ភ្នំពេញៈ គណបក្សប្រឆាំងមានគម្រោងផ្ញើសារនយោបាយផ្ទាល់ទៅប្រជាជន ដោយត្រៀមអនុវត្តវិធានការមួយដើម្បីទទួលបានអាជ្ញាប័ណ្ណលើប្រព័ន្ធផ្សព្វផ្សាយ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានថ្លែងកាលពីម្សិលមិញថា ខណៈគណបក្សទំនងជាមិនទទួលបានអាជ្ញាប័ណ្ណបើកប៉ុស្តិ៍ ទូរទស្សន៍ បើទោះជាដាក់ពាក្យសុំក៏ដោយនោះ គណបក្សមានលទ្ធភាពអាចនឹងបង្កើតក្រុមហ៊ុនឯកជនមួយជាមួយវិនិយោគិនដែលយល់ពីបក្ស ហើយឲ្យធ្វើជាតំណាងដាក់ពាក្យសុំអាជ្ញាប័ណ្ណ។
លោកបន្តថា៖ «យើងមិនទាន់ដឹងទេ ប៉ុន្តែ បើរដ្ឋមន្រ្តីក្រសួង ព័ត៌មាន រារាំងយើងនិងសុំឲ្យនរណាម្នាក់បង្កើតក្រុមហ៊ុនមួយ ហើយឲ្យធ្វើតំណាងដាក់ពាក្យសុំអាជ្ញាប័ណ្ណ»។
លោកបន្តថា៖ «ដូចអ្វីដែលគណបក្សប្រជាជនកម្ពុជាធ្វើ យើងត្រូវតែធ្វើស្រដៀងគ្នា ក្រសួងព័ត៌មានផ្តល់អាជ្ញាប័ណ្ណទៅឲ្យក្រុមហ៊ុនដែលមានសម្ព័ន្ធភាពជាមួយគណបក្សខ្លួន ដូច្នេះហេតុអ្វីគណបក្សសង្គ្រោះជាតិមិនអាចធ្វើបាន?»។ តែបើទោះជាលោក យឹម សុវណ្ណ ថា មានពាណិជ្ជករធំៗមួយចំនួនគាំទ្រការវិនិយោគបែបនេះ ក៏លោកបានបដិសេធមិនបង្ហាញឈ្មោះពួកគេដែរ។
លោកថា៖ «មានមនុស្សជាច្រើន ប៉ុន្តែ មិនអាចបញ្ចេញឈ្មោះពួកគេទេ»។
ការទាមទារសុំអាជ្ញាប័ណ្ណទូរទស្សន៍និងវិទ្យុ គឺជាសំណើនៅក្នុងចំណោមសំណើទាំង ១០ ដែលលើកឡើង នៅក្នុង «សមាជប្រជាជន» កាលពីខែមុន។
ស្ថានីយទូរទស្សន៍ ទាំងអស់ត្រូវបានគ្រប់គ្រងដោយគណបក្សកាន់អំណាច ឬមានសម្ព័ន្ធភាពជាមួយគណបក្សកាន់អំណាច ហើយក៏មិនលក់ម៉ោងផ្សាយឲ្យទៅគណបក្សសង្គ្រោះជាតិដែរ។
រដ្ឋមន្រ្តីក្រសួង ព័ត៌មាន លោក ខៀវ កាញារីទ្ធ បានឆ្លើយតបនឹងសំណើសុំអត្ថាធិប្បាយតាមអ៊ីមែលកាលពីម្សិលមិញថា វិទ្យុសំបុកឃ្មុំ បានធ្វើសេចក្តីថ្លែងការណ៍មួយចំនួនគាំទ្រគណបក្សសង្គ្រោះជាតិ «ដូច្នេះ គណបក្សសង្គ្រោះជាតិមានវិទ្យុផ្ទាល់ខ្លួនរួចទៅហើយ»។ លោកឆ្លើយតបថា «វាយឺតពេលទៅហើយ» ក្នុងការឆ្លើយថា តើគណបក្សប្រឆាំងអាចទទួលបានអាជ្ញាប័ណ្ណទូរទស្សន៍ឬអត់?»។
ប៉ុន្តែ តំណាងរាស្រ្តគណបក្សប្រជាជនលោក ជាម យៀប ថ្លែងថា វាជា «សិទ្ធិ» របស់គណបក្សសង្គ្រោះជាតិ ចំពោះការបើកស្ថានីយទូរទស្សន៍ ប្រសិនបើខ្លួនគោរពច្បាប់និងប្រសិនបើខ្លួនទទួលបានការផ្តល់អាជ្ញាប័ណ្ណ។ លោកបន្តថា៖ «ខ្ញុំគិតថា នឹងមិនមានបញ្ហាទេ ប្រសិនបើ មានក្រុមហ៊ុនឯកជនគាំទ្រពួកគេ»។
គណបក្សប្រឆាំង នៅសប្តាហ៍នេះ បានបើកដំណើរការទូរទស្សន៍គណបក្សដែលជា «ស្ថានីយទូរទស្សន៍អនឡាញ» ប៉ុន្តែ មកដល់ពេលនេះ មានតែកម្មវិធីបទសម្ភាសជាមួយតំណាងរាស្រ្ត និងវីដេអូសន្និសីទកាសែតតែប៉ុណ្ណោះ។
លោកស្រី មូរ សុខហួរ ប្រធានផ្នែកកិច្ចការសាធារណៈរបស់គណបក្សសង្គ្រោះជាតិ បានថ្លែងថា ទូរទស្សន៍គណបក្សសង្គ្រោះជាតិ នៅកំពុងស្ថិតក្នុងការសាកល្បងនៅឡើយ ប៉ុន្តែថា ទាំងទូរទស្សន៍អនឡាញ និងស្ថានីយទូរទស្សន៍ដែលបើកនាពេលអនាគត នឹងផ្តល់នូវការចាក់ផ្សាយដែលមានតុល្យភាព។
លោកស្រីថ្លែងថា៖ «បើយើងខ្ញុំចង់បានលុយពីវិស័យឯកជន នោះហើយជាហេតុផលដែលត្រូវតែមានតុល្យភាព និងបង្ហាញពីវិជ្ជាជីវៈ និងភាពអាចជឿជាក់បាន»។ តែលោកស្រីមិនបានថ្លែងថា ទូរទស្សន៍ថ្មីនេះនឹងរក្សាឈ្មោះជា «ទូរទស្សន៍គណបក្សសង្គ្រោះជាតិ» ឬយ៉ាងណាទេ។
លោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សាប្រព័ន្ធផ្សព្វផ្សាយ ថ្លែងថា គណបក្សសង្គ្រោះជាតិអាចនឹងសុំអាជ្ញាប័ណ្ណនេះបាន តាមរយៈក្រុមហ៊ុនឯកជន ប្រសិនបើរក្សាសម្ព័ន្ធភាពនយោបាយរបស់ខ្លួនស្ងាត់ៗ។លោក បន្តថា៖ «បើរដ្ឋាភិបាលដឹងថា ក្រុមហ៊ុននោះមានសម្ព័ន្ធភាពជាមួយបក្សប្រឆាំង ពួកគេនឹងមិនអនុញ្ញាតឲ្យបើកទេ»។
«ពួកគេមានលេសជាច្រើន...សូម្បីអង្គការ ក្រៅរដ្ឋាភិបាលព្យាយាមសុំអាជ្ញាប័ណ្ណវិទ្យុ តែរដ្ឋាភិបាលឆ្លើយតបក្រោមលេសថា មិនមាននៅសល់រលកធាតុអាកាសគ្រប់គ្រាន់»៕ PS
រាយការណ៍បន្ថែមៈ ឆាយ ច័ន្ទនីដា និង វង្ស សុខេង
