ភ្នំពេញ: រាជរដ្ឋាភិបាលបានចេញអនុក្រឹត្យបង្កើត និងតែងតាំងសមាសភាពនៃគណៈកម្មាធិការមរតកមនុស្សរស់ ដើម្បីស្វែងរកបុគ្គលមានចំណេះដឹងមានទេពកោសល្យលើសពីមនុស្សធម្មតាក៏ដូចជាការលើកទឹកចិត្តបុគ្គលដែលមានទេពកោសល្យ និងស្នាដៃចំពោះមនុស្សជាតិ។
តាមអនុក្រឹត្យរបស់រាជរដ្ឋាភិបាលស្ដីពីការតែងតាំងសមាសភាពនៃគណៈកម្មាធិការមរតកមនុស្សរស់ចុះថ្ងៃទី ២១ ខែមេសាដែលភ្នំពេញប៉ុស្ដិ៍ទទួលបានពីម្សិលមិញបានឲ្យដឹងថា សម្រេចតែងតាំងសមាសភាពនៃគណៈកម្មាធិការមរតកមនុស្សរស់ដោយលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈធ្វើជាប្រធាន លោក អ៊ិន វីរជាតិ រដ្ឋលេខាធិការទីស្ដីការគណៈរដ្ឋមន្ត្រី និងលោក ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុជាអនុប្រធាន និងសមាជិកចំនួន ១៤ រូបផ្សេងទៀតដែលមានសមាសភាពពីអង្គភាពផ្សេងៗគ្នា។
អនុក្រឹត្យបញ្ជាក់ថា រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុរដ្ឋមន្ត្រីក្រសួងវប្បធម៌ និងវិចិត្រសិល្បៈ រដ្ឋមន្ត្រីគ្រប់ក្រសួង និងប្រធានគ្រប់ស្ថាប័នដែលពាក់ព័ន្ធ និងសាមីខ្លួនត្រូវទទួលបន្ទុកអនុវត្តអនុក្រឹត្យនេះតាមភារកិច្ចរៀងៗខ្លួនចាប់ពីថ្ងៃចុះហត្ថលេខាតទៅ។
លោកស្រី ភឿង សកុណា បានថ្លែងពីម្សិលមិញថា មរតកមនុស្សរស់សំដៅទៅលើបុគ្គល ឬក្រុមមនុស្សដែលមានចំណេះដឹង ទេពកោសល្យ ជំនាញ និងបច្ចេកទេសកម្រិតខ្ពស់បំផុតដែលចាំបាច់ដល់ការបង្កើតសម្រិតសម្រាំងនៃទិដ្ឋភាពជីវិតវប្បធម៌របស់ប្រជាជន និងអត្ថិភាពបន្តនូវបេតិកភណ្ឌវប្បធម៌អរូបីរបស់ជាតិ។
លោកស្រីបន្តថា គណៈកម្មាធិការនេះមានតួនាទីស្រាវជ្រាវ កត់សម្គាល់ និងស្វែងរកបុគ្គលទាំងឡាយណាដែលមានចំណេះដឹង ទេពកោសល្យ ជំនាញ និងបច្ចេកទេសលើសពីមនុស្សធម្មតា ឬជាមនុស្សដែលមានការកោតសរសើរពីមហាជន ដើម្បីលើកទឹកចិត្តក៏ដូចជាជួយឧបត្ថម្ភពួកគាត់ដោយស្នើឲ្យពួកគាត់ជួយបង្ហាត់បង្ហាញទេពកោសល្យ បណ្ដុះបណ្ដាលក្មេងៗជំនាន់ក្រោយ និងចងក្រងជាឯកសារសម្រាប់ទុកជាប្រយោជន៍ដល់មនុស្សជាតិ។
លោកស្រី សកុណា បញ្ជាក់ថា៖ «រហូតមកដល់ពេលនេះ យើងបានរកឃើញបុគ្គលដែលជាមត៌កមនុស្សរស់ចំនួនប្រមាណជាង ១០ រូបហើយ ប៉ុន្ដែក្នុងចំណោមពួកគាត់នេះមានអ្នកទទួលមរណភាពខ្លះហើយ ដូចជាលោកតា ប្រាជ្ញ ឈួន, សម្តេចព្រះរៀម ព្រះករុណា នរោត្តម បុប្ផាទេវី, លោកព្រឹទ្ធាចារ្យ ឆេង ផុន, លោកតា វណ្ណ មូលីវណ្ណ និងបុគ្គលឆ្នើមផ្សេងៗទៀត»។
លោក ធុយ ចាន់ធួន អនុប្រធានវិទ្យាស្ថានវប្បធម៌ និងវិចិត្រសិល្បៈនៃរាជបណ្ឌិត្យសភាកម្ពុជា និងជាអនុប្រធានសមាគមអ្នកប្រវត្តិសាស្ត្រកម្ពុជា បានថ្លែងពីម្សិលមិញថាមរតកមនុស្សរស់នេះពិតជាមានសារៈសំខាន់ខ្លាំងណាស់ ដែលត្រូវតែធ្វើការអភិរក្ស និងលើកទឹកចិត្តអ្នកមានស្នាដៃ ព្រោះពួកគាត់ជាបុគ្គលសំខាន់ក្នុងការកសាង និងបណ្ដុះបណ្ដាលមនុស្សជំនាន់ក្រោយនៅក្នុងសង្គមជាតិ។
លោកបញ្ជាក់ថា៖ «អ្វីដែលជាការតបស្នងសងគុណទៅពួកគាត់វិញគឺយើងគួរលើកទឹកចិត្តពួកគាត់ ជួយទំនុកបម្រុងពួកគាត់។ ជាក់ស្ដែងដូចលោកតា វណ្ណ មូលីវណ្ណ ជាដើមដែលគាត់បានបន្សល់ទុកនូវស្នាដៃជាច្រើនឲ្យក្មេងៗជំនាន់ក្រោយបានស្គាល់ហើយនៅមានបុគ្គលមួយចំនួនទៀតដែលកំពុងមានជីវិតគឺយើងត្រូវតែយកចិត្តទុកដាក់ចំពោះពួកគាត់»។
លោក ចាន់ធួន បានថ្លែងបន្ថែមថា បុគ្គលដែលគេចាត់ចូលក្នុងមត៌កមនុស្សរស់នេះ មិនសំដៅទៅលើផ្នែកសិល្បៈ ឬផ្នែកណាមួយនោះទេគឺសំដៅបុគ្គលដែលមានជំនាញ ឬបច្ចេកទេសធ្វើអ្វីមួយឆ្នើមដាច់គេ ពូកែបំផុត មានទេពកោសល្យលើសពីមនុស្សធម្មតា។ ក្នុងនាមជាកូនចៅជំនាន់ក្រោយត្រូវតែផ្ដល់កម្លាំងចិត្តជូនពួកគាត់ នៅពេលដែលពួកគាត់កំពុងនៅមានជីវិត៕