The Phnom Penh Post Search

Search form




Logo of Phnom Penh Post newspaper Phnom Penh Post - បក្ស​ប្រជាធិបតេយ្យ​មូលដ្ឋាន​លើក​តម្កើង​លោក​ កែម ឡី

បក្ស​ប្រជាធិបតេយ្យ​មូលដ្ឋាន​លើក​តម្កើង​លោក​ កែម ឡី

(រាប់​ពី​ស្តាំ​) លោក​ យ៉េង វីរៈ លោក​ យ៉ង សាំងកុមារ លោក សាម អ៊ីន។
(រាប់​ពី​ស្តាំ​) លោក​ យ៉េង វីរៈ លោក​ យ៉ង សាំងកុមារ លោក សាម អ៊ីន។ រូបថត​ហ្វេសប៊ុក

បក្ស​ប្រជាធិបតេយ្យ​មូលដ្ឋាន​លើក​តម្កើង​លោក​ កែម ឡី

ភ្នំពេញៈ គណបក្ស​ប្រជាធិបតេយ្យ​មូលដ្ឋាន​ដែល​បាន​ធ្វើការ​ជិតស្និទ្ធ​ជាមួយ​លោក​បណ្ឌិត កែម ឡី គ្រោង​នឹង​ស្នើ​ទៅ​រដ្ឋាភិបាល​​ឲ្យ​យក​ថ្ងៃ​ទី ១០ កក្កដា ដែល​ជា​ថ្ងៃ​ខ្មាន់​កាំភ្លើង​បាញ់​សម្លាប់​អ្នក​វិភាគ​រូប​នេះ​ដាក់​បញ្ចូល​ទៅ​ជា​ថ្ងៃ​​ឈប់​សម្រាក​ទូទាំង​ប្រទេស​ដើម្បី​រំឭក​ដល់​វិញ្ញាណក្ខន្ធ និង​ចាត់​ទុក​ជា​ថ្ងៃ​ទិវា​ជាតិ​នៃ​សេរីភាព​បញ្ចេញ​មតិ។

ក្នុង​ពិធី​អបអរ​ខួប ១ ឆ្នាំ​នៃ​ការ​បង្កើត​គណបក្ស​កាលពី​ម្សិលមិញ​លោក យ៉េង វីរៈ​ ប្រធាន​គណបក្ស​​នេះ​ថ្លែង​ថា​ គណបក្ស​លោក​នឹង​ស្នើ​ទៅ​រដ្ឋាភិបាល​ឱ្យ​ពិចារណា​យក​ថ្ងៃ​បាញ់​សម្លាប់​លោក កែម ឡី ធ្វើ​ជា​ទិវា​ជាតិ​នៃ​ការ​បញ្ចេញមតិ​ដោយ​ចាត់​ទុក​ថា​បណ្ឌិត​រូប​​នេះ​បាន​បណ្តុះ​បណ្តាល​ឱ្យ​ពលរដ្ឋ​ខ្មែរ​បាន​យល់​ដឹង​ពី​សិទ្ធិ​របស់​ខ្លួន និង​ហ៊ាន​លះបង់​ជីវិត។

លោក​ថា៖ «​យើង​​នឹង​សុំ​ទៅ​រដ្ឋាភិបាល​ឱ្យ​ពិចារណា​យក​​ថ្ងៃ​ទី ១០ កក្កដា ជា​ទិវា​ជាតិ​នៃ​សេរីភាព​បញ្ចេញ​មតិ​ប្រសិន​បើ​​រដ្ឋាភិបាល​មិន​ទទួល​នៅ​ពេល​យើង​មាន​អំណាច​រដ្ឋ​យើង​នឹង​ប្រកាស​យក​ថ្ងៃ ១០ ​កក្កដា​ដើម្បី​សេរីភាព​បញ្ចេញ​មតិ​ព្រោះ​ប្រជាពលរដ្ឋ​ខ្មែរ​ជា​ច្រើន​បាន​ចាត់​ទុក​គាត់​ជា​វីរជន​នៃ​សេរីភាព​បញ្ចេញមតិ​ព្រោះ​គាត់​ហ៊ាន​និយាយ​ការពិត​»។

បើ​តាម​លោក យ៉េង វីរៈ សំណើ​នេះ​នឹង​ដាក់​ទៅ​រដ្ឋាភិបាល​ក្នុង​សប្តាហ៍​នេះ​ខណៈ​លោក​កំពុង​ពិភាក្សា និង​រៀបចំ​ឯកសារ។ គណបក្ស​នេះ​បាន​សន្យា​ថា​នឹង​បន្ត​បេសកកម្ម​របស់​លោក កែម ឡី ក្នុង​ការ​បណ្តុះ​គំនិត​បញ្ញវ័ន្ត​ខ្មែរ​ឱ្យ​ចេះ​ធ្វើការ​រួម​គ្នា។

អ្នក​នាំពាក្យ​ទីស្តីការ​គណៈរដ្ឋមន្ត្រី​លោក ផៃ ស៊ីផាន ថ្លែង​ថា ​ទោះបី​ជា​លោក កែម ឡី មាន​មនុស្ស​ជាច្រើន​ចូលចិត្ត​​គាត់​ក៏ដោយ​តែ​មិន​ទាន់​ដល់​ថ្នាក់​ចាត់​ទុក​គាត់​ជា​វីរបុរស​នោះ​ទេ។

លោក​ថា៖ «​ខ្ញុំ​​ជឿ​ថា​រឿង​ កែម ឡី ជា​រឿង​ឯកជន​សុទ្ធសាធ​ទោះបី​មាន​ការ​គោរព​លោក​មាន​ច្រើន​ប៉ុន្តែ​មិនមែន​ភាគ​ច្រើន​ទេ​ហើយ​​លោក​មិន​ទាន់​ក្លាយ​ជា​ឥស្សរជន​នៅ​ឡើយ​ទេ​ដូច្នេះ​មិន​មាន​អ្វី​ទេ​ក្នុង​ការ​ស្នើ​តែ​ខ្ញុំ​មើល​ទៅ​ដូច​ជា​មិន​សូវ​ជា​ទំនង​ច្រើន​ជាង​»​។

លោក​ថា៖ ​«​សូម្បី​តែ​សម្តេច​ ជា ស៊ីម បម្រើ​ជាតិ​មួយ​ជីវិត​របស់​គាត់​មិន​មែន​បម្រើ​តាម​បបូរមាត់​ទេ​បម្រើ​​ទាំង​សកម្មភាព​សមិទ្ធផល​សម្រេច​ផង​នៅ​តែ​មិន​ទទួល​បាន​ការ​ឈប់​សម្រាក​​ជា​សាធារណៈ​ដូច្នេះ​ការ​ឈប់​សម្រាក​ជា​សាធារណៈ​ភាគច្រើន​គេ​ឱ្យ​តម្លៃ​ជូន​ព្រះមហាក្សត្រ»។

លោក ស៊ីផាន ក៏​បាន​ចោទ​ជា​សំណួរ​ថា​ តើ​ កែម ឡី ទទួល​បាន​ងារ​ជា​ឥស្សរជន​ពី​ព្រះរាជក្រឹត្យ​ឬ​នៅ? គឺ​អត់​ទេ​គាត់​មិន​ចាត់​ទុក​ជា​ឥស្សរជន​ផ្លូវការ​នៅ​ឡើយ​ទេ​។

អគ្គលេខាធិការ​គណបក្ស​ប្រជាធិបតេយ្យ​មូលដ្ឋាន​លោក សាម អ៊ីន ​បាន​ថ្លែង​ថា៖ «​ក្រុម​ការងារ​តែង​ជួប​ពិគ្រោះ​យោបល់​ជាមួយ​លោក កែម ឡី នៅ​ហាង​កាហ្វេ​អ្វី​ដែល​បាន​ពិគ្រោះ​​យោបល់​ជាមួយ​គាត់​យើង​មិន​បាន​គិត​ថា​គាត់​ត្រូវ​បាន​គេ​បាញ់​ប្រហារ​ទេ​អ្វី​ដែល​យើង​ធ្លាប់​ពិគ្រោះ​យោបល់​ជាមួយ​គាត់​គឺ​ត្រឹម​គិត​ថា​គេ​អាច​ប្រើ​វិធីសាស្ត្រ​សម្រាប់​ចោទប្រកាន់​ហើយ​អាច​ឈាន​​ទៅ​ដល់​ការ​ចាប់​គាត់​ដាក់​គុក​ហើយ​យើង​មិន​គិត​ថា​គេ​ហ៊ាន​ដល់​ការ​បាញ់​សម្លាប់​ជីវិត​គាត់​ទេ»។

លោក​ក៏​បាន​ជំរុញ​​ឲ្យ​អាជ្ញាធរ​មាន​សមត្ថកិច្ច​បង្ហាញ​លទ្ធផល​នៃ​ការ​ស៊ើប​​អង្កេត​ ឬ​វីដេអូ​ផ្សេងៗ​ទាក់ទង​ព្រឹត្តិការណ៍​បាញ់​សម្លាប់​ឱ្យ​បាន​​ឆាប់​រហ័ស​ដើម្បី​ឱ្យ​សាធារណជន​បាន​ដឹង។

នាយក​ប្រតិបតិ្ត​អង្គការ​តម្លាភាព​កម្ពុជា​លោក ព្រាប កុល បាន​គាំទ្រ​ចំពោះ​ការ​ស្នើសុំ​របស់​គណបក្ស​នេះ​ដោយ​លោក​ក៏​មើល​ឃើញ​ថា​ប្រជាពលរដ្ឋ​ភាគច្រើន​គោរព​លោក កែម ឡី។

លោក​ថា៖ «ការ​ដែល​យើង​ទទួល​ស្គាល់​ថា​ជា​ថ្ងៃ​ឈប់​សម្រាក​ដើម្បី​រំឭក​ដល់​គាត់​ក៏ល្អ​ដែរ ដែល​អាច​ឱ្យ​ពលរដ្ឋ​ខ្មែរ​នឹក​ឃើញ​គាត់ និង​បុព្វហេតុ​ដែល​គាត់​បាន​ធ្វើ​សម្រាប់​ជាតិ​មាតុភូមិ និង​ដើម្បី​បង្ហាញ​ការ​ទទួល​ស្គាល់​ពី​ពលិកម្ម​របស់​គាត់​»។

អ្នក​ស្រាវជ្រាវ​ពី​ការ​អភិវឌ្ឍ​សង្គម និង​ជា​អ្នក​វិភាគ​នយោបាយ​លោក​បណ្ឌិត កែម ឡី​ ត្រូវ​បាន​ឃាតករ​បាញ់​សម្លាប់​​ទាំង​​កណ្តាល​ថ្ងៃ​នៅ​កណ្តាល​រាជធានី​ភ្នំពេញ​កាលពី​ថ្ងៃ​ទី ១០ កក្កដា ហើយ​សព​របស់​លោក​ត្រូវ​បាន​ដង្ហែ​យក​ទៅ​បញ្ចុះ​នៅ​ស្រុក​កំណើត​​របស់​លោក​ក្នុង​ស្រុក​ត្រាំកក់​ ខេត្ត​តាកែវ​ដែល​មាន​មនុស្ស​ចូលរួម​ប្រមាណ​ ២ ​លាន​នាក់។

តាម​សេចក្តី​រាយការណ៍​រហូត​មក​ដល់​ថ្ងៃ​ម្សិលមិញ​នៅ​តែ​មាន​ពលរដ្ឋ​ជា​ហូរហែ​​នៅ​តែ​បន្ត​ទៅ​អុជ​ធូប​គោរព​លោក​នៅ​កន្លែង​តម្កល់​សព​នៅ​ឡើយ​៕

អត្ថបទគួរចាប់អារម្មណ៍