The Phnom Penh Post Search

Search form




Logo of Phnom Penh Post newspaper Phnom Penh Post - បក្ស​ប្រឆាំង​ប្តឹង​ឲ្យ​លុប​ឈ្មោះ ​វៀតណាម​ ពី​បញ្ជី​បោះឆ្នោត




បក្ស​ប្រឆាំង​ប្តឹង​ឲ្យ​លុប​ឈ្មោះ ​វៀតណាម​ ពី​បញ្ជី​បោះឆ្នោត

Content image - Phnom Penh Post
ប្រជាពលរដ្ឋ​កំពុង​ពិនិត្យ​បញ្ជី​ឈ្មោះ​បោះឆ្នោត​នៅ​សង្កាត់​ទន្លេ​បាសាក់​ពី​ថ្ងៃ​អង្គារ​​។ ផា លីណា

បក្ស​ប្រឆាំង​ប្តឹង​ឲ្យ​លុប​ឈ្មោះ ​វៀតណាម​ ពី​បញ្ជី​បោះឆ្នោត

ភ្នំពេញៈ គណបក្ស​ប្រឆាំង​បាន​រកឃើញ​ជនបរទេស​ជាង​ ៣០០០ នាក់​​ភាគច្រើន​បំផុត​ជា​ជនជាតិ​វៀតណាម​ដែល​មិន​មាន​លក្ខខណ្ឌ​គ្រប់គ្រាន់​​ដើម្បី​បោះឆ្នោត​ប៉ុន្តែ​ពួកគេ​​ត្រូវ​បាន​អនុញ្ញាត​ឲ្យ​​​ចុះ​ឈ្មោះ​បោះឆ្នោត​ហើយ​​បាន​និង​កំពុង​​ដាក់​ពាក្យ​បណ្តឹង​​ដើម្បី​លុប​ឈ្មោះ​ទាំង​នោះ​​ចេញ​ពី​បញ្ជី​​អ្នក​បោះឆ្នោត​។

លោក ម៉ាន់ ផល្លា ប្រធាន​ប្រតិបត្តិ​នៃ​គណបក្ស​សង្គ្រោះ​ជាតិ​​​រាជធានី​ភ្នំពេញ​បាន​​​ឲ្យ​ដឹង​កាលពី​ម្សិលមិញ​​ថា​មាន​ជនបរទេស​ចំនួន​​ ៣០២៥​ នាក់​រួមមាន​ជនជាតិ​វៀតណាម​ចំនួន​ ៣០២២ ​​នាក់​ជនជាតិ​ថៃ ២ ​នាក់ និង​ចិន​ ១ ​នាក់​ដែល​កាន់​អត្តសញ្ញាណប័ណ្ណ​កម្ពុជា​​ ប៉ុន្តែ​ពួកគេ​មិន​​ត្រូវ​បាន​ទទួល​ស្គាល់​ស្រប​ច្បាប់​ដោយ​ព្រះរាជក្រឹត្យ​​​​របស់​ព្រះមហាក្សត្រ​​​​នោះ​ទេ​បើ​ទោះបី​ឈ្មោះ​របស់​​ពួកគេ​​ត្រូវ​បាន​ទទួល​ស្គាល់​ដោយ​អាជ្ញាធរ​ដើម្បី​ឲ្យ​ពួកគេ​អាច​បោះឆ្នោត​បាន​ក៏ដោយ​។

លោក ផល្លា ថ្លែង​ថា​៖ ​«​​ទី​មួយ​គាត់​និយាយ​ភាសា​ខ្មែរ​​មិន​ច្បាស់​គាត់​ជា​ជនជាតិ​វៀតណាម​។ ​ដូច្នេះ​តាម​ច្បាប់​ជន​​​ណា​​ដែល​អាច​​មាន​សិទ្ធិ​​ចុះ​ឈ្មោះ​បោះឆ្នោត​​ និង​អាច​បោះឆ្នោត​​បាន​លុះត្រាតែ​គាត់​ត្រូវ​បាន​​ធ្វើ​ឲ្យ​ក្លាយ​ជា​សញ្ជាតិ​ខ្មែរ​​​ស្រប​ទៅ​តាម​​ច្បាប់​»។ ​

លោក​​បន្ថែម​ថា ​ជនបរទេស​ទាំង​នោះ​​មិន​មាន​ការ​ទទួល​ស្គាល់​ណា​មួយ​ដែល​បញ្ជាក់​ថា​ពួកគេ​ជា​ខ្មែរ​​​ទេ​បើ​ទោះបី​ជា​​ពួកគេ​កំពុង​កាន់​អត្តសញ្ញាណប័ណ្ណ​​​កម្ពុជា​​ក៏ដោយ​ដែល​នេះ​ជា​មូលហេតុ​ដែល​គណបក្ស​សង្គ្រោះ​ជាតិ​ដាក់​ពាក្យ​បណ្តឹង​​​ប្រឆាំង​នឹង​ឈ្មោះ​ជនបរទេស​ទាំង​នោះ។

បើ​តាម​ លោក ផល្លា គណបក្ស​សង្គ្រោះ​ជាតិ​បាន​ចាប់ផ្តើម​ដាក់​ពាក្យ​បណ្តឹង​​​ទៅ​ក្រុម​ប្រឹក្សា​ឃុំ​សង្កាត់​​​កាលពី​​ថ្ងៃ​អង្គារ​ហើយ​​ប្រសិន​​ឃុំ​សង្កាត់​មិន​អាច​ដោះស្រាយ​បញ្ហា​នេះ​បាន​គណបក្ស​នឹង​ដាក់​ពាក្យ​បណ្តឹង​​​ទៅ​​គណៈកម្មាធិការ​ជាតិ​រៀបចំ​ការ​​បោះឆ្នោត​ (គ.ជ.ប.)។

លោក​បន្ថែម​ថា ​លោក​បាន​ជំរុញ​ឲ្យ​សមាជិក​​របស់​លោក​បញ្ចប់​​ការ​ដាក់​ពាក្យ​​បណ្តឹង​​ក្នុង​សប្តាហ៍​ទី​មួយ​​នៃ​​រយៈពេល​ ១១ ​ថ្ងៃ​​​បន្ទាប់ពី​ គ.ជ.ប. ប្រកាស​ឲ្យ​ប្រជាពលរដ្ឋ​​ពិនិត្យ​​ឈ្មោះ​​របស់​ខ្លួន​នៅ​ក្នុង​បញ្ជី​ឈ្មោះ​អ្នក​បោះឆ្នោត​។

អ្នក​នាំពាក្យ​ គ.ជ.ប. លោក ហង្ស ពុទ្ធា ថ្លែង​​ថា​ គ.ជ.ប. ស្វាគមន៍​​​​ការ​ដាក់​ពាក្យ​បណ្តឹង​​របស់​គណបក្ស​សង្គ្រោះ​ជាតិ​​ប្រឆាំង​​ជនបរទេស​ទាំង​នោះ​ប៉ុន្តែ​លោក​ថា​គណបក្ស​សង្គ្រោះ​​ជាតិ​​ត្រូវ​តែ​ជជែក​ជាមួយ​​អគ្គនាយកដ្ឋាន​​អត្តសញ្ញាណកម្ម​​​​នៃ​ក្រសួង​មហាផ្ទៃ​ដើម្បី​ស្វែងរក​​ការពិត​​នៃ​ការ​ចោទប្រកាន់​នេះ​។

លោក ហង្ស ពុទ្ធា បន្ត​ថា​៖ «​​គាត់​មាន​សិទ្ធិ​ដាក់​ពាក្យ​បណ្តឹង​ហើយ​ គ.ជ.ប ក៏​កំពុង​រង់ចាំ​​ទទួល​ពាក្យ​បណ្តឹង​​​នោះ​​ដែរ​ប៉ុន្តែ​លុះត្រា​តែ​មាន​ពាក្យ​បណ្តឹង​ទើប ​គ.ជ.ប ​ដោះស្រាយ​​​»។

​លោក​បន្ថែម​ថា​ គ.ជ.ប. ​នឹង​មិន​បកស្រាយ​ថា​ តើ​ជនបរទេស​​ទាំង​នោះ​ជា​​ខ្មែរ​ ឬ​អត់​នោះ​ទេ​ដោយ​ថ្លែង​ថា​យោង​តាម​ច្បាប់​ គ.ជ.ប.​គ្រាន់​តែ​និយាយ​ថា​ប្រសិន​បើ​នរណា​ម្នាក់​មាន​អត្តសញ្ញាណប័ណ្ណ​គាត់​អាច​ចុះ​ឈ្មោះ​​បោះឆ្នោត​បាន​។

លោក ម៉ៅ ច័ន្ទតារា អគ្គនាយក​នៃ​អគ្គនាយកដ្ឋាន​អត្តសញ្ញាណកម្ម​ថ្លែង​ថា​នរណា​ក៏ដោយ​ដែល​មាន​តែ​អត្តសញ្ញាណប័ណ្ណ​​គាត់​មិន​​ទាន់​ត្រូវ​បាន​ទទួល​ស្គាល់​ជា​ខ្មែរ​​ទេ ​ប៉ុន្តែ​លោក​ថា​ប្រសិន​បើ​គណបក្ស​សង្គ្រោះ​ជាតិ​គ្រាន់​តែ​ចោទ​ប្រកាន់​ដូច​នេះ​លោក​មិន​អាច​ធ្វើ​អត្ថាធិប្បាយ​បាន​ទេ​ហើយ​ជំរុញ​ឲ្យ​​គណបក្ស​សង្គ្រោះ​ជាតិ​បង្ហាញ​ភ័ស្តុតាង​​​នៅ​អគ្គនាយកដ្ឋាន​​អត្តសញ្ញាណកម្ម​។ ​

«​​តាម​ច្បាប់​របស់​យើង​អត្តសញ្ញាណប័ណ្ណ​មិន​អាច​ផ្តល់​ទៅ​ជនបរទេស​បាន​ទេ​។ ករណី​ទាំង​នេះ​ត្រូវ​តែ​យក​ទៅ​ដាក់​លើ​តុ​ពិនិត្យ​មើល​ទាំងអស់​គ្នា​»៕ PS

អត្ថបទគួរចាប់អារម្មណ៍