The Phnom Penh Post Search

Search form




Logo of Phnom Penh Post newspaper Phnom Penh Post - បក្ស​អំណាច​ខ្មែរ​បង្វែរ​លុយ​ទៅ​សង់​ផ្ទះ​នៅ​ព្រំដែន

បក្ស​អំណាច​ខ្មែរ​បង្វែរ​លុយ​ទៅ​សង់​ផ្ទះ​នៅ​ព្រំដែន

លោក សួន សេរីរដ្ឋា ក្រោយ​ពេល​វិល​ត្រឡប់​ពី​ការ​និរទេស​ខ្លួន​នៅ​ក្រៅ​ប្រទេស​កន្លង​មក។
លោក សួន សេរីរដ្ឋា ក្រោយ​ពេល​វិល​ត្រឡប់​ពី​ការ​និរទេស​ខ្លួន​នៅ​ក្រៅ​ប្រទេស​កន្លង​មក។ ម៉ៃ វីរៈ

បក្ស​អំណាច​ខ្មែរ​បង្វែរ​លុយ​ទៅ​សង់​ផ្ទះ​នៅ​ព្រំដែន

ភ្នំពេញៈ គណបក្ស​អំណាច​ខ្មែរ​ដែល​ទើប​បង្កើត​ឡើង​ស្រប​ច្បាប់​នា​ពេល​ថ្មីៗ​កន្លង​មក​នេះ​បាន​ពន្យារពេល​ក្នុង​ការ​សាងសង់​ទីស្នាក់ការ​របស់​ខ្លួន​ហើយ​ផ្ទុយ​ទៅ​វិញ​​យក​​ប្រាក់​នោះ​ទៅ​សាងសង់​ផ្ទះ​​​នៅ​ជិត​ព្រំដែន​​វៀតណាម​។ នេះ​បើ​តាម​​លោក សួន សេរីរដ្ឋា មេដឹកនាំ​​គណបក្ស​អំណាច​ខ្មែរ​ដែល​បាន​ថ្លែង​ឲ្យ​ដឹង​កាលពី​ម្សិលមិញ​។

លោក សួន សេរីរដ្ឋា ដែល​បាន​ត្រឡប់​មក​ពី​ការ​និរទេស​ខ្លួនឯង​កាលពី​ខែ​មុន​បន្ទាប់​ពី​ត្រូវ​បាន​លើក​លែង​ទោស​ចំពោះ​​បទល្មើស​ដែល​ត្រូវ​បាន​គេ​រិះគន់​ថា​ពាក់ព័ន្ធ​នឹង​​សកម្មភាព​នយោបាយ​របស់​គាត់​បាន​ថ្លែង​ថា​លោក​បាន​សម្រេច​ចិត្ត​ពន្យារ​ពេល​សាងសង់​ទីស្នាក់ការ​គណបក្ស​ពី​ព្រោះ «​អាទិភាព​ឥឡូវ​នេះ​គឺ​ត្រូវ​សាងសង់​ផ្ទះ​សម្រាប់​ប្រជាជន​ខ្មែរ​​ក្រីក្រ​ដែល​​​តស៊ូ​រស់​នៅ​យ៉ាង​លំបាក​នៅ​តាម​បន្ទាត់​ព្រំដែន​»​។

លោក សេរីរដ្ឋា បាន​ថ្លែង​ថា​គណបក្ស​អំណាច​ខ្មែរ​ដែល​ជា​គណបក្ស​ជាតិ​និយម​​កំពុង​មាន​គោលបំណង​សាងសង់​ផ្ទះ​ចំនួន​ ១០០ ​ខ្នង​​នៅ​តាម​តំបន់​ជនបទ​ដែល​លោក​អះអាង​ថា​បច្ចុប្បន្ន​មាន​ជនជាតិ​វៀតណាម​ខុស​ច្បាប់​ច្រើន​។

លោក​បាន​បន្ថែម​ថា​គម្រោង​នេះ​នឹង​ចាប់ផ្ដើម​នៅ​ភូមិ ប៉ាក់ណាម​ ខេត្ត​កណ្តាល​ជា​កន្លែង​ដែល​លោក​និយាយ​ថា​មាន​គ្រួសារ​កម្ពុជា​តិចតួច​ប៉ុណ្ណោះ​​កំពុង​រស់នៅ​បច្ចុប្បន្ន​ហើយ​លោក​ទទូច​ថា​គម្រោង​នេះ​​​មិនមែន​សំដៅ​តែ​ទៅ​លើ​អ្នក​គាំទ្រ​គណបក្ស​អំណាច​ខ្មែរ​ទេ​ប៉ុន្តែ​គឺ​ទៅ​លើ​ប្រជាជន​ទាំងអស់​ដែល​កំពុង​រស់នៅ​តាម​តំបន់​ខ្សែ​បន្ទាត់​ព្រំដែន​។

ក្នុង​រយៈកាល​កន្លង​មក​ភាព​តានតឹង​នៅ​តាម​ព្រំដែន​រវាង​​ប្រទេស​កម្ពុជា​ និង​វៀតណាម​ត្រូវ​បាន​បញ្ឆេះ​ហើយ​​ភាគី​ទាំង​ពីរ​បាន​អះអាង​ពី​ភាព​ធ្វើ​ជា​កម្មសិទ្ធិ​រៀងៗ​ខ្លួន​លើ​ដី​​ដែល​មាន​ជម្លោះ​អស់​​រយៈពេល​ជា​យូរ​មក​ហើយ​នោះ​។

លោក សេរីរដ្ឋា បាន​ថ្លែង​ឲ្យ​ដឹង​បន្ថែម​ទៀត​​ថា​ផ្ទះ​ទាំង​នោះ​​​នឹង​ត្រូវ​សាងសង់​លើ​ដី​កម្ពុជា​ប៉ុន្តែ​លោក​បន្ថែម​ថា​គណបក្ស​អំណាច​ខ្មែរ​​នឹង​យក​បញ្ហា​ជម្លោះ​​​នោះ​ជា​សំខាន់​សម្រាប់​អាទិភាព​នៃ​គោលនយោបាយ​របស់​ខ្លួន។

លោក​បាន​បន្ថែម​ថា​៖ «​រហូត​មក​ទល់​ពេល​នេះ​មាន​តែ​អ្នក​នយោបាយ​ និង​គណបក្ស​នយោបាយ​ប៉ុណ្ណោះ​យក​ចំណេញ​លើ​បញ្ហា​ព្រំដែន​ ប៉ុន្តែ ...​មិន​បាន​គិតគូរ​អំពី​​ជីវភាព​របស់​ប្រជាជន​ខ្មែរ» ដែល​រស់នៅ​ទី​នោះ​ទេ។

លោក គល់ បញ្ញា នាយក​ប្រតិបត្តិ​នៃ​គណៈកម្មាធិការ​សម្រាប់​ការ​បោះឆ្នោត​ដោយ​សេរី​ និង​យុត្តិធម៌​​ក្នុង​ប្រទេស​កម្ពុជា​បាន​ថ្លែង​ថា​គម្រោង​សាងសង់​ផ្ទះ​​តម្លៃ​​ ២០០០ ​ដុល្លារ​ដែល​នឹង​មាន​ឡូហ្គោ​របស់​គណបក្ស​អំណាច​ខ្មែរ​គ្មាន​អ្វី​ចម្លែក​ទេ​នៅក្នុង​នយោបាយ​របស់​កម្ពុជា​។

លោក​ថ្លែង​ថា​៖ «​​អ្នក​នយោបាយ​តែង​ធ្វើ​ដូច​នេះ​ជា​ច្រើន​មក​ហើយ។ គណបក្ស​កាន់​អំណាច​​តែងតែ​សាងសង់​សាលា​​ និង​ផ្ទះ​ជាដើម»៕ PS

អត្ថបទគួរចាប់អារម្មណ៍