ភ្នំពេញៈ ក្រសួងមហាផ្ទៃមិនទាន់មានប្រតិកម្មលើ «គណបក្សខ្មែរតែមួយ» ដែលបានប្រកាសចូលរួមគាំទ្រចលនាសង្គ្រោះជាតិដែលលោកនាយករដ្ឋមន្ត្រីចាត់ទុកថា ជាចលនាឧទ្ទាមខុសច្បាប់នោះទេ ខណៈដែលអ្នកនាំពាក្យគណបក្សប្រជាជនថ្លែងថា ការប្រកាសគាំទ្រនេះគ្រាន់តែជាសិទ្ធិបញ្ចេញមតិប៉ុណ្ណោះ។
គណបក្សខ្មែរតែមួយដែលមានបងប្រុសលោក កែម ឡី គឺលោក កែម រិទ្ធីសិដ្ឋ ជាប្រធានដែលទើបតែត្រូវបានក្រសួងមហាផ្ទៃទទួលស្គាល់ជាផ្លូវការកាលពីថ្ងៃអង្គារបានប្រកាសជាសារមួយគាំទ្រចលនាសង្គ្រោះជាតិរបស់លោក សម រង្ស៊ី ដែលរដ្ឋាភិបាលចាត់ទុកថាជាចលនាឧទ្ទាម និងខុសច្បាប់។ ប៉ុន្តែគណបក្សដែលកាលពីដំបូងបានដាក់ឈ្មោះថា គណបក្ស «កែមឡី» មួយនេះបានការពារខ្លួនថា វាជាសារអំពាវនាវដើម្បីឲ្យមាន «ការរួបរួមជាតិ» ប៉ុណ្ណោះ។
នៅក្នុងលិខិតសរសេរទៅកាន់លោក សម រង្ស៊ី និងលោកស្រី មូរ សុខហួរ កាលពីថ្ងៃទី ២៧ មីនានេះលោក គុជ លី អនុប្រធានគណបក្ស និងជាអ្នកនាំពាក្យបានសរសេរថា៖ «ដើម្បីផលប្រយោជន៍ជាតិខ្មែរ និងប្រជាជាតិខ្មែរ ខ្ញុំ គុជ លី តំណាងឲ្យគណបក្សខ្មែរតែមួយសូមប្រកាសគាំទ្រ និងចូលរួមធ្វើសកម្ម (ភាព) ជាមួយចលនាសង្គ្រោះជាតិ ដឹកនាំដោយលោកប្រធាន សម រង្ស៊ី »។
កាលពីថ្ងៃទី ២៧ ខែមីនាក្រសួងមហាផ្ទៃបានចុះបញ្ជីគណបក្សនេះ ហើយក្នុងលិខិតប្រកាសស្តីពីការចុះឈ្មោះក្នុងបញ្ជីគណបក្សនយោបាយ ចុះហត្ថលេខាដោយលោក ស ខេង រដ្ឋមន្ត្រីក្រសួងមហាផ្ទៃបានណែនាំឲ្យគណបក្សខ្មែរតែមួយ «ត្រូវធ្វើសកម្មភាពស្របទៅតាមច្បាប់ស្តីពីគណបក្សនយោបាយ លិខិតបទដ្ឋានគតិយុត្តនានាជាធរមាន និងលក្ខន្តិកៈរបស់គណបក្សដែលបានតម្កល់ទុកនៅក្រសួងមហាផ្ទៃ»។
ស្របជាមួយការប្រកាសគាំទ្រនេះលោក គុជ លី ក៏បានអំពាវនាវឲ្យអ្នកគាំទ្រគណបក្សសង្គ្រោះជាតិចូលរួមជាមួយលោកដើម្បីទាមទារសិទ្ធិសេរីភាពជូនលោក សម រង្ស៊ី និង លោក កឹម សុខា ដែលតុលាការ និងរដ្ឋាភិបាលកំពុងចោទប្រកាន់ពីបទ «ក្បត់ជាតិ» ផ្តល់សិទ្ធិសេរីភាពឲ្យលោក មាជ សុវណ្ណារ៉ា និងអ្នកទោសមនសិការផ្សេងទៀតដែលកំពុងជាប់ឃុំក្នុងពន្ធនាគារ។
លោក លី ថ្លែងប្រាប់ភ្នំពេញប៉ុស្តិ៍ពីម្សិលមិញថា លោកមិនបារម្ភអំពីចំណាត់ការរបស់ក្រសួងមហាផ្ទៃមកលើគណបក្សរបស់លោកទេ ហើយថា សាររបស់លោក គឺចង់ឲ្យមានការរួបរួមជាតិតែប៉ុណ្ណោះ។
លោក ថ្លែងថា លោកប្រកាសគាំទ្រចលនានេះដោយសារតែ «ខ្ញុំនៅតែការពារថា ខ្ញុំអត់ខុសបើខ្ញុំអំពាវនាវឲ្យប្រជាជនបះបោរប្រឆាំងជាមួយរដ្ឋាភិបាលអាហ្នឹងខ្ញុំខុស។ មិនមានន័យថា ចលនារបស់គាត់ជាចលនាអាក្រក់ទាំងអស់ឯណា!...តែសាររបស់យើងគឺរួបរួមជាតិ អ៊ីចឹងដោះលែង»។
លោកបន្តថា៖ «រាជរដ្ឋាភិបាល បើសិនលោកចោទប្រកាន់គណបក្សខ្មែរតែមួយមានន័យថាថ្នាក់ដឹកនាំរបស់ក្រសួងប្រហែលគាត់អត់យល់ពីច្បាប់ទេ»។
លោក ប្រាក់ សំអឿន អគ្គនាយករងនៃអគ្គនាយកដ្ឋានរដ្ឋបាល ក្រសួងមហាផ្ទៃថ្លែងថា លោកមិនទាន់បានឃើញលិខិតរបស់លោក គុជ លី នៅឡើយបានត្រឹមតែឮតាមព័ត៌មាន។
ចំណែកលោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថា អ្វីដែលលោក លី និយាយ គ្រាន់តែជាសិទ្ធិរបស់លោកតែប៉ុណ្ណោះ។ «ខ្ញុំយល់ថា ជាសិទ្ធិទេ ហើយគាត់និយាយមិនទាន់មានពិរុទ្ធភាពទេ។ បើសិនណាគាត់និយាយហើយ គាត់ទៅធ្វើសកម្មភាព អាហ្នឹងវាចូលរឿង វាប្រឈមចំពោះមុខច្បាប់ ពីព្រោះយើងដឹងហើយថា ចលនាសង្គ្រោះជាតិជាចលនាខុសច្បាប់ ដែលយើងហៅថា ឧទ្ទាមនិយមក្រៅច្បាប់។ បើគ្រាន់តែប្រកាសមិនទាន់មានទង្វើជាក់ស្តែងអាហ្នឹងមិនទាន់អីទេ តែជាមូលដ្ឋានសម្រាប់សមត្ថកិច្ចតាមដានសកម្មភាព»។
យ៉ាងណាក្តីអ្នកប្រើប្រាស់បណ្ដាញហ្វេសប៊ុកយល់ឃើញថា ការប្រកាសគាំទ្រចលនាសង្គ្រោះជាតិនេះគ្រាន់តែជាល្បិចរបស់គណបក្សដែលទើបបង្កើតថ្មីនេះតែប៉ុណ្ណោះ។ នៅលើទំព័រហ្វេសប៊ុករបស់ភ្នំពេញប៉ុស្តិ៍ អ្នកលេងហ្វេសប៊ុកម្នាក់ដែលដាក់ឈ្មោះថា Moses Prak សរសេរថា៖ «(នេះ) ល្បិចបំបែកសំឡេងគាំទ្រ (សង្គ្រោះជាតិ) ដោយដើរតួជាអ្នកគាំទ្រ (សង្គ្រោះជាតិ) ព្រោះចង់ឲ្យអ្នកគាំទ្រទុកចិត្តចូលរួម និងមានវត្តមានក្នុងការបោះឆ្នោត ប្រយោជន៍ឲ្យ គ.ជ.ប ប្រកាសថា មានអ្នកចូលរួមបោះឆ្នោតលើសពី ៥០% ។ សូមបងប្អូនកុំចាញ់ល្បិចកលគេ ហើយរក្សាជំហរដើមយើងវិញ»។
ចំណែកអ្នកប្រើប្រាស់ហ្វេសប៊ុកម្នាក់ទៀតដែលមានឈ្មោះ Sot Saborn បានសរសេរថា៖ «ខ្ញុំមិនមែនអ្នកវិភាគនយោបាយ តែខ្ញុំក៏អាចមើលធ្លុះបានដែរ គឺចង់ទាញអ្នកគាំទ្រ CNRP និងលួងចិត្តអ្នកគាំទ្រ CNRP មុនបោះឆ្នោតឲ្យបែកសំឡេង»។
កាលពីថ្ងៃអង្គារស្របពេលដែលមានអ្នកគាំទ្រលោក កឹម សុខា រាប់សិបនាក់បានមកឃ្លាំមើលសវនាការបណ្ដឹងសារទុក្ខសុំនៅក្រៅឃុំ នៅសាលាឧទ្ធរណ៍លោក ជួន សុវណ្ណ ស្នងការរាជធានីបានដាក់បទបញ្ជាទៅអាជ្ញាធរ និងសមត្ថកិច្ច គ្រប់ខណ្ឌទាំង ១២ ឲ្យធ្វើការឃ្លាំមើលសកម្មភាពប្រឆាំងណាមួយ ដែលអាចកើតមាននៅមុនការបោះឆ្នោតជាតិខែកក្កដាខាងមុខនេះ។
លោក សុវណ្ណ ត្រូវបានស្រង់សម្តីដោយវេបសាយអគ្គស្នងការនគរបាលជាតិដោយលោកថ្លែងថា៖ «យើងជាអ្នកចូលរួមអនុវត្តផ្ទាល់ក្នុងការទប់ស្កាត់បដិវត្តន៍ពណ៌ ការទប់ស្កាត់ចលនាអសន្តិសុខសង្គមដែលក្រុមគណបក្សប្រឆាំងចង់ធ្វើ ហើយត្រូវទប់ស្កាត់ឲ្យបានរាល់ចលនាណាមួយដែលក្រុមនេះប៉ុនប៉ងចង់ធ្វើ»៕