ភ្នំពេញៈមន្រ្តីគណបក្សប្រឆាំងច្រើនជាង ១០ នាក់ បានចោទប្រកាន់ថៃថា បានលើកទឹកចិត្តដល់ការសម្លាប់ប្រជាពលរដ្ឋខ្មែរក្រៅប្រព័ន្ធតុលាការ នៅតាមបណ្តោយព្រំដែន។
ក្នុងលិខិតប្រើពាក្យខ្លាំងៗមួយ ដែលផ្ញើជូនលោក Prayuth Chan-ocha នាយករដ្ឋមន្រ្តីថៃ កាលពីថ្ងៃទី ៩ ខែកុម្ភៈ តំណាងរាស្ត្រគណបក្សសង្គ្រោះជាតិ បានស្នើឲ្យមានការស៊ើបអង្កេតឯករាជ្យលើហេតុការណ៍ កាលពីដើមខែ មករា ដែលពលរដ្ឋពីរនាក់ ឆ្លងព្រំដែនពីខេត្តបាត់ដំបងត្រូវទាហានថៃដុតសម្លាប់ទាំងរស់។
ពួកគេសរសេរថា៖ «រដ្ឋាភិបាលរបស់អ្នកបានបដិសេធសញ្ជាតិរបស់សាកសព បើទោះបីជាឪពុកម្តាយរបស់បុរសវ័យក្មេងទាំង ២ នាក់ បានអះអាងថា សាកសពគឺជាកូនប្រុសរបស់ពួកគេក៏ដោយ»។
តំណាងរាស្រ្តដែលរួមបញ្ចូលទាំងលោក កឹម សុខា អនុប្រធានគណបក្សសង្គ្រោះជាតិ ក៏បានថ្កោលទោស«ការសម្លាប់ដ៏ព្រៃផ្សៃ» លើអ្នកស្រី ផន ចឹម អាយុ ៥៥ ឆ្នាំ នៅថ្ងៃទី៩ ខែធ្នូ បន្ទាប់ពីអ្នកស្រីបានឆ្លងដែនទៅរកចំណីអាហារ។
ពួកគេឲ្យដឹងទៀតថា ពលរដ្ឋកម្ពុជាជាង ១០០នាក់ ត្រូវបានសម្លាប់ដោយ «ភ្នាក់ងាររដ្ឋ» របស់ថៃនាប៉ុន្មានឆ្នាំនេះ។ អ្នកកាប់ឈើខុសច្បាប់ ៣ នាក់ផ្សេងទៀត ត្រូវបានគេបាញ់សម្លាប់ កាលពីសប្តាហ៍មុន។
ក្រុមតំណាងរាស្រ្តគណបក្សប្រឆាំងបន្ថែមថា៖ «ការខកខានរបស់រដ្ឋថៃ ក្នុងការចាត់វិធានការផ្លូវច្បាប់ លើអ្នកទាំងឡាយ ដែលទទួលខុសត្រូវ លើការសម្លាប់ក្រៅប្រព័ន្ធតុលាការទាំងនេះ គឺស្មើនឹងការលើកទឹកចិត្តឲ្យមានការសម្លាប់ក្រៅប្រព័ន្ធតុលាការទាំងនោះ»។
អ្នកនាំពាក្យស្ថានទូតថៃ មិនអាចទាក់ទងសុំអធិប្បាយបានទេ។ ប៉ុន្តែលោក កុយ គួង អ្នកនាំពាក្យក្រសួងការបរទេសថ្លែងថាបក្សប្រឆាំងមានសិទិ្ធសរសេរលិខិត ប៉ុន្តែ លោកបានសង្កត់ធ្ងន់ថា រដ្ឋាភិបាលតែងតែផ្ញើលិខិតតវ៉ា ប្រើពាក្យខ្លាំងៗទៅថៃបន្ទាប់ពីប្រជាជនកម្ពុជា ត្រូវគេបាញ់សម្លាប់នៅព្រំដែន។
លោក មួង រិទិ្ធយ៉ា មន្រ្តីក្នុងអង្គភាពស្រាវជ្រាវ នៅកងរាជអាវុធហត្ថស្រុកសំពៅលូន ថ្លែងថា៖«[ភាគីថៃ] មិនទទួលស្គាល់សាកសពជាខ្មែរទេ»។
លោក Paul Chambers នៃវិទ្យាស្ថានកិច្ចការអាស៊ីអាគេ្នយ៍ នៅឈៀងម៉ៃ បានថ្លែងថា ខ្លឹមសារក្នុងលិខិតគណបក្សប្រឆាំងនឹង«ធ្វើឲ្យរំខាន» ដល់របបលោក Prayuth។
លោកឲ្យដឹងតាមអ៊ីមែលថា៖ «ប្រសិនបើបក្សប្រឆាំងឡើងកាន់អំណាចក្នុងការបោះឆ្នោតលើកក្រោយទំនាក់ទំនង កម្ពុជា-ថៃ ដែលបានល្អប្រសើរនឹងធ្លាក់ចុះជ្រៅ»៕ TK/រាយការណ៍បន្ថែមដោយ មាស សុខជា
