ភ្នំពេញៈ ប្រធានគណបក្សនយោបាយ និងសង្គមស៊ីវិលមួយចំនួនបានសម្តែងការសោកស្តាយចំពោះការសម្រេចចិត្តរបស់គណៈកម្មាធិការជាតិរៀបចំការបោះឆ្នោត គ.ជ.ប ក្នុងការជ្រើសរើសលោក ទេព នីថា ជាអគ្គលេខាធិការ គជប ថ្មីដោយចាត់ទុកថានឹងនាំឲ្យមានការមិនទុកចិត្តលើការបោះឆ្នោតនៅពេលខាងមុខនេះ។
លោក ទេព នីថា ដែលបច្ចុប្បន្នជាអគ្គលេខាធិការ គជប កាលពីថ្ងៃសុក្រសប្តាហ៍មុនត្រូវបានគណៈកម្មាធិការជាតិរៀបចំការបោះឆ្នោតបានបោះឆ្នោតជ្រើសរើសជាអគ្គលេខាធិការ គជប ថ្មីដដែលសម្រាប់អាណត្តិក្រោយបើទោះបីជាមានការរិះគន់ថាលោកមានទំនោរទៅរកបក្សកាន់អំណាចក្នុងការរៀបចំការបោះឆ្នោតនៅអាណត្តិមុនៗក្តី។
លោក ទេព នីថា ជាបេក្ខជនប្រកួតប្រជែងជាមួយបេក្ខជនពីររូបទៀតគឺលោក ហេង មណីចិន្តា អនុបណ្ឌិតរដ្ឋបាលសាធារណៈ និងជាប្រធានអង្គការពុទ្ធសាសនាដើម្បីអភិវឌ្ឍន៍ និងលោក យ៉ា ណាវុធ អនុបណ្ឌិតនីតិសាស្ត្រ និងជានាយកអង្គការខារ៉ាមកម្ពុជា។ ដោយឡែកអគ្គលេខាធិការរង គជប ៤ នាក់រួមមាន លោក ម៉ៅ សុភារិទ្ធ លោក សោម សូរីដា លោក នី ចរិយា និងលោក ម៉ុក ដារ៉ា។
ក្រោយការជ្រើសរើសនេះប្រធានគណបក្សអំណាចខ្មែរ លោក សួន សេរីរដ្ឋា បានសរសេរនៅលើហ្វេសប៊ុករបស់លោកដោយចាត់ទុកថា « គ.ជ.ប ដែលបង្កាត់ពូជដោយគណបក្សប្រជាជនកម្ពុជា និងគណបក្សសង្គ្រោះជាតិគឺបង្ហាញឲ្យឃើញយ៉ាងច្បាស់តាមរយៈការរើសអគ្គលេខាធិការនេះហើយ។ លោកបានលោកឡើងថា៖ «តើពលរដ្ឋខ្មែរចង់បានការបោះឆ្នោតបង្គ្រប់កិច្ចដដែលៗ ឬក៏ចង់បានការបោះឆ្នោតដោយសេរី និងយុត្តិធម៌?»។
ប្រធានគណបក្សមួយនេះបានទាមទារឲ្យរំលាយចោលសមាជិក គ.ជ.ប ដែលជាសមាជិកតំណាងមកពីគណបក្សនយោបាយហើយបង្កើត គ.ជ.ប ឯករាជ្យពិតប្រាកដដែលមិនមែនជាកូតារបស់គណបក្សនយោបាយ។
អតីតតំណាងរាស្ត្រមកពី CPP ដែលទើបលាលែងពីគណបក្សកាន់អំណាចរួចទៅបង្កើតគណបក្សសេរីភាពកម្ពុជាលោក ជា ចំរើន ប្រាប់ភ្នំពេញប៉ុស្តិ៍កាលពីម្សិលមិញថាលោកមើលឃើញវិជ្ជមានផង និងអវិជ្ជមានផង។ លោកបានបន្តថាភាពវិជ្ជមាននោះដោយសារលោក ទេព នីថា មានបទពិសោធការងារបោះឆ្នោតច្រើនឆ្នាំតែភាពអវិជ្ជមានវិញស្ថាប័នមួយនេះនឹងធ្វើឲ្យបាត់បង់ជំនឿទុកចិត្តពីប្រជាពលរដ្ឋ។
លោកបញ្ជាក់ថា៖ «ប៉ុន្តែអ្វីដែលសំខាន់ស្រុកខ្មែរអត់មានអ្នកមានសមត្ថភាពទេអីរឿងសំខាន់គឺយើងដាក់សំណួរប៉ុណ្ណឹងមានតែម្នាក់បានយើងត្រូវតែយកហ្នឹង (ទេព នីថា) តែអ្វីដែលជោគជ័យបានក្នុងកិច្ចការនយោបាយទាក់ទងនឹងជំនឿ និងអំណាចបក្សកាន់អំណាចគាត់យល់ថាបើដាក់អ្នកហ្នឹង (ទេព នីថា) ទៅវាល្អតែសម្រាប់មហាជនគេម៉េចនឹងសប្បាយចិត្តព្រោះជាមនុស្សដដែល»។
ជាមួយគ្នានេះដែរប្រធានគណបក្សហ៊្វុនស៊ិនប៉ិចសម្តេចក្រុមព្រះ នរោត្តម រណឫទ្ធិ បានថ្លែងប្រាប់អ្នកសារព័ត៌មានក្នុងពិធីសន្និបាតរបស់ខ្លួនថាលោកបង្ហាញជំហរមិនគាំទ្រទៅនឹងការសម្រេចចិត្តរបស់សមាជិកគណៈកម្មាធិការជាតិរៀបចំការបោះឆ្នោតដែលបន្តឲ្យលោក ទេព នីថា ធ្វើជាអគ្គលេខាធិការ គជប ថ្មីនោះទេ។
ទ្រង់បានថ្លែងថា៖ «ខ្ញុំបានបញ្ចេញមតិរួចហើយថាបើសិនជាយើងខ្ញុំវិញខ្ញុំនឹងរើស គ.ជ.ប មួយដែលអព្យាក្រឹតពិតប្រាកដហើយក្នុងនោះត្រូវមានតំណាងអង្គការក្រៅរដ្ឋាភិបាលជាសមាជិកផងប៉ុន្តែឲ្យខ្ញុំគាំទ្រខ្ញុំមិនអាចគាំទ្រជាដាច់ខាត»។ សម្តេចក្រុមព្រះមានបន្ទូលបន្តថា «មិនមែនត្រឹមតែការតែងតាំងអគ្គលេខាធិការហ្នឹងទេក៏ប៉ុន្តែជាទូទៅ គ.ជ.ប នេះខ្ញុំពុំអាចគាំទ្របាន»។
នាយកប្រតិបត្តិនៃអង្គការឃ្លាំមើលការបោះឆ្នោតដោយសេរី និងយុត្តិធម៌នៅកម្ពុជា (Comfrel) លោក គល់ បញ្ញា ធ្លាប់បានថ្លែងថាអគ្គលេខាធិការ គជប ថ្មីគួរតែជ្រើសរើសយកអ្នកថ្មីឲ្យមកកាន់តំណែងនេះដើម្បីឲ្យពលរដ្ឋទុកចិត្តទៅលើស្ថាប័នមួយនេះសម្រាប់ការរៀបចំបោះឆ្នោតនៅពេលខាងមុខ។
ដោយឡែកសេចក្តីថ្លែងការណ៍គណបក្សសង្គ្រោះជាតិដែលចេញផ្សាយក្រោយប្រកាសថាលោក ទេព នីថា ជាប់ជាអគ្គលេខាធិការជាថ្មីក៏បានសម្តែងការសោកស្តាយផងដែរចំពោះការសម្រេចចិត្តរបស់ គជប នោះ។
សេចក្តីថ្លែងការណ៍លើកឡើងថា ការជ្រើសរើសឲ្យលោក ទេព នីថា ជាអគ្គលេខាធិការ គជប ចាស់ទទួលតួនាទីជាអគ្គលេខាធិការថ្មីគឺធ្វើឲ្យគណបក្សសង្គ្រោះជាតិ និងប្រជាពលរដ្ឋមិនមានជំនឿទុកចិត្តក្នុងការរៀបចំការបោះឆ្នោតនាពេលកន្លងមកនេះហើយការងារអាចនាំឲ្យមានការមិនទុកចិត្តលើការបោះឆ្នោតនាពេលខាងមុខ។
ទោះជាយ៉ាងណាក៏ដោយប្រធាន គជប ថ្មី លោក ស៊ិក ប៊ុនហុក បានថ្លែងថាការសម្រេចជ្រើសរើសយកលោក ទេព នីថា ឲ្យបន្តតំណែងជាអគ្គលេខាធិការ គជប ថ្មីនាពេលនេះគឺផ្អែកទៅលើសមត្ថភាពការងាររបស់គាត់ និងមានបទពិសោធដែលមានច្រើនឆ្នាំទាក់ទងនឹងការងារបោះឆ្នោតនេះ។
ចំពោះសមាជិក គជប លោក រ៉ុង ឈុន ថ្លែងថាលោកមិនបានគាំទ្រលើបេក្ខភាពលោក ទេព នីថា ឲ្យធ្វើជាអគ្គលេខាធិការ គជប នោះទេតែដោយសារសំឡេងរបស់លោកមិនអាចឈ្នះសំឡេងភាគច្រើន៕
