.jpg)
លោក សុខសុវណ្ណ វឌ្ឍនាសាប៊ុង។ រូបថត សហការី
កំពង់ធំៈ លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោកអះអាងថានឹងបញ្ជូនសំណុំរឿងលោកឧត្តមសេនីយ៍ឯក គាំ សារឿន ទៅលោកនាយករដ្ឋមន្ត្រី ហ៊ុន សែន នៅថ្ងៃអង្គារនេះពាក់ព័ន្ធនឹងករណីពលរដ្ឋ ៩ ភូមិ មានជាង ១ ០០០ គ្រួសារ បានប្ដឹងបុគ្គលរូបនេះពីបទរំលោភយកដីនៅអាងទឹកសាធារណៈរបស់រដ្ឋក្នុងតំបន់ ២ តំបន់ ៣ នៅឃុំចំណារលើ ស្រុកស្ទោង។
លោក សុខសុវណ្ណ វឌ្ឍនាសាប៊ុង បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា នេះជាលើកទី ២ ហើយដែលលោកក្នុងនាមសមាជិកឧត្តមក្រុមប្រឹក្សាពិគ្រោះ និងផ្តល់យោបល់បានទទួលពាក្យបណ្តឹងពីពលរដ្ឋមកពី ៩ ភូមិ ដែលមានជាង ១ ០០០ គ្រួសារ បានប្ដឹងលោក សារឿន មានងារជាឧត្តមសេនីយ៍ឯកពាក់ផ្កាយ ៣ បានរំលោភ សជណ របស់រដ្ឋាភិបាលដោយយកដីនៅអាងទឹកសាធារណៈតំបន់ ២ តំបន់ ៣ របស់រដ្ឋមកធ្វើអាជីវកម្ម។
លោក សាប៊ុង បន្ថែមថា ការយកដីរដ្ឋធ្វើអាជីវកម្មនេះ និងថែមទាំងបានជំរិតយកលុយពីពលរដ្ឋជាថ្នូរនឹងការប្រើប្រាស់ទឹកក្នុងអាងនេះ។
លោកបន្តថា ជាមួយនឹងការប្តឹងផ្តល់មិនសុខចិត្តពីពលរដ្ឋនេះលោក សារឿន ក៏បានប្ដឹងទៅតុលាការចាប់តំណាងពលរដ្ឋម្នាក់ដែលជាសមាជិកក្រុមប្រឹក្សាឃុំពីគណបក្សប្រជាជនកម្ពុជាដាក់ពន្ធនាគារផងដែរ បន្ទាប់ពីក្រុមប្រឹក្សាឃុំរូបនោះត្រូវបានពលរដ្ឋជ្រើសរើសជាតំណាងតវ៉ាប្រឆាំងនឹងការបំពានយកដីរដ្ឋទៅធ្វើអាជីវកម្មផ្ទាល់ខ្លួនហើយរហូតដល់ពេលនេះ មិនទាន់ត្រូវបានដោះលែងនោះទេ។
លោកបញ្ជាក់ថា៖ «ករណីនេះ (យើង) កំពុងរៀបចំរបាយការណ៍ បញ្ជូនទៅសម្ដេចតេជោហើយ។ ករណីនេះសមាជិកឧត្តមក្រុមប្រឹក្សាកំពុងសិក្សារកអ្នកពាក់ព័ន្ធអ្នកឃុបឃិតបន្ថែមទៀត ដើម្បីទទួលបានតម្រុយដាក់ជូនប្រមុខរដ្ឋាភិបាលពិនិត្យចាត់វិធានការ»។
លោក គាំ សារឿន មិនអាចទាក់ទងសុំអត្ថាធិប្បាយបានទេកាលពីម្សិលមិញ ដោយសារទូរស័ព្ទលោកពុំមានអ្នកទទួល។
ប៉ុន្តែលោក ផាត់ ថាច អ្នកមើលការខុសត្រូវលើអាងទឹកទាំង ២ នេះដែលតំណាងឲ្យលោក សារឿន បានប្រាប់ភ្នំពេញប៉ុស្តិ៍ថា ការយកលុយពីពលរដ្ឋក្នុង ១ គ្រួសារ ៧៥ ម៉ឺនរៀលក្នុង ១ ឆ្នាំក៏ព្រោះតែលោក សារឿន បានប្រើប្រាស់ថវិកាផ្ទាល់ខ្លួនដោយមានការអនុញ្ញាតពីអាជ្ញាធរក្នុងការកសាង និងជួសជុលអាងទឹកទាំង ២ នេះ។
លោកថ្លែងថា លោក សារឿន មិនបានជំរិតទារលុយពីពលរដ្ឋនោះទេ ព្រោះពលរដ្ឋនៅក្នុងឃុំនេះបានឯកភាពផ្តល់លុយចំពោះការផ្គត់ផ្គង់ទឹកពីអាង សម្រាប់ប្រើប្រាស់ក្នុងស្រែរបស់ពួកគេ ខណៈមានពលរដ្ឋប៉ុន្មានគ្រួសារប៉ុណ្ណោះដែលមិនពេញចិត្ត និងមិនព្រមផ្តល់ថ្លៃសេវាតាមការព្រមព្រៀង។
លោកបញ្ជាក់ថា៖ «ការលើកឡើងនេះយើងបានដាក់ពាក្យបណ្តឹងទៅតុលាការរួចហើយ ព្រោះវាមិនមែនជារឿងពិត។ ចំពោះអាងដែលចោទប្រកាន់ថា លោកឧត្តមសេនីយ៍ឯក គាំ សារឿន ធ្វើអាងនៅលើដីរដ្ឋ គឺមិនមានទេហើយក៏មិនមានពលរដ្ឋដល់ទៅជាង ១ ០០០ គ្រួសារ ដូចការអះអាងដែរ គឺមានតែប៉ុន្មានគ្រួសារដោយមានខ្លះ ១ គ្រួសារបានផ្តិតមេដៃ ៤ ទៅ ៥ នាក់ ដើម្បីដាក់ពាក្យបណ្តឹងនេះ»។
លោក សុខ លូ អភិបាលខេត្តកំពង់ធំថ្លែងថា លោកមិនបានដឹងច្បាស់ពីបញ្ហានេះនោះទេ ព្រោះជម្លោះនេះបានកើតមានឡើងយូរហើយ និងក៏មានការប្តឹងផ្តល់គ្នាជាច្រើនលើកច្រើនសាផងដែរ។ លោក សុខ លូ ក៏បានត្រៀមរបាយការណ៍ផ្សេងៗជុំវិញបញ្ហានេះដែរថា វាមិនពាក់ព័ន្ធនឹងអាជ្ញាធរខេត្តនោះទេ។
លោកបញ្ជាក់ថា៖ «ការងារនេះមានក្រុមថ្នាក់ជាតិបានចុះមកដោះស្រាយជូនពួកគាត់ហើយដែលក្នុងការចុះដោះស្រាយកន្លងមកគឺមានអស់ហើយ ប៉ុន្តែនៅតែមានពលរដ្ឋមួយចំនួនគាត់មិនពេញចិត្ត។ ដូច្នេះយើងមិនអាចថា ភាគីខាងណាត្រូវ ឬខុសបានទេ ហើយបើគណបក្សខ្មែរក្រោក គាត់ថាដាក់រាយការណ៍ទៅសម្តេចចំពោះខេត្តក៏បានរាយការណ៍ទៅថ្នាក់ដឹកនាំជាបន្តបន្ទាប់ដែរ»។
បើតាមលោក ឡុច ប៊ុនធត អតីតមេឃុំចំណារលើ ស្រុកស្ទោងបានប្រាប់ភ្នំពេញប៉ុស្តិ៍ថាអាងទឹកទាំង ២ នេះត្រូវបានឈ្មួញសាងសង់ឡើងតាំងពីឆ្នាំ ២០០៧ ដោយមានការអនុញ្ញាតពីអាជ្ញាធរឃុំសម្រាប់ផ្គត់ផ្គង់ទឹកដល់ប្រជាពលរដ្ឋធ្វើស្រែដោយការបង់កម្រៃតាមការព្រមព្រៀងដែលអាចផ្គត់ផ្គង់ដល់ប្រជាពលរដ្ឋប្រមាណជាង ១០០ គ្រួសារ។
ប៉ុន្តែបើតាមលោក សុក រដ្ឋា អ្នកសម្របសម្រួលអង្គការអាដហុកប្រចាំខេត្តកំពង់ធំបានឲ្យដឹងថា ការផ្គត់ផ្គង់ទឹកពីអាងខាងលើនេះត្រូវលុបចោលវិញ កាលពីឆ្នាំ ២០១៤ បន្ទាប់ពីមាន សជណ របស់រដ្ឋាភិបាលដោយបានប្រគល់អាងទឹកនេះដល់សហគមន៍សម្រាប់ទុកប្រើប្រាស់រួម។ ស្រាប់តែនៅឆ្នាំ ២០១៥ លោក សារឿន អះអាងថាលោកបានសិទ្ធិគ្រប់គ្រងអាងនេះជាថ្មីនឹងបន្តយកកម្រៃពីប្រជាពលរដ្ឋរហូតកើតមានការតវ៉ា និងឈានទៅដល់ការចាប់ខ្លួនសមាជិកក្រុមប្រឹក្សាឃុំម្នាក់ឈ្មោះ ថៃ ថែន រហូតដល់បច្ចុប្បន្ន។
លោក រដ្ឋា បន្តថា ករណីនេះជាជម្លោះរ៉ាំរ៉ៃជាយូរមកហើយដោយសារតែពលរដ្ឋមិនពេញចិត្តនឹងការឲ្យឈ្មួញយកអាងទឹករបស់រដ្ឋទៅគ្រប់គ្រងសម្រាប់ធ្វើអាជីវកម្មនេះ។
លោកថ្លែងថា លោកចង់ឃើញថ្នាក់ដឹកនាំមានការដោះស្រាយឲ្យបានត្រឹមត្រូវដល់ពលរដ្ឋដែលរងគ្រោះ ជាពិសេសត្រូវធ្វើការដោះលែងសមាជិកក្រុមប្រឹក្សាឃុំម្នាក់ដែលត្រូវបានចាប់ឃុំខ្លួនដោយអយុត្តិធម៌។
លោកបញ្ជាក់ថា៖ «យើងមិនដឹងថា នីតិវិធីរបស់អាជ្ញាធរនេះកន្លងមកដោះស្រាយយ៉ាងម៉េចបានប្រជាពលរដ្ឋនៅតែមានការទាមទារតវ៉ា ហើយមិនចប់។ យើងមើលឃើញថា បើអាជ្ញាធរអនុវត្ត សជណ ហ្នឹងប្រហែលជាទំនាស់ហ្នឹង វាចប់បាត់ហើយ ប៉ុន្តែហេតុអ្វីបានមានឈ្មួញទៅគ្រប់គ្រងអាងទឹកហ្នឹងបន្តទៀតចំណុចនេះសំខាន់ណាស់»៕
