The Phnom Penh Post Search

Search form




Logo of Phnom Penh Post newspaper Phnom Penh Post - បក្ស​ជាប់​ឆ្នោត​ពិភាក្សា​ច្បាប់​ដ៏ចម្រូង​ចម្រាស




បក្ស​ជាប់​ឆ្នោត​ពិភាក្សា​ច្បាប់​ដ៏ចម្រូង​ចម្រាស

Content image - Phnom Penh Post
លោក យ៉ែម បុញ្ញឫទ្ធិ និង​លោក ឈាង វុន ពី​ម្សិលមិញ។ ហុង មិនា

បក្ស​ជាប់​ឆ្នោត​ពិភាក្សា​ច្បាប់​ដ៏ចម្រូង​ចម្រាស

ភ្នំពេញៈ គណៈកម្មាធិការ​អចិន្រៃ្តយ៍​នៃ​រដ្ឋសភា​ដែល​មាន​សមាសភាព​មកពី​បក្ស​ជាប់​ឆ្នោត​កាលពី​ម្សិលមិញ​បាន​ពិភាក្សា​គ្នា​ពី​របៀប​វារៈ​នៃ​ច្បាប់​ស្តីពី​គណបក្ស​នយោបាយ​ដែល​មាន​ភាពចម្រូង​ចម្រាស​ដើម្បី​ធ្វើ​វិសោធនកម្ម​នាពេល​ឆាប់ៗ​នេះ ដែល​អាច​ឈាន​ទៅ​រំលាយ​គណបក្ស ឬ​រារាំង​អ្នក​នយោបាយ​ណា​ដែល​មាន​ទោស​មិន​ឲ្យ​ធ្វើ​ជា​ប្រធាន​គណបក្ស ខណៈ​ដែល​អ្នក​វិភាគ​ថា​ជា​ឧបករណ៍​បក្ស​កាន់​អំណាច។

បន្ទាប់ពី​ពិភាក្សា​គ្នា​ជិត ២ ម៉ោង​រវាង​សមាជិក ៨ រូប​នៃ​គណៈកម្មាធិការ​អចិន្រៃ្តយ៍​របស់​គណបក្ស​កាន់​អំណាច និង​សមាជិក ៤ រូប​នៃ​គណៈកម្មាធិការ​អចិន្រៃ្តយ៍​គណបក្ស​ប្រឆាំង អ្នក​នាំ​ពាក្យ​គណបក្ស​ប្រជាជន​លោក ឈាង វុន និង​តំណាងរាស្រ្ត​គណបក្ស​សង្គ្រោះ​ជាតិ លោក យ៉ែម បុញ្ញឫទ្ធិ នៅ​សន្និសីទ​កាសែត អ្នក​នាំពាក្យ​ទាំង​ពីរ​រូប​បាន​ព្យាយាម​ការពារ​ជំហរ និង​អត្ថប្រយោជន៍​របស់​ខ្លួន​ចំពោះ​ការ​ធ្វើ​វិសោធនកម្ម​នៃ​ច្បាប់​ចម្រូង​ចម្រាស​នេះ។

អ្នក​នាំ​ពាក្យ​តំណាងរាស្រ្ត​គណបក្ស​ប្រជាជន (CPP) លោក ឈាង វុន បាន​ប្រាប់​អ្នក​យក​ព័ត៌មាន​ថា​តំណាង​រាស្រ្ត CPP ៦០ រូប​បាន​ស្នើ​ឲ្យ​ធ្វើ​វិសោធនកម្ម​ច្បាប់​ស្តីពី​គណបក្ស​នយោបាយ​ដើម្បី​ការពារ​នីតិរដ្ឋ ប្រជាធិបតេយ្យ របប​រាជានិយម ចៀសវាង​ការ​ប៉ុនប៉ង​របស់​ក្រុម ឬ​បុគ្គល​ណា​មួយ​ដែល​ញុះញង់​ធ្វើ​ឲ្យ​ខូច​ដំណើរការ​ទាំង​នេះ​ហើយ​ការពារ​មិន​ឲ្យ​មាន​ការ​បង្កើត​អបគមន៍​ និង​កងកម្លាំង​ប្រដាប់​អាវុធ​ដោយ​ក្រុម​ណា​មួយ។

លោក ឈាង វុន បាន​ថ្លែង​ថា៖ «ពិត​ណាស់ ច្បាប់​ទាំង​អស់​នេះ​ដែល​យើង​ធ្វើ​គឺ​គោលដៅ​ធំ​របស់​យើង​គឺ​គាំទ្រ​នីតិរដ្ឋ គាំទ្រ​របប​នយោបាយ គាំទ្រ​រាជបល្ល័ង្ក។ ដូច្នេះ​នៅ​ក្នុង​មាត្រា​មួយ​ចំនួន​នៃ​ច្បាប់ [ស្តីពី​គណបក្ស​នយោបាយ] យើង​ហាមឃាត់​ជា​ដាច់ខាត​មិន​ឲ្យ​មាន​ការ​ញុះញង់​ដែល​ជំរុញ​ឲ្យ​មាន​ការ​បែកបាក់​ជាតិ​ទេ...»។

លោក​បាន​បន្ថែម​ថា ច្បាប់​នេះ​គឺ​មិនមែន​ធ្វើ​ឡើង​ដើម្បី​គំរាម​កំហែង​គណបក្ស​សង្គ្រោះ​ជាតិ (CNRP) គណបក្ស​ណា​មួយ​ ឬ​បុគ្គល​ណា​មួយ​ទេ ប៉ុន្តែ​សម្រាប់​អនុវត្ត​ទូទៅ​ និង​គណបក្ស​នយោបាយ​ទាំង​អស់​នៅ​កម្ពុជា។

លោក ឈាង វុន មិន​បាន​បញ្ជាក់​អំពី​កាលបរិច្ឆេទ​ជាក់លាក់​នៃ​ការ​ធ្វើ​វិសោធនកម្ម​ច្បាប់​នេះ​ទេ ដោយ​រង់ចាំ​គណៈកម្មការ​នីតិកម្ម និង​យុត្តិធម៌​បញ្ជូន​ច្បាប់​នេះ​ទៅ​គណៈកម្មាធិការ​អចិន្រៃ្តយ៍​ដើម្បី​កំណត់​កាលបរិច្ឆេទ​សម្រាប់​ការ​ប្រជុំ​ពេញ​អង្គ​នៃ​រដ្ឋសភា។

លោក​បាន​បញ្ជាក់​ថា៖ «[ខ្ញុំ] សូម​ប្រាប់​ថា​ច្បាប់​នេះ បើ​តាម​ស្មារតី​របស់​យើង​ដែល​ជា​តំណាងរាស្រ្ត យើង​គិត​ថា [យើង] មិន​អាច​ពន្យឺត​ដំណើរការ​ទេ ព្រោះ​គណបក្ស​នយោបាយ​ដែល​ចុះ​បញ្ជី​ត្រឹមត្រូវ គណបក្ស​ទាំងអស់​កំពុង​ដំណើរការ»។

ប៉ុន្តែ​អ្នក​នាំ​ពាក្យ​របស់​តំណាងរាស្រ្ត​គណបក្ស​សង្គ្រោះ​ជាតិ (CNRP) លោក យ៉ែម បុញ្ញឫទ្ធិ បាន​ចាត់​ទុក​ការ​ធ្វើ​វិសោធនកម្ម​ច្បាប់​នេះ​ថា​ជា​ការ​ដាក់​កំហិត​ពី​គណបក្ស​ប្រជាជន​កម្ពុជា (CPP) ទៅ​លើ​គណបក្ស​នយោបាយ និង​អ្នក​នយោបាយ ហើយ​ថា​ច្បាប់​នេះ​មិន​គួរ​ធ្វើ​វិសោធនកម្ម​ទេ​ដោយសារ​មាន​ច្បាប់​សំខាន់ ៣ រួច​ហើយ​គឺ​ច្បាប់​ស្តីពី​គណបក្ស​នយោបាយ ច្បាប់​ស្តីពី​ការ​បោះឆ្នោត និង​ច្បាប់​ស្តីពី​ការ​បោះឆ្នោត​ឃុំ​សង្កាត់។ លោក យ៉ែម បុញ្ញឫទ្ធិ បាន​បន្ថែម​ថា​ច្បាប់ ២ ​ចុង​ក្រោយ​បាន​ចែង​រួច​ហើយ​អំពី​ទណ្ឌិត​មិន​អាច​ឈរ​ឈ្មោះ​បោះឆ្នោត​បាន។

លោក យ៉ែម បុញ្ញឫទ្ធិ បាន​បញ្ជាក់​ថា៖ «ហេតុ​ដូច្នេះ​យើង​យល់​ថា​វា​មិន​ចាំបាច់​ធ្វើ​វិសោធនកម្ម​នៅ​ក្នុង​ស្មារតី​ដាក់​កំហិត​ពាក់ព័ន្ធ​នឹង​អ្នក​នយោបាយ»។ «នីតិវិធី​នៃ​ការ​ធ្វើ​ច្បាប់ [យើង] រៀបចំ​ពិភាក្សា​ទូលំទូលាយ​ពី​មុន​ពេល​ដាក់​ទៅ​គណៈកម្មាធិការ​អចិន្រៃ្តយ៍​ដាក់​ទៅ​សភា​ពេញ​អង្គ ពីព្រោះ​នៅ​ពេល​ទៅ​ដល់​សភា​ពេញអង្គ សំឡេង​ភាគច្រើន​តែងតែ​ការពារ​សេចក្តី​ព្រាង​ច្បាប់​នោះ។ ដូច្នេះ​ដើម្បី​ឲ្យ​មាន​លទ្ធផល​ល្អ​សម្រាប់​ជាតិ [យើង] តែងតែ​ធ្វើ​សេចក្តី​ព្រាង​ច្បាប់​ដោយ​មាន​ការ​ចូលរួម [ពី​គណបក្ស​ពាក់ព័ន្ធ] ពី​ដើម​ទី។ [យើង] មិន​ចាំបាច់​រង់ចាំ​រហូត​ដល់​សភា​ពេញអង្គ​ឡើង​តស៊ូ​មតិ [យើង] មិន​អាច​កែប្រែ​អ្វី​ទៀត​បាន»។

លោក បុញ្ញឫទ្ធិ ក៏​បាន​សុំ​ឲ្យ​មាន​ការ​ផ្អាក​ការ​ធ្វើ​វិសោធនកម្ម​ច្បាប់​នេះ​សិន រង់ចាំ​ពិភាក្សា​ល្អិតល្អន់​ជាមួយ​គណបក្ស​ពាក់ព័ន្ធ​ផ្សេង​ និង​គណបក្ស​នយោបាយ ៤៥ ដទៃៗ​ទៀត​ដែល​បាន​ចុះ​បញ្ជី​ចូលរួម​ការ​បោះឆ្នោត​មុន​ពេល​បញ្ជូន​ទៅ​ធ្វើ​វិសោធនកម្ម។

លោក បុញ្ញឫទ្ធិ បាន​បន្ត​ថា៖ «សូម​អ្នក​កាសែត​ជួយ​ពិចារណា​ស្មារតី​ច្បាប់​គឺ​ដើម្បី​ជាតិ​ទាំង​មូល​ដើម្បី​គណបក្ស​នយោបាយ​ទាំងអស់។ ប្រសិន​បើ​យើង​មិន​ទាន់​ពិភាក្សា​ជាមួយ​គណបក្ស​នយោបាយ​ដែល​ច្បាប់​នេះ​គ្រាន់​តែ​ធ្វើ​ឡើង​លក្ខណៈ​ឯកតោ​ភាគី ហើយ​ច្បាប់​នេះ​ចេញ​ជា​ធរមាន​ឲ្យ​គណបក្ស​នយោបាយ​ទាំង​អស់​ត្រូវ​តែ​គោរព និង​អនុវត្ត។ ដូច្នេះ​យើង​យល់​ថា​ [យើង] ផ្អាក​ដើម្បី​ឲ្យ​យើង​ពិភាក្សា​ស្វែងរក​ចំណុច​វិជ្ជមាន​ដើម្បី​ដោះស្រាយ​ជាមួយ​គ្នា»។

នៅ​ក្នុង​ច្បាប់​ចាស់​ស្តីពី​គណបក្ស​នយោបាយ​មាន​មាត្រា ៤៥ ហើយ​បើ​តាម​លោក ឈាង វុន មាន​មាត្រា ២៧ ត្រូវ​បាន​ស្នើ​ធ្វើ​វិសោធនកម្ម​ហើយ​តំណាងរាស្រ្ត CPP បាន​បន្ថែម​មាត្រា​ថ្មី​ចំនួន ៥ ទៀត​ដូច្នេះ​ច្បាប់​ថ្មី​នឹង​នេះ​មាន​ ៥០ មាត្រា។

នៅ​ក្នុង​មាត្រា ២៩ ថ្មី​នៃ​សេចក្ដី​ព្រាង​ច្បាប់​នេះ​បាន​ចែង​ថា​គណបក្ស​នយោបាយ​ត្រូវ​បាន​ហាមឃាត់​មិន​ឲ្យ​ទទួល​វិភាគទាន ទោះ​ជា​តាម​រូបភាព​ណា​ក៏ដោយ​ពី​ស្ថាប័នរដ្ឋ សមាគម អង្គការ​មិនមែន​រដ្ឋាភិបាល សហគ្រាស​សាធារណៈ គ្រឹះស្ថាន​សាធារណៈ វិទ្យាស្ថាន​សាធារណៈ​លើកលែង​តែ​ករណី​ដូច​មាន​ចែង​ក្នុង​មាត្រា​ ២៨ នៃ​ច្បាប់​នេះ។

គណបក្ស​នយោបាយ​ត្រូវ​បាន​ហាមឃាត់​មិន​ឲ្យ​ទទួល​វិភាគទាន​ទោះ​តាម​រូបភាព​ណា​ក៏ដោយ​ពី​ស្ថាប័ន​បរទេស​ក្រុមហ៊ុន​បរទេស ជនបរទេស ឬ​អង្គការ​ដែល​មាន​ប្រភព​ហិរញ្ញប្បទាន​ពី​បរទេស។

ចំពោះ​មាត្រា ៤៥ នៃ​ច្បាប់​នេះ​ចែង​ថា​ក្នុង​ករណី​គណបក្ស​នយោបាយ​ត្រូវ​បាន​រំលាយ តុលាការ​អាច​សម្រេច​ហាមឃាត់​ការ​ធ្វើ​សកម្មភាព​នយោបាយ​របស់​មេដឹកនាំ​នៃ​គណបក្ស​នយោបាយ​នោះ​រយៈពេល ៥ ឆ្នាំ។

រីឯ​មាត្រា ៤៨ នៃ​សេចក្តី​ព្រាង​ច្បាប់​នេះ​ថា បន្ទាប់ពី​ច្បាប់​នេះ​ចូល​ជាធរមាន​គណបក្ស​នយោបាយ​ទាំងអស់​ត្រូវ​តែ​បំពេញ​បែបបទ​និយតកម្ម​ទៅ​តាម​បទប្បញ្ញត្តិ​នៃ​ច្បាប់​នេះ​ក្នុង​អំឡុង ៩០ ថ្ងៃ​ចាប់​ពី​ថ្ងៃ​ដែល​ច្បាប់​នេះ​ចូល​ជាធរមាន។

មាត្រា ៥០ ចែង​ថា​ច្បាប់​នេះ​ត្រូវ​ប្រកាស​ចូល​ជាធរមាន​ជា​បន្ទាន់។

ទោះ​ជា​យ៉ាង​ណា​អ្នក​វិភាគ​នយោបាយ​លោក អ៊ូ វីរៈ ប្រធាន​អង្គការ​វេទិកា​អនាគត​បាន​ចាត់​ទុក​ការ​ធ្វើ​វិសោធនកម្ម​ច្បាប់​នេះ​ថា​ជា​ឧបករណ៍​របស់ CPP ដើម្បី​ប្រើប្រាស់​នៅ​ពេល​ណា​មួយ​ហើយ​ថា​ប្រសិន​បើ​ច្បាប់​នេះ​ត្រូវ​បាន​ធ្វើ​វិសោធនកម្ម​បន្ទាន់​បែប​នេះ​ប្រហែល​ជា​នឹង​ត្រូវ​អនុវត្ត​ពាក់ព័ន្ធ​នៅ​ក្នុង​ការ​បោះឆ្នោត​ឃុំ​សង្កាត់ ប៉ុន្តែ​លោក អ៊ូ វីរៈ មិន​ជឿ​ថា CPP រំលាយ CNRPទេ ពីព្រោះ​មាន​តែ CNRP តែ​មួយ​ដែល​មាន​អាសនៈ និង​អាច​ប្រកួត​ប្រជែង​ជាមួយ CPP ។

លោក អ៊ូ វីរៈ បាន​បញ្ជាក់​ថា៖ «សូម​ពលរដ្ឋ​វិនិច្ឆ័យ​នរណា​មាន​ទោស នរណា​មិន​មាន​ទោស? លោក សម រង្ស៊ី បាន​លាលែង​រួច​ហើយ [ពី​ប្រធាន CNRP ]។ ប្រសិន​បើ​ច្បាប់​នេះ​ត្រូវ​បាន​អនុម័ត វា​គ្រាន់​តែ​ជា​ឧបករណ៍​ដែល​នឹង​ប្រើប្រាស់​នៅ​ពេល​ណា​មួយ​ដែល​ចាំបាច់។ ខ្ញុំ​មិន​ជឿ​ថា​គណបក្ស​កាន់​អំណាច​ចង់​រំលាយ [CNRP] នោះ​ទេ​ពីព្រោះ​គណបក្ស​កាន់​អំណាច​ចង់​ប្រកួត​ប្រជែង​ជាមួយ [ CNRP ] គាត់​ចង់​ធ្វើ​ឲ្យ [ CNRP ]ចាញ់​ឆ្នោត គាត់​ចង់​ឲ្យ [CNRP] ចុះ​ខ្សោយ»៕ PS

អត្ថបទគួរចាប់អារម្មណ៍