The Phnom Penh Post Search

Search form




Logo of Phnom Penh Post newspaper Phnom Penh Post - បក្ស​ប្រឆាំង​លុប​ចោល​ការ​ជួប​ជុំ​នៅ​ខេត្ត កណ្តាល

បក្ស​ប្រឆាំង​លុប​ចោល​ការ​ជួប​ជុំ​នៅ​ខេត្ត កណ្តាល

បក្ស​ប្រឆាំង​លុប​ចោល​ការ​ជួប​ជុំ​នៅ​ខេត្ត កណ្តាល

140122_02
សមត្ថកិច្ច និងក្រុមជនស៊ីវិលដែលបក្សប្រឆាំងចោទថា ជាបាតដៃទី៣ ម៉ៃ វីរៈ

ភ្នំពេញៈ មេ​ដឹក​នាំ​គណបក្ស​ប្រឆាំង​បាន​ឲ្យ​ដឹង​ថា កាល​ពី​ម្សិលមិញ គណបក្ស​នេះ​បាន​លុប​ចោល​កិច្ច​ប្រជុំ​សាធារណៈ​មួយ​ក្នុង​ខេត្ត កណ្តាល ដើម្បី​ចៀសវាង​អំពើ​ហិង្សា​បន្ទាប់​ពី​អ្នក​គាំទ្រ​បាន​មក​ដល់​ហើយ ជួប​នឹង​ជន​ស៊ីវិល​ជាច្រើន ព្រម​ទាំង​នគរបាល​បង្ក្រាប​កុបកម្ម និង​កង​រាជ​អាវុធហត្ថ ដែល​ត្រូវ​បាន​ចោទ​ថា គណបក្ស​កាន់​អំណាច​បាន​បញ្ជូន​អ្នក​ទាំង​នោះ​មក។ លោក សម រង្ស៊ី ប្រធាន​គណបក្ស​សង្គ្រោះ​ជាតិ និង​លោក កឹម សុខា ជា​អនុ​ប្រធាន​គ្រោង​មក​ដល់​កន្លែង​ប្រារព្ធ​ពិធី នៅ​ក្នុង​ស្រុក ស្អាង ក្នុង​ឃុំ ត្រើយស្លា នៅ​ម៉ោង ២ រសៀល ប៉ុន្តែ​បាន​លុប​ចោល​គម្រោង​ជួបជុំ​ជា​សាធារណៈ នោះ​ភ្លាមៗ។

នៅ​ក្នុង​វត្ត កោះ​តូច ជន​ស៊ីវិល​រាប់រយ​នាក់ ដែល​ភាគ​ច្រើន​ពាក់​ក្រណាត់​ក្រហម នគរបាល​បង្ក្រាប​កុបកម្ម​ប្រដាប់​ដោយ​កាំភ្លើង​បាញ់​ឧស្ម័ន​បង្ហូរ​ទឹក​ភ្នែក កង​រាជ​អាវុធហត្ថ​ប្រដាប់​ដោយ​ខែល ដំបង និង​កម្លាំង​ចម្រុះ​បាន​ផ្តុំ​គ្នា​នៅ​ទី​នោះ។

លោក អេង ឆៃអ៊ាង ប្រធាន​គណបក្ស​សង្គ្រោះ​ជាតិ​ប្រចាំ​ខេត្ត កណ្តាល ប្រាប់​អ្នក​យក​ព័ត៌មាន​ក្នុង​សន្និសីទ​កាសែត​បន្ទាប់​នោះ​ថា គណបក្ស​កាន់​អំណាច​បាន​បញ្ជូន​កង​សន្តិសុខ​រាប់​រយ​នាក់ ដែល​លោក​អះអាង​ថា ជា​បាត​ដៃ ទី៣ ឲ្យ​មក​គំរាម​កំហែង និង​បំភិត​បំភ័យ​អ្នក​គាំទ្រ​គណបក្ស​ប្រឆាំង។

លោក​បន្ថែម​ថា៖ «ពិធី​ត្រូវ​បាន​ពន្យារ​ពេល​ដោយ​សារ​តែ​ក្រុម​បាត​ដៃ ទី៣ ជិត ១ ពាន់​នាក់​របស់​រដ្ឋាភិបាល មក​រំខាន​យើង។ គេ​សួរ​ថា​តើ គេ​អាច​ចូល​រួម​ពិធី​បាន​ដែរ​ទេ? ប៉ុន្តែ​យើង​មិន​អនុញ្ញាត​ឲ្យ​គេ​ចូល​រួម​ទេ ព្រោះ​គេ​នឹង​បង្ក​ជម្លោះ​ជាមួយ​នឹង​យើង»។ លោក​បន្ត​ថា៖ «យើង​មិន​ខ្លាច​សមត្ថកិច្ច​ឬ​បាត​ដៃ ទី៣ ទេ។ យើង​ពន្យារ គឺ​ដើម្បី​បញ្ចៀស​ហិង្សា»។ លោក​បន្ថែម​ថា កង​នគរបាល​ពុំ​បាន​ចាត់​វិធានការ​បំបែក​ក្រុម​ជន​ស៊ីវិល​ដែល​ប្រមូល​ផ្តុំ​នោះ​ពី​ក្នុង​វត្ត​ទេ បើ​ទោះ​ជា​គណបក្ស​ប្រឆាំង​សុំ​ឲ្យ​ចាត់​វិធានការ​ក៏​ដោយ។

នគរបាល​ដែល​បណ្តេញ​អ្នក​សារព័ត៌មាន និង​អ្នក​ឃ្លាំ​មើល​ចេញ​ពី​ទី​នោះ​នៅ​ម៉ោង​ជិត ៣ រសៀល ប្រាប់​ថា គាត់​ធ្វើ​តាម​បញ្ជា «ឧត្តមសេនីយ៍» ប៉ុន្តែ គាត់​មិន​ពន្យល់​ពី​មូលហេតុ​អ្វី ដែល​កង​កម្លាំង​ប្រដាប់​អាវុធ​ត្រូវ​មក​ប្រមូល​ផ្តុំ​គ្នា​នៅ​វត្ត​ទេ។ គាត់​ថា៖ «ចម្លើយ​ខ្ញុំ​គឺ ខ្ញុំ​មិន​ដឹង​ទេ»។

កង​រាជ​អាវុធហត្ថ និង​នគរបាល​ឯ​ទៀត នៅ​កន្លែង​កើត​ហេតុ​បដិសេធ​មិន​និយាយ​អ្វី​ជាមួយ ភ្នំពេញ ប៉ុស្តិ៍ ទេ។ ឯ​ក្រុម​ជន​ស៊ីវិល​ដែល​ក្នុង​នោះ​ម្នាក់​បាន​ស្រែក​ថា មិន​គួរ​ទុក​ចិត្ត​គណបក្ស​សង្គ្រោះ​ជាតិ​ទេ ក៏​ស្ទាក់​ស្ទើរ​មិន​ពន្យល់​ពី​ការ​មក​កាន់​ទី​នេះ​ដែរ។

លោក គៀត ច័ន្ទថារិទ្ធ អ្នក​នាំ​ពាក្យ​អគ្គ​ស្នងការ​នគរបាល​ជាតិ បដិសេធ​មិន​ធ្វើ​អត្ថាធិប្បាយ​លម្អិត​ទេ​ពី​ករណី​នេះ។ លោក​បញ្ជាក់​ថា៖ «សមត្ថកិច្ច​ខ្ញុំ គឺ​មាន​វិធានការ​ការពារ​សន្តិសុខ [គណបក្ស​សង្គ្រោះ​ជាតិ]។ នគរបាល​តែង​តែ​ការពារ​ក្រុម សម រង្ស៊ី។ កន្លង​មក​បើ​ទោះ​ជា​គាត់​ធ្វើ​បាតុកម្ម​តូច ឬ​ធំ បាតុកម្ម​ដើរ ឬ​បាតុកម្ម​មិន​ដើរ​ដង្ហែ ក៏​នគរបាល​តែង​តែ​ការពារ​គាត់»។

ទាំង​លោក ស ខេង ជា​រដ្ឋ​មន្រ្តី និង​លោក ខៀវ សុភ័គ អ្នក​នាំ​ពាក្យ​ក្រសួង មហាផ្ទៃ មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ។

ថ្លែង​ទៅ​កាន់​អ្នក យក​ព័ត៌មាន នៅ​ទីស្នាក់ការ​គណបក្ស​សង្គ្រោះ​ជាតិ​ក្នុង​ខណ្ឌ មាន​ជ័យ លោក សម រង្ស៊ី យល់​ថា លោក​នាយក​រដ្ឋ​មន្រ្តី ហ៊ុន សែន ខ្លាច​អាម៉ាស់​ក្នុង​ខេត្ត កណ្តាល ដែល​ជា​ខេត្ត​គាត់​ឈរ​ឈ្មោះ។

លោក​បន្ត​ថា៖ «ប៉ុន្តែ ខ្ញុំ​ឆ្ងល់​ថា តើ​គេ​កំពុង​ព្យាយាម​ទាញ មេ​ដឹក​នាំ​គណបក្ស​ប្រឆាំង...ឲ្យ​ជាប់​អន្ទាក់​ឬ​យ៉ាង​ណា? ព្រោះ [យើង​ប្រាប់] ទៅ [លោក ស ខេង រដ្ឋ​មន្រ្តី​ក្រសួង មហា​ផ្ទៃ រួច​ហើយ]»។ លោក​ថ្លែង​ថា លោក​បាន​ទូរស័ព្ទ​ទៅ​លោក ស ខេង នៅ​ព្រឹក​ម្សិលមិញ​ប្រាប់​គាត់​ថា ស្ថានការណ៍​មាន​ភាព​តានតឹង ហើយ​កម្លាំង​ប្រដាប់​អាវុធ​ប្រមូល​ផ្តុំ​ច្រើន។ តែ​រដ្ឋ​មន្រ្តី​ទូរស័ព្ទ​មក​វិញ​កន្លះ​ម៉ោង​ក្រោយ​ថា កិច្ច​ប្រជុំ​បន្ត​បាន «គ្មាន​បញ្ហា»។

ដោយ​យោង​លើ​ការ​វាយ​ប្រហារ​មក​លើ​បាតុកម្ម​របស់​គណបក្ស​ប្រឆាំង ដែល​បាន​សម្លាប់​មនុស្ស ១៦ នាក់ លោក សម រង្ស៊ី ថ្លែង​ថា៖ «នៅ​ថ្ងៃ ទី៣០ មីនា ឆ្នាំ ១៩៩៧ គាត់​ក៏​ទទួល​លិខិត​អនុញ្ញាត​ពី​លោក ស ខេង ថា «គ្មាន​បញ្ហា» ពេល​ខ្ញុំ​សុំ​ធ្វើ​បាតុកម្ម នៅ​មុខ រដ្ឋសភា ចាស់»។ លោក​បន្ថែម​ថា ការ​ហាម​ប្រាម​ការ​ប្រមូល​ផ្តុំ​អាច​ត្រូវ​លុប​ចោល បើ​គណបក្ស​សង្គ្រោះ​ជាតិ​ចូល​កាន់​អាសនៈ​ក្នុង​រដ្ឋសភា​ដែល​លោក​ថា មិន​សម​ហេតុ​ផល។ លោក​បន្ត​ថា៖ «យើង​ផ្អែក​លើ​សម្ពាធ​ខាង​ក្នុង​និង​ពី​ខាង​ក្រៅ​លើ​រដ្ឋាភិបាល ដើម្បី​បង្ខំ​ឲ្យ​លុប​បម្រាម​នេះ ហើយ​បើ​បម្រាម​នេះ​ត្រូវ​ចោល យើង​នឹង​ធ្វើ​បាតុកម្ម​ម្តង​ទៀត»៕ TK

អត្ថបទគួរចាប់អារម្មណ៍