេះគឺអាស្រ័យទៅលើការសម្រេចរបស់លោកនាយករដ្ឋមន្ត្រី។
លោកថា៖ «ចំពោះនីតិវិធីនៃការប្រឡងក្រសួងបានធ្វើការពន្យល់បកស្រាយជាច្រើនលើកច្រើនសាហើយ អំពីតម្លាភាពនៃការរៀបចំ។ គ្រប់ដំណើរការនីតិវិធីទាំងអស់ដោយមិនមានការលាក់លៀមអ្វីទេ ដោយមានការចូលរួមពី ACU នៅគ្រប់ដំណាក់កាលទាំងអស់ ទាំងដំណាក់កាលសរសេរ វិញ្ញាសាផ្ទាល់មាត់ និងដំណាក់កាលនៃការកែវិញ្ញាសានីមួយៗ។ ខាង ACU ក៏បានចេញសេចក្តីប្រកាសព័ត៌មានគាំទ្រនូវការរៀបចំរបស់ក្រសួងយុត្តិធម៌អំពីតម្លាភាពនៃការរៀបចំនេះផងដែរ»។
កាលពីថ្ងៃទី ២៣-២៤ ខែវិច្ឆិកា ឆ្នាំ ២០១៩ ក្រុមការងារ ACU ៤៤ រូបបានចូលរួមសង្កេតក្នុងដំណើរការប្រឡងជ្រើសរើសសិស្សចៅក្រមជំនាន់ទី ១០ នៃរាជបណ្ឌិត្យសភាវិជ្ជាជីវៈតុលាការដែលជ្រើសរើសសិស្សចៅក្រមចំនួន ៥០ រូបក្នុងចំណោមបេក្ខជនមានសិទ្ធិប្រឡង ៦៥០ រូប។
ក្រោយប្រកាសលទ្ធផលក៏មានមតិរិះគន់ និងមានការលើកឡើងពីប្រធានបក្សខ្មែរក្រោកថាមានភាពមិនប្រក្រតីក្នុងការប្រឡង។ ប៉ុន្តែភ្លាមៗនោះ អង្គភាពប្រឆាំងអំពើពុករលួយក៏បានបំភ្លឺថា ការជ្រើសរើសសិស្សចៅក្រមជំនាន់ទី ១០ បានប្រព្រឹត្តទៅដោយត្រឹមត្រូវទាំងលក្ខខណ្ឌសមត្ថភាពលក្ខខណ្ឌអាយុ និងទាំងលក្ខខណ្ឌផ្សេងៗទៀតដែលច្បាប់បានកំណត់៕
វីដេអូ៖
