The Phnom Penh Post Search

Search form




Logo of Phnom Penh Post newspaper Phnom Penh Post - បក្ស​ជាប់​ឆ្នោត​ឲ្យ​ថ្នាក់​មូលដ្ឋាន ​​រើស​បេក្ខជន​ក្រុម​ប្រឹក្សា​ឃុំ​សង្កាត់

បក្ស​ជាប់​ឆ្នោត​ឲ្យ​ថ្នាក់​មូលដ្ឋាន ​​រើស​បេក្ខជន​ក្រុម​ប្រឹក្សា​ឃុំ​សង្កាត់

Content image - Phnom Penh Post
លោក សុខ ឥសាន អ្នក​នាំពាក្យ​គណបក្ស​ប្រជាជន​កម្ពុជា​​​។ ផា លីណា

បក្ស​ជាប់​ឆ្នោត​ឲ្យ​ថ្នាក់​មូលដ្ឋាន ​​រើស​បេក្ខជន​ក្រុម​ប្រឹក្សា​ឃុំ​សង្កាត់

ភ្នំពេញៈ ខណៈ​ដែល​ការ​បោះឆ្នោត​ឃុំ សង្កាត់​កាន់​តែ​ខិត​ជិត​ចូល​មក​ដល់​គណបក្ស​​កាន់​អំណាច​បាន​ផ្តល់​សិទ្ធិ​ឲ្យ​គណបក្ស​នៅ​តាម​ឃុំ​សង្កាត់​នីមួយៗ​ចំនួន ១៦៤៦ នៅ​ទូទាំង​ប្រទេស​ជា​អ្នក​​បោះឆ្នោត​​​ជ្រើសរើស​បេក្ខជន​សម្រាប់​តំណែង​មេឃុំ ចៅ​សង្កាត់​ខណៈ​ដែល​គណបក្ស​​ប្រឆាំង​បាន​ផ្តល់​សិទ្ធិ​ឲ្យ​គណបក្ស​នៅ​ថ្នាក់​មូលដ្ឋាន​ជា​អ្នក​ជ្រើសរើស​បេក្ខជន​ដោយ​ខ្លួនឯង​។

លោក សុខ ឥសាន អ្នក​នាំពាក្យ​គណបក្ស​ប្រជាជន​បាន​ថ្លែង​កាលពី​ថ្ងៃ​ពុធ​ថា​សមាជ​គណៈកម្មាធិការ​កណ្តាល​គណបក្ស​ប្រជាជន​កាលពី​ថ្ងៃ​ទី ១៧ និង១៨ ខែ​ធ្នូ​កន្លង​ទៅ​បាន​បញ្ជូន​សារ​ទៅ​មេដឹកនាំ​ថ្នាក់​ឃុំ​ សង្កាត់​របស់​គណបក្ស​​ថា​ពួកគេ​ត្រូវ​ធ្វើការ​បោះឆ្នោត​ដើម្បី​ជ្រើសរើស​បញ្ជី​បេក្ខជន​របស់​ពួកគេ​រួម​ទាំង​មេឃុំ​ផង​ដែរ។

លោក​​ឲ្យ​ដឹង​ថា៖ «គណបក្ស​ប្រជាជន​បាន​ណែនាំ​ទៅ​គ្រប់​ឃុំ​សង្កាត់​ទាំង​អស់​ឲ្យ​ធ្វើការ​នេះ​ដោយ​ខ្លួន​ឯង​ហើយ​ត្រូវ​តែ​ធ្វើ​ឲ្យ​បាន​ចប់​នៅ​ក្នុង​ខែ​មករា។ ពួកគេ​នឹង​យក​បញ្ជី​ឈ្មោះ​បេក្ខជន​​ដែល​ត្រូវ​បាន​បោះឆ្នោត​តាមរយៈ​សមាជ​ឃុំ​ សង្កាត់​បញ្ជូន​ទៅ​​ថ្នាក់​ដឹកនាំ​កំពូល​ដើម្បី​ធ្វើការ​ត្រួតពិនិត្យ»។

លោក​ថ្លែង​ថា​៖ ​«នៅ​ក្នុង​គោល​នយោបាយ​លទ្ធិប្រជាធិបតេយ្យ​របស់​គណបក្ស​ប្រជាជន​គឺ​មាន​ការ​បោះឆ្នោត​ហើយ​សមាជ​នៅ​ថ្នាក់​ឃុំ​សង្កាត់​ទាំង​អស់​ត្រូវ​តែ​ត្រូវ​បញ្ចប់​នៅ​ខែ​មករា»។

អ្នក​នាំពាក្យ​គណបក្ស​សង្គ្រោះ​ជាតិ​លោក​ យឹម សុវណ្ណ ​បាន​ថ្លែង​ថា​គណបក្ស​ប្រឆាំង​មាន​វិធីសាស្ត្រ​​បែប​វិមជ្ឈការ​បន្ថែម​ទៀត​សម្រាប់​ការ​ជ្រើសរើស​បេក្ខជន​របស់​ខ្លួន​សម្រាប់​ឃុំ​ សង្កាត់​ទាំងអស់​ចំនួន ១៦៤៦ ដោយ​​ផ្តល់​អំណាច​ទៅ​ឲ្យ​មេដឹកនាំ​នៅ​​ថ្នាក់​មូលដ្ឋាន​ធ្វើការ​សម្រេច​ចិត្ត​ថា​តើ​ត្រូវ​ជ្រើសរើស​បេក្ខជន​យ៉ាង​ម៉េច​ប៉ុន្តែ​រក្សា​ការ​បោះឆ្នោត​​ជា​ជម្រើស​។

លោក​បន្ត​ថា៖ «យើង​មាន​ដំណើរការ​បី​យ៉ាង​។ ទី​មួយ​គឺ​យើង​ប្រគល់​អំណាច​ទៅ​ឲ្យ​ថ្នាក់​មូលដ្ឋាន​ដើម្បី​ធ្វើ​​ដោយ​ខ្លួនឯង»។ «ទី​ពីរ​ប្រសិន​បើ​មាន​ការ​ខ្វែង​គំនិត​គ្នា​យើង​មាន​គណៈកម្មាធិការ​មួយ​ដើម្បី​ដោះស្រាយ​ហើយ​គណៈកម្មាធិការ​នេះ​មាន​សមាជិក​មក​ពី​ក្រុម​ការងារ​ថ្នាក់​ខេត្ត​ប្រតិបត្តិ និង​នាយក​ប្រតិបត្តិ​ថ្នាក់​ស្រុក​ និង​ប្រជាពលរដ្ឋ​​ដែល​ឈរ​ឈ្មោះ​ធ្វើ​ជា​បេក្ខជន​»។

លោក​ សុវណ្ណ ​បាន​ពន្យល់​ថា៖ ​«​ប្រសិន​បើ​ជំហរ​ទី​ពីរ​មិន​អាច​ដោះស្រាយ​បាន​នោះ​ជម្រើស​ទី​បី​គឺ​យើង​នឹង​អនុញ្ញាត​ឲ្យ​ប្រជាពលរដ្ឋ​​នៅ​ថ្នាក់​មូលដ្ឋាន​បោះឆ្នោត...បន្ទាប់​មក​យើង​នឹង​តែងតាំង​អ្នក​នោះ​ធ្វើ​ជា​បេក្ខជន​ដើម្បី​ប្រកួត​ប្រជែង​ជាមួយ​គណបក្ស​ដទៃ​ទៀត»។ «ជា​រួម​គឺ​យើង​ផ្តល់​អំណាច​ដល់​ថ្នាក់​មូលដ្ឋាន»។

លោក កែម ឡី ជា​អ្នក​វិភាគ​នយោបាយ​ដែល​ត្រូវ​បាន​គេ​ធ្វើ​ឃាត​កាលពី​ថ្ងៃ​ទី ១០ ខែ​កក្កដា​កន្លង​ទៅ​តែងតែ​បាន​រិះគន់​ទាំង​​​គណបក្ស​ប្រជាជន​ និង​គណបក្ស​សង្គ្រោះ​ជាតិ​ចំពោះ​ការ​បរាជ័យ​មិន​បាន​ធ្វើការ​បោះឆ្នោត​ផ្ទៃក្នុង​ដើម្បី​ជ្រើសរើស​បេក្ខជន​របស់​ខ្លួន​ហើយ​ជា​ញឹកញាប់​តែងតែ​អំពាវនាវ​ដល់​​គណបក្ស​​ទាំង​ពីរ​ឲ្យ​អនុវត្ត​នូវ​អ្វី​ដែល​លោក​ហៅ​ថា​ «លទ្ធិប្រជាធិបតេយ្យ​ក្នុង​បក្ស»​។

លោក សាម អ៊ីន ដែល​ជា​មិត្ត​​ជិត​ស្និទ្ធ​របស់​លោក​ កែម ឡី ដែល​ឥឡូវ​នេះ​លោក​ជា​អ្នក​នាំ​ពាក្យ​​គណបក្ស​ប្រជាធិបតេយ្យ​មូលដ្ឋាន​ (GDP) ​​ថ្លែង​ថា​លោក​បាន​ទទួល​ដំណឹង​ពី​ប្រព័ន្ធ​បោះឆ្នោត​បឋម​របស់​គណបក្ស​ប្រជាជន​ហើយ​បាន​កំណត់​ការ​សម្រេច​ចិត្ត​ដល់​ការ​តស៊ូ​មតិ​របស់​អ្នក​វិភាគ។

លោក​ អ៊ីន ​ថ្លែង​ថា៖ «យើង​បានឮ​ពី​មេដឹកនាំ​ក្នុង​មូលដ្ឋាន​របស់​យើង​ថា​ពួកគេ​អនុវត្ត​វិធីសាស្ត្រ​នេះ​គឺ​ដើម្បី​អនុញ្ញាត​ឲ្យ​សមាជិក​របស់​ខ្លួន​ជ្រើសរើស​បេក្ខជន​របស់​គេ​សម្រាប់​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ​សង្កាត់​នា​ពេល​ខាង​មុខ​ហើយ​នេះ​គឺជា​អ្វី​ដែល​យើង​បាន​ទាមទារ​ពី​គណបក្ស​ទាំង​នោះ​»។ «វា​ជា​រឿង​ល្អ​​ហើយ​យើង​សប្បាយ​ចិត្ត​ដែល​មើល​ឃើញ​លទ្ធផល​នៃ​ការ​តស៊ូ​មតិ​ និង​ការងារ​របស់​​យើង។ យើង​ក៏​បាន​អនុវត្ត​វិធីសាស្ត្រ​នេះ​នៅក្នុង​គណបក្ស​របស់​យើង​ផ្ទាល់​ផង​ដែរ​ហើយ​យើង​បាន​រៀបចំ​សមាជ​ឃុំ​ចំនួន ២៤ រួចរាល់​ហើយ​ដើម្បី​អនុញ្ញាត​ឲ្យ​សមាជិក​របស់​គណបក្ស GDP បោះឆ្នោត​ជ្រើសរើស​បេក្ខជន​របស់​ខ្លួន​ហើយ​យើង​សប្បាយ​ចិត្ត​ដែល​​ឃើញ​គណបក្ស​ប្រជាជន​កម្ពុជា​ធ្វើ​ដូច​នេះ​ដែរ»។

លោក​បន្ត​ថា៖ «នេះ​គឺជា​អ្វី​ដែល​លោក​​ កែម ឡី ​ចង់​ឃើញ។ លោក កែម ឡី ​និង​គណបក្ស​ GDP ​បាន​បង្ក​ឱ្យ​មាន​ឥទ្ធិពល​មួយ​ចំនួន​លើ​ចំណុច​នេះ។ វា​គឺជា​ការ​ផ្លាស់ប្តូរ​មួយ​ដ៏ត្រឹមត្រូវ​ដើម្បី​ឆ្ពោះ​ទៅ​សង្គម​ប្រជាធិបតេយ្យ​បន្ថែម​ទៀត»។

លោក​ គល់ បញ្ញា ​នាយក​ប្រតិបត្តិ​អង្គការ​ឃ្លាំ​មើល​ការ​បោះឆ្នោត​ខុមហ្វ្រែល​បាន​ថ្លែង​​ថា​លោក​រីករាយ​ដែល​គណបក្ស​កាន់​អំណាច​បាន​ធ្វើការ​បោះឆ្នោត​បែប​នេះ​ប៉ុន្តែ​បាន​អំពាវនាវ​ដល់​មេដឹកនាំ​ថ្នាក់​ជាតិ​របស់​ខ្លួន​ឲ្យ​ធានា​ថា​នឹង​មិន​ធ្វើ​រឿង​គួរ​ឱ្យ​អស់​សំណើច​នោះ​ទេ​។

លោក​ថ្លែង​ថា៖ «ខ្ញុំ​សូម​ស្វាគមន៍​ចំពោះ​រឿង​នេះ។ វា​កាន់​តែ​មាន​លទ្ធិប្រជាធិបតេយ្យ​សម្រាប់​រចនាសម្ព័ន្ធ​ផ្ទៃក្នុង​ប្រសិន​បើ​វា​មាន​តម្លាភាព»។ លោក​ពន្យល់​ថា​គណបក្ស​ប្រជាជន​បាន​ធ្វើការ​បោះឆ្នោត​ស្រដៀង​គ្នា​នេះ​កាលពី​អតីតកាល​ប៉ុន្តែ​នៅ​តែ​មាន​សំណួរ​ពី​ភាព​ស្រប​ច្បាប់​។

លោក​ថ្លែង​ថា៖ «កាលពី​មុន​ពួកគេ​ក៏​បាន​ឲ្យ​សមាជិក​ជ្រើសរើស​បេក្ខជន​របស់​ខ្លួន​ដែរ​ប៉ុន្តែ​ប្រជាជន​បាន​ត្អូញត្អែរ​ថា​ពួកគេ​មិន​ដឹង​ថា​អ្នក​ណា​មាន​ប្រជាប្រិយភាព​ពិតប្រាកដ​នោះ​ទេ។ ពួកគេ​គ្រាន់​តែ​ដាក់​ [សន្លឹក​ឆ្នោត​] នៅ​ក្នុង​ប្រអប់​ឆ្នោត​បិទ​ជិត​ហើយ​បាន​បើក​វា​ឡើង​នៅ​ការិយាល័យ​ស្រុក​ ឬ​ការិយាល័យ​​ខេត្ត​ក្រោយ​មក​ប្រកាស​សេចក្តី​សម្រេច​នោះ​ឡើង»។

លោក​ បញ្ញា ​បញ្ជាក់​ថា៖ «វា​ហាក់​ដូចជា​មិន​សូវ​បើក​ចំហ​ប៉ុន្មាន​ទេ។ ដំណើរការ​ជ្រើសរើស​បេក្ខជន​នេះ​ត្រូវ​តែ​មាន​តម្លាភាព»៕ NS

អត្ថបទគួរចាប់អារម្មណ៍