The Phnom Penh Post Search

Search form




Logo of Phnom Penh Post newspaper Phnom Penh Post - បក្ស​ប្រឆាំង​អូស្ត្រាលី​នឹង​ស្នើ​សុំ​ឲ្យ​សភា​លុប​ចោល​កិច្ច​ព្រម​ព្រៀង​ជន​ភៀស​ខ្លួន

បក្ស​ប្រឆាំង​អូស្ត្រាលី​នឹង​ស្នើ​សុំ​ឲ្យ​សភា​លុប​ចោល​កិច្ច​ព្រម​ព្រៀង​ជន​ភៀស​ខ្លួន

ព្រឹទ្ធសភា​បក្ស​ប្រឆាំង​អូស្ត្រាលី​ជួប​ជាមួយ​លោក កឹម សុខា ពិភាក្សា​រឿង​ជន​ភៀស​ខ្លួន។
ព្រឹទ្ធសភា​បក្ស​ប្រឆាំង​អូស្ត្រាលី​ជួប​ជាមួយ​លោក កឹម សុខា ពិភាក្សា​រឿង​ជន​ភៀស​ខ្លួន។ ផា លីណា

បក្ស​ប្រឆាំង​អូស្ត្រាលី​នឹង​ស្នើ​សុំ​ឲ្យ​សភា​លុប​ចោល​កិច្ច​ព្រម​ព្រៀង​ជន​ភៀស​ខ្លួន

ភ្នំពេញៈ ព្រឹទ្ធ​សមាជិក​អូស្ត្រាលី​ម្នាក់ មក​ពី​គណបក្ស​ប្រឆាំង​បាន​សន្យា​ថា នឹង​លើក​យក​បញ្ហា​ប្រឈម​នៃ​កិច្ច​ព្រម​ព្រៀង​ជន​ភៀស​ខ្លួន​អូស្ត្រាលី​មក​កម្ពុជា ទៅ​ជជែក​ក្នុង​មន្ទីរ​សភា​អូស្ត្រាលី និង​រដ្ឋាភិបាល​អូស្រ្តាលី ដើម្បី​លុប​ចោល​កិច្ច​ព្រម​ព្រៀង​ដ៏​ចម្រូង​ចម្រាស​នេះ។

ក្រោយ​ជំនួប​រយៈ​ពេល​ជិត ១ ម៉ោង​កាល​ពី​ម្សិល​មិញ​នេះ ជាមួយ​នឹង​អនុ​ប្រធាន ទី១ នៃ​រដ្ឋសភា និង​ជា​អនុ​ប្រធាន​គណបក្ស​សង្គ្រោះ​ជាតិ លោក កឹម សុខា រួច​មក ព្រឹទ្ធ​សមាជិក​អូស្រ្តាលី មក​ពី​គណបក្ស​បៃតង លោក​ស្រី Sarah Hanson-Young បាន​ឲ្យ​ដឹង​ថា ជុំវិញ​ព័ត៌មាន​ទាក់ទិន​នឹង​កិច្ច​ព្រម​ព្រៀង​បញ្ជូន​ជន​ភៀស​ខ្លួន​អូស្រ្តាលី ដែល​កំពុង​រស់​នៅ​លើ​កោះ Nauru មក​កម្ពុជា​នោះ គឺ​មិន​ត្រូវ​បាន​រដ្ឋាភិបាល​នៃ​ប្រទេស​ទាំង​ពីរ​បើក​ទូលាយ​នោះ​ទេ ហើយ​លោក​ស្រី គិត​ថា នេះ​ជា​ការ​ព្រួយ​បារម្ភ​មួយ​សម្រាប់​កម្ពុជា ក្នុង​ការ​រ៉ាប់​រង​ក្រុម​មនុស្ស ដែល​មិន​មាន​ផល​ប្រយោជន៍​សម្រាប់​ខ្លួន។ លោក​ស្រី​បន្ត​ថា៖ «វា​ច្បាស់​ណាស់​គឺ​ថា អូស្ត្រាលី កំពុង​ទាញ​យក​ផល​ប្រយោជន៍​ពី​ស្ថានភាព​បច្ចុប្បន្ន​របស់​កម្ពុជា ហើយ​ជា​ជាង​ការ​ចាក់​ចោល​ជន​ភៀស​ខ្លួន អូស្ត្រាលី ពួក​យើង​គួរ​តែ​ធ្វើ​ការ​ជាមួយ​កម្ពុជា ដោយ​រក្សា​ទុក​ពួក​គេ​ឲ្យ​បន្ត​នៅ​ទី​នោះ ជាមួយ​នឹង​ស្តង់ដារ​រស់​នៅ​សមរម្យ​មួយ»។

លោក​ស្រី​ថា៖ «ខ្ញុំ​នឹង​នាំ​យក​កង្វល់​ទាំង​នេះ ទៅ​កាន់​សភា​អូស្ត្រាលី និង​រដ្ឋាភិបាល មិន​ត្រឹម​តែ​បញ្ហា​កិច្ច​ព្រម​ព្រៀង​ជន​ភៀស​ខ្លួន​នោះ​ទេ ក៏​មាន​បញ្ហា​សិទ្ធិ​មនុស្ស​នៅ​កម្ពុជា​ផង​ដែរ។ រដ្ឋាភិបាល​អូស្ត្រាលី មិន​អាច​នៅ​ស្ងៀម​បាន​ឡើយ ជុំវិញ​បញ្ហា​ទាំង​នេះ​សម្រាប់​ខ្ញុំ​កិច្ច​ព្រម​ព្រៀង​នោះ គួរ​តែ​ត្រូវ​កម្ទេច​ចោល»។

អនុ​ប្រធាន ទី១ នៃ​រដ្ឋសភា លោក កឹម សុខា បាន​ឲ្យ​ដឹង​ដែរ​ថា ក្នុង​ជំនួប​ពិភាក្សា​ព្រឹទ្ធ​សមាជិក​រូប​នេះ បាន​ប្រកាស​គាំទ្រ​ចំពោះ​ការ​ប្រឆាំង​នឹង​កិច្ច​ព្រម​ព្រៀង​នេះ ហើយ​នឹង​អញ្ជើញ​រូប​លោក​ជា​ផ្លូវ​ការ ទៅ​កាន់​ប្រទេស​អូស្រ្តាលី ដើម្បី​ធ្វើ​បទ​បង្ហាញ​ពី​ផល​ប៉ះ​ពាល់​ដែល​អាច​កើត​មាន​ដោយ​កិច្ច​ព្រម​ព្រៀង​នេះ​ទៅ​កាន់​ប្រជា​ពលរដ្ឋ និង​រដ្ឋាភិបាល​អូស្ត្រាលី។ លោក​ថា៖ «យើង​បាន​ប្រាប់​ថា បើ​សិន​មិន​ពិចារណា​យើង​នឹង​សុំ​បញ្ឈប់ (កិច្ច​ព្រម​ព្រៀង) តែ​ម្តង តែ​ឥឡូវ​គាត់​បាន​គាំទ្រ​ឲ្យ​បញ្ឈប់​តែ​ម្តង ខ្ញុំ​បាន​ស្នើ​ទៅ​នាយក​រដ្ឋ​មន្រ្តី​កម្ពុជា និង​រដ្ឋាភិបាល​អូស្ត្រាលី ហើយ​តែ​ពួក​គាត់​អត់​មាន​ឆ្លើយ​តប អ៊ីចឹង​ហើយ​បាន​ជា​ព្រឹទ្ធ​សមាជិក​អូស្ត្រាលី មក​ជួប​យើង​នេះ»។

កាល​ពី​ថ្ងៃ​ចន្ទ​សប្តាហ៍​នេះ អ្នក​នាំ​ពាក្យ​ក្រសួង​ការ​បរទេស លោក កុយ គួង បាន​លើក​ឡើង​ដែរ​ថា រដ្ឋាភិបាល​ដែល​ដឹក​នាំ​ដោយ​លោក​នាយក​រដ្ឋ​មន្រ្តី ហ៊ុន សែន បាន​បញ្ជាក់​ជំហរ​ចុង​ក្រោយ​នេះ​ថា នឹង​បន្ត​អនុវត្ត​កិច្ច​ព្រម​ព្រៀង​នេះ បើ​ទោះ​បី​ជា​មាន​បាតុកម្ម​ប្រឆាំង​ពី​ក្រុម​ណា​ក៏​ដោយ។ លោក​ថា៖ «ជា​ធម្មតា នៅ​ពេល​ដែល​រដ្ឋាភិបាល​អនុវត្ត​អ្វី​មួយ វា​មិន​អាច​ធ្វើ​ឲ្យ​ពេញ​ចិត្ត​ទាំង​អស់​គ្នា​នោះ​ទេ មាន​អ្នក​ខ្លះ​មាន​គំនិត​ផ្សេង​ទៅ ប៉ុន្តែ​ចុង​ក្រោយ ពួក​គេ​នឹង​យល់​ថា អ្វីៗ​នឹង​ដំណើរ​ការ​យ៉ាង​រលូន ដោយ​គ្មាន​បញ្ហា​ដូច​ពួក​គេ​បាន​គិត»។

លោក​បាន​បន្ថែម​ថា រដ្ឋាភិបាល​បាន​ពិចារណា​លើ​រឿង​នេះ និង​រក​ឃើញ​ថា មាន​តែ​ផល​ប្រយោជន៍​ប៉ុណ្ណោះ ហើយ​កិច្ច​ព្រម​ព្រៀង​នេះ​នឹង​អនុវត្ត​ក្នុង​ក្រប​ខ័ណ្ឌ​មនុស្ស​ធម៌ ដោយ​គ្មាន​ការ​បង្ខំ​ឡើយ។

បច្ចុប្បន្ន​មាន​ជន​ភៀស​ខ្លួន ចំនួន ១១៤០ នាក់​កំពុង​ត្រូវ​បាន​ឃុំ​ខ្លួន​នៅ​លើ​កោះ Nauru ហើយ​ក្នុង​ចំណោម​នោះ មាន​តែ ២០០ នាក់​ប៉ុណ្ណោះ ត្រូវ​បាន​ទទួល​ស្គាល់​ថា ជា​ជន​ភៀស​ខ្លួន​ពិត​ប្រាកដ៕

អត្ថបទគួរចាប់អារម្មណ៍