The Phnom Penh Post Search

Search form

Logo of Phnom Penh Post newspaper Phnom Penh Post - បក្ស​ប្រឆាំង​និង​សហជីព​ជំរុញ​ឲ្យ​កម្មករ​រួម​គ្នា​ទាមទារ​ប្រាក់​ឈ្នួល​ឲ្យ​បាន $ ១៦០

បក្ស​ប្រឆាំង​និង​សហជីព​ជំរុញ​ឲ្យ​កម្មករ​រួម​គ្នា​ទាមទារ​ប្រាក់​ឈ្នួល​ឲ្យ​បាន $ ១៦០

បក្ស​ប្រឆាំង​និង​សហជីព​ជំរុញ​ឲ្យ​កម្មករ​រួម​គ្នា​ទាមទារ​ប្រាក់​ឈ្នួល​ឲ្យ​បាន $ ១៦០

131224_01
កម្មករ-កម្មការិនី រាប់រយនាក់នៅខេត្តស្វាយរៀង សម្ដែងនូវក្ដីរីករាយ កាលពីម្សិលមិញ ខណៈលោកសម រង្ស៊ីអំពាវនាវឲ្យពួកគេបន្តតវ៉ាទាមទារដំឡើងប្រាក់ឈ្នួលរហូតដល់$១៦០ សហការី

ស្វាយរៀងៈ ប្រធាន​គណបក្ស​សង្គ្រោះ​ជាតិ និង​សហភាព​សហជីព​កម្ពុជា កាល​ពី​ថ្ងៃ​ម្សិលមិញ បាន​ធ្វើ​ការ​អំពាវនាវ​ដល់​កម្មករ​នៅ​ខេត្ត ស្វាយរៀង និង​នៅ​ទូទាំង​ប្រទេស ឲ្យ​បន្ត​ធ្វើ​ការ​តវ៉ា និង​ត្រៀម​ធ្វើ​ការ​តវ៉ា ដើម្បី​ទាមទារ​ការ​ដំឡើង​ប្រាក់​ឈ្នួល​ឲ្យ​បាន​ដល់ ១៦០ ដុល្លារ ក្នុង​មួយ​ខែ ខណៈ​ដែល​រដ្ឋាភិបាល តំណាង​រោងចក្រ និង​សហជីព នឹង​ជួប​ប្រជុំ​គ្នា​នៅ​ថ្ងៃ​អង្គារ​នេះ ដើម្បី​ធ្វើ​ការ​ពិភាក្សា​គ្នា​ពី​ការ​ដំឡើង​ប្រាក់​ឈ្នួល​ដល់​កម្មករ។

លោក សម រង្ស៊ី ប្រធាន​គណបក្ស​សង្គ្រោះ​ជាតិ ដែល​គណបក្ស​នេះ កំពុង​តែ​ធ្វើ​បាតុកម្ម ទាមទារ​ឲ្យ​លោក​នាយក​រដ្ឋ​មន្ត្រី ហ៊ុន សែន ចុះ​ចេញ​ពី​តំណែង និង​ធ្វើ​ការ​បោះឆ្នោត​ឡើង​វិញ កាល​ពី​ព្រឹក​ម្សិលមិញ បាន​ទៅ​ជួប​កម្មករ ដែល​កំពុង​ធ្វើ​ការ​តវ៉ា​ទាមទារ​ដំឡើង​ប្រាក់​ឈ្នួល នៅ​ក្រុង បាវិត ខេត្ត ស្វាយរៀង ដោយ​បាន​ជំរុញ​ឲ្យ​កម្មករ​រួម​គ្នា​បន្ត​ធ្វើ​ការ​តវ៉ា។

លោក រង្ស៊ី បាន​ថ្លែង​ទៅ​កាន់​កម្មករ​រាប់​រយ​នាក់ នៅ​តំបន់​សេដ្ឋកិច្ច​ពិសេស Manhattan និង Tai Seng ព្រម​ទាំង​នៅ​តាម​បណ្តា​រោងចក្រ​ជាច្រើន​ទៀត​នៅ​ខេត្ត ស្វាយរៀង ថា៖ «កម្មករ​គ្រប់​រោងចក្រ បាន​ម្រេច​ចិត្ត​ឈប់​ធ្វើ​ការ និង​បន្ត​ការ​តវ៉ា​ទាំង​អស់​គ្នា។ ដូច្នេះ​ចាប់​ពី​រសៀល​ថ្ងៃ​នេះ និង​ព្រឹក​ថ្ងៃ​ស្អែក យើង​នឹង​ប្រមូល​ផ្តុំ​គ្នា ហើយ​នឹង​មិន​ត្រឡប់​ទៅ​ធ្វើការ​វិញ​ទេ។ យើង​នឹង​តវ៉ា​ទូទាំង​ប្រទេស ដើម្បី​ទាមទារ​ការ​ដំឡើង​ប្រាក់​ឈ្នួល»។

លោក សម រង្ស៊ី បាន​បញ្ជាក់​ទៀត​ថា​លោក​ដែល​ជា​ប្រធាន​គណបក្ស​សង្គ្រោះ​ជាតិ តែង​តែ​ជួយ​កម្មករ​ទូទាំង​ប្រទេស ហើយ​និង​នៅ​តែ​បន្ត​ធ្វើ​ការ​ទាមទារ​ឲ្យ​កម្មករ ទទួល​បាន​ប្រាក់​ឈ្នួល​គោល​យ៉ាង​តិច ១៦០ ដុល្លារ​ក្នុង​មួយ​ខែ​។ «សូម​កម្មករ​ទាំង​អស់​ឈប់​ធ្វើ​ការ ហើយ​រង់ចាំ​រហូត​ទាល់​តែ​ទទួល​បាន​ប្រាក់​ឈ្នួល ១៦០ ដុល្លារ​ចាំ​ត្រឡប់​ទៅ​ធ្វើ​ការ​វិញ»។ មេ​បក្ស​ប្រឆាំង​រូប​នេះ​បាន​ថ្លែង​ទៀត​ថា៖ «ថៅកែ និង​អាជ្ញាធរ​រដ្ឋាភិបាល ដែល​និយាយ​ថា ពួក​គេ​យល់​ព្រម​ដំឡើង​ប្រាក់​ឈ្នួល ១៦០ ដុល្លារ​នៅ​ឆ្នាំ ២០១៨ វា​ជា​រឿង​ឆ្កួត​មែន​ទេ? ៥ ឆ្នាំ​ទៀត ដូច្នេះ​យើង​នឹង​ដាច់​ពោះ​ស្លាប់​ទំរាំ​ដល់​ពេល​នោះ»។

លោក សម រង្ស៊ី បន្ត​ថា លោក​នឹង​ជួយ​ការពារ និង​គាំទ្រ​កម្មករ​រហូត​ទទួល​បាន​ជោគជ័យ ក្នុង​ការ​ទាមទារ​ដំឡើង​ប្រាក់​ឈ្នួល។ លោក​បាន​គូស​បញ្ជាក់​ថា៖ «ប្រាក់​ឈ្នួល​កម្មករ​សព្វ​ថ្ងៃ​នេះ មិន​អាច​រស់​បាន​ស្រួល​ទេ»។

លោក​ស្រី យ៉ាង សុភ័ណ្ឌ ប្រធាន​សម្ព័ន្ធ​សហជីព​កម្ពុជា (CATU) ដែល​អម​ដំណើរ​ជាមួយ​លោក សម រង្ស៊ី ទៅ​ខេត្ត ស្វាយរៀង បាន​ថ្លែង​ថា មាន​កម្មករ​ជាច្រើន ចេញ​មក​ស្តាប់​លោក សម រង្ស៊ី ហើយ​ពួក​គេ មិន​បាន​ត្រឡប់​ទៅ​ធ្វើ​ការ​វិញ​ទេ។ លោក​ស្រី បាន​បញ្ជាក់​ថា៖ «កម្មករ​ទាំង​អស់ បាន​តវ៉ា​ទាមទារ​ប្រាក់​ឈ្នួល ១៦០ ដុល្លារ​ក្នុង​មួយ​ខែ»។

ប៉ុន្តែ​លោក ហាស់ ប៊ុនធី ប្រធាន​មន្ទីរ​ការងារ​ខេត្ត ស្វាយរៀង បាន​និយាយ​កាល​ពី​ថ្ងៃ​ម្សិលមិញ​ថា កម្មករ​ស្ទើរ​តែ​ទាំង​អស់ បាន​ត្រឡប់​ទៅ​ធ្វើ​ការ​វិញ ប៉ុន្តែ​លោក សម រង្ស៊ី បាន​ទៅ​ដល់​ហើយ​បង្អាក់​ការ​ចូល​ធ្វើ​ការងារ​របស់​ពួក​គេ។ លោក​បញ្ជាក់​ថា៖ «លោក សម រង្ស៊ី បាន​ចុះ​មក​បង្អាក់​ការងារ​របស់​កម្មករ ខណៈ​កម្មករ​ស្ទើរ​តែ​ទាំង​អស់ បាន​ត្រឡប់​ទៅ​ធ្វើ​ការ​វិញ»។

លោក ហាស់ ប៊ុនធី ថ្លែង​ថា អាជ្ញាធរ​មូលដ្ឋាន នៅ​តែ​អំពាវនាវ​សូម​ឲ្យ​កម្មករ​ទាំង​អស់​រក្សា​ភាព​ស្ងប់​ស្ងាត់ ហើយ​ត្រូវ​តែ​បន្ត​ធ្វើការ​ដូច​ធម្មតា ដោយ​រង់ចាំ​លទ្ធផល​ពី​ក្រសួង ការងារ ដែល​នឹង​សម្រេច​ពី​ប្រាក់​ឈ្នួល​របស់​ពួក​គេ​នៅ​ថ្ងៃ​នេះ។ លោក​បន្ត​ថា៖ «ខ្ញុំ​បារម្ភ​ថា អ្នក​វិនិយោគ​ទុន​នឹង​ផ្លាស់​ការ​វិនិយោគ​របស់​ពួក​គេ​ទៅ​ប្រទេស​ផ្សេង ព្រោះ​មាន​ការ​តវ៉ា​កើត​ឡើង​ជាច្រើន។ មាន​កូដកម្ម ៦២ ករណី​ក្នុង​ឆ្នាំ​នេះ នៅ​ខេត្ត ស្វាយរៀង»។

ខណៈ​ដែល​ក្រសួង​និង​ស្ថាប័ន​ពាក់​ព័ន្ធ​របស់​រដ្ឋាភិបាល តំណាង​រោងចក្រ និង​តំណាង​សហជីព នឹង​ជួប​ប្រជុំ​គ្នា​នៅ​ថ្ងៃ​អង្គារ​នេះ ដើម្បី​ធ្វើ​ការ​ពិភាក្សា​ពី​ការ​ដំឡើង​ប្រាក់​ឈ្នួល​កម្មករ កាល​ពី​ម្សិលមិញ សហភាព​សហជីព​កម្ពុជា បាន​ចេញ​សេចក្តី​អំពាវនាវ​មួយ ដល់​កម្មករ សូម​ឲ្យ​ត្រៀម​ខ្លួន​ក្នុង​ការ​ធ្វើ​ការ​តវ៉ា​ដ៏​ធំ​មួយ​នៅ​ទូទាំង​ប្រទេស ប្រសិន​បើ​ប្រាក់​ឈ្នួល​របស់​កម្មករ​មិន​ត្រូវ​បាន​ដំឡើង​ដល់ ១៦០ ដុល្លារ​ទេ​នោះ។

លោក រ៉ុង ឈុន ប្រធាន​សហភាព​សហជីព​កម្ពុជា​ថ្លែង​ថា៖ «បើ​ការ​សម្រេច​ដំឡើង​ប្រាក់​ឈ្នួល​នេះ​ផ្ទុយ​ពី​សំណើ​របស់​សហព័ន្ធ​សហជីព​នឹង​ផ្ទុះ​មហា​កូដកម្ម​ឬ​បាតុកម្ម នៅ​តាម​បណ្តា​រោងចក្រ​ទូទាំង​ប្រទេស»។ លោក​បន្ត​ថា សហជីព​ភាគ​ច្រើន​ជ្រើសរើស​យក​តាម​រូបមន្ត​ទី​បី របស់​ក្រសួង ការងារ ក្នុង​ការ​ដំឡើង​ប្រាក់​ឈ្នួល​នេះ ដោយ​ធ្វើ​ការ​ដំឡើង ១០០ ភាគរយ​តែ​ម្តង។ «យើង​ចង់​ឲ្យ​មាន​ការ​ដំឡើង​ដល់ ១៦០ ដុល្លារ​តែ​ម្តង។ យើង​ចង់​ផ្តល់​ភ្លើង​ខៀវ​ដល់​ក្រសួង ការងារ ក៏​ដូច​ជា​គណៈកម្មការ​ប្រឹក្សា​ការងារ​ថា ត្រូវ​តែ​សម្រេច​តាម​សំណើ​ដែល​ក្រសួង​បាន​បង្កើត​រូបមន្ត​នេះ​ឡើង​»។ លោក រ៉ុង ឈុន បាន​ព្រមាន​ថា ការ​តវ៉ា​នឹង​ធ្វើ​ឡើង​នៅ​ដើម​ខែ មករា ខាង​មុខ​នេះ ប្រសិន​បើ​ប្រាក់​ឈ្នួល​របស់​កម្មករ​មិន​ត្រូវ​បាន​ដំឡើង​ឲ្យ​ដល់ ១៦០ ដុល្លារ​ទេ​នោះ។

លោក សាត សាមុត អនុ​រដ្ឋលេខាធិការ ក្រសួង ការងារ បាន​ថ្លែង​កាល​ពី​ថ្ងៃ​ម្សិលមិញ ដោយ​ដាក់​ជា​សំណួរ ទៅ​កាន់​លោក រ៉ុង ឈុន វិញ​ថា តើ​អ្នក​ណា​ដែល​មិន​ចង់​ឲ្យ​បង​ប្អូន​កម្មករ​ឡើង​ប្រាក់​ឈ្នួល​របស់​ពួក​គេ​ម្តង ១៦០ ដុល្លារ​នោះ។ លោក​បាន​គូស​បញ្ជាក់​ថា៖ «សុំ​មេត្តា​លោក រ៉ុង ឈុន អាណិត​អ្នក​នៅ​កណ្តាល (ក្រសួង ការងារ) នេះ​ផង។ យើង​ចង់​ឲ្យ​ពួក​គេ​ទទួល​បាន​ច្រើន​ណាស់ តែ​លុយ​មិន​មែន​នៅ​នឹង​យើង​នេះ​ទេ គឺ​នៅ​ក្នុង​ហោប៉ៅ​របស់​និយោជក»។

លោក សាមុត បាន​បន្ត​ថា ការ​ទាមទារ​របស់​កម្មករ​គឺជា​សិទ្ធិ​របស់​ពួក​គេ​ហើយ​ការ​ធ្វើ​មហា​បាតុកម្ម​ក៏​ជា​សិទ្ធិ​របស់​ពួក​គេ​ដែរ ប៉ុន្តែ​ការ​សម្រេច​មិន​មែន​ស្ថិត​នៅ​លើ​ក្រសួង ការងារ តែ​មួយ​នោះ​ទេ គឺ​ត្រូវ​មាន​យន្តការ​ត្រី​ភាគី ក្នុង​ការ​ចរចា​សម្រេច។

លោក​ថ្លែង​ទៀត​ថា៖ «ប្រសិន​បើ​លោក រ៉ុង ឈុន ខ្លាំង លោក​ទៅ​និយាយ​ផ្ទាល់​ជាមួយ​សមាគម​កាត់ដេរ​វិញ​ទៅ ព្រោះ​លុយ​នៅ​នឹង​គេ។ ខាង​និយោជក​មាន​ការ​ខឹង​សម្បា​នឹង​យើង​ខ្ញុំ​ដោយ​គ្រាន់​តែ​យើង​បង្ហើប​ទាមទារ​តែ​ពី ១០ ទៅ ២០ ដុល្លារ​តែ​ប៉ុណ្ណោះ»៕ NR

អត្ថបទគួរចាប់អារម្មណ៍