The Phnom Penh Post Search

Search form




Logo of Phnom Penh Post newspaper Phnom Penh Post - បក្ស​ប្រជាធិបតេយ្យ​ធ្វើ​សមាជ​ថ្នាក់​ឃុំ

បក្ស​ប្រជាធិបតេយ្យ​ធ្វើ​សមាជ​ថ្នាក់​ឃុំ

លោក យ៉េង វីរៈ (កណ្តាល) ​នៅក្នុង​សមាជ​នៅ​កំពង់ស្ពឺ​កាលពី​ម្សិលមិញ​។
លោក យ៉េង វីរៈ (កណ្តាល) ​នៅក្នុង​សមាជ​នៅ​កំពង់ស្ពឺ​កាលពី​ម្សិលមិញ​។ រូបថត ហ្វេសហ៊ុក

បក្ស​ប្រជាធិបតេយ្យ​ធ្វើ​សមាជ​ថ្នាក់​ឃុំ

កំពង់ស្ពឺៈ គណបក្ស​ប្រជាធិបតេយ្យ​មូលដ្ឋាន (គ.ប.ម) ដែល​មាន​អតីត​សកម្មជន​សិទ្ធិ​មនុស្ស​ជើង​ចាស់​ជា​ប្រធាន​គឺ​លោក​ យ៉េង វីរៈ កាលពី​ម្សិលមិញ​បាន​​ចុះ​ធ្វើ​សមាជ​ថ្នាក់​ឃុំ​ជា​លើក​ដំបូង​នៅ​ឃុំ​មហាសាំង ស្រុក​ភ្នំស្រួច​ដើម្បី​ជ្រើសរើស​ថ្នាក់​ដឹកនាំ​ប្រចាំ​ឃុំ និង​ពង្រឹង​មន្ត្រី​របស់​ខ្លួន​តាម​មូលដ្ឋាន។

អ្នក​នាំពាក្យ​គណបក្ស​លោក សាម អ៊ីន ប្រាប់ ​ភ្នំពេញ​ ប៉ុស្តិ៍ ​ថា ​គោលបំណង​សំខាន់​ក្នុង​ការ​ធ្វើ​សមាជ​ដើម្បី​អនុវត្ត​គោលការណ៍​ប្រជាធិបតេយ្យ​ផ្ទៃ​ក្នុង​បក្ស​ជាពិសេស​គឺ​ការ​បោះឆ្នោត​ជ្រើសរើស​ថ្នាក់​ដឹកនាំ​នៅ​មូលដ្ឋាន​ដែល​ជា​សមាជិក​ផ្ទាល់​រស់នៅ​ក្នុង​ឃុំ​នោះ។

លោក​បន្ត​ថា​កាលពី​ម្សិលមិញ​គណបក្ស​ក៏​បាន​បោះឆ្នោត​ជ្រើសរើស​ប្រធាន​គណៈកម្មាធិការ​ប្រតិបត្តិ ឃុំ ជ្រើសរើស​តំណាង​ស្ត្រី​តំណាង​យុវជន​ម្នាក់ និង​តំណាង​យុវតី​ម្នាក់​ផង​ដែរ។

លោក​បញ្ជាក់​ថា​ មូលហេតុ​ដែល​គណបក្ស​ចាំបាច់​ជ្រើស​មន្ត្រី​បក្ស​តំណាង ឃុំ ដើម្បី​បង្ហាញ​ពី​ការ​អនុវត្ត​លទ្ធិ​ប្រជាធិបតេយ្យ។​

លោក​ថា​៖ «ការ​អនុវត្ត​ប្រជាធិបតេយ្យ​ទាល់​តែ​ពួក​គាត់​មាន​សិទ្ធិ​អនុវត្ត​ផ្ទាល់​នៅ​តាម​មូលដ្ឋាន​ដើម្បី​ឱ្យ​គាត់​ចាប់ផ្តើម​គិត​ថា​គាត់​គឺ​មាន​សិទ្ធិ​ធ្វើ​សេចក្តី​សម្រេច​ជ្រើស​តំណាង​របស់​គាត់​ដែល​ពេញ​ចិត្ត​មិន​មាន​ការ​បង្ខិត​បង្ខំ»។

បើ​តាម​លោក សាម អ៊ីន​កន្លង​មក​គណបក្ស​បាន​ចុះ​បង្រៀន​ដល់​ប្រជាពលរដ្ឋ​ក៏​ដូចជា​អ្នក​គាំទ្រ​របស់​ខ្លួន​នៅ​តាម​មូលដ្ឋាន​ឱ្យ​ស្គាល់​លទ្ធិប្រជាធិបតេយ្យ​បាន​ចំនួន ១១៩ ឃុំ​ក្នុង​ខេត្ត​ចំនួន ១២ ។

លោក​ថា ​ក្នុង​នោះ​ដែរ​មាន ២០ ឃុំ​ដែល​មាន​លទ្ធភាព​ចងក្រង​ថ្នាក់​ដឹកនាំ​ឃុំ។

លោក​បញ្ជាក់​ថា​តាំង​ពី​បង្កើត​គណបក្ស​មក​មាន​សមាជិក​សកម្ម​ជាង ៥០០ នាក់​ដែល​បាន​ជួយ​វិភាគទាន​ជា​ថវិកា​សម្រាប់​ទ្រទ្រង់​បក្ស​​ក្នុង​មួយ​ខែ​ចាប់ពី​ ១០០០ ​រៀល ឬ​ ២០០០ រៀល​តាម​លទ្ធភាព​។ សមាជិក​ ៥០០ ​នាក់​នេះ​មិន​រាប់បញ្ចូល​អ្នក​គាំទ្រ​ដែល​មិន​ចេញ​មុខ​នោះ​ទេ។

លោក​ថា៖ «​នេះ​ជា​ការ​បង្រៀន​ថ្មី​ឱ្យ​ប្រជាពលរដ្ឋ​ចូលរួម​ធ្វើ​នយោបាយ​ហើយ​គាត់​មាន​ភាព​ជា​ម្ចាស់​ក្នុង​ការ​សម្រេច​កិច្ចការ​ផ្សេង»​។

គណបក្ស​ប្រជាធិបតេយ្យ​មូលដ្ឋាន​ដែល​ត្រូវ​បាន​បង្កើត​ឡើង​ដោយ​អតីត​ប្រធាន​អង្គការ​សង្គម​ស៊ីវិល​ អតីតមន្ត្រី​សិទ្ធិ​មនុស្ស និង​ក្រុម​បញ្ញវន្ត​ត្រូវ​បាន​ក្រសួង​មហាផ្ទៃ​ប្រកាស​ទទួល​ស្គាល់​ជា​ផ្លូវការ​កាលពី​ដើម​ខែ​សីហា​ឆ្នាំ ២០១៥​៕

អត្ថបទគួរចាប់អារម្មណ៍