The Phnom Penh Post Search

Search form




Logo of Phnom Penh Post newspaper Phnom Penh Post - បច្ចេកវិទ្យា​សរសេរ​កូដ​បង្កើត Robot ត្រូវ​បាន​ដាក់​ឲ្យ​រៀន​សាកល្បង

បច្ចេកវិទ្យា​សរសេរ​កូដ​បង្កើត Robot ត្រូវ​បាន​ដាក់​ឲ្យ​រៀន​សាកល្បង

Content image - Phnom Penh Post
សិស្ស​កំពុង​សាកល្បង​បញ្ជា Robot នៅ​សាលា​ព្រះស៊ីសុវត្ថិ​។ ផា លីណា

បច្ចេកវិទ្យា​សរសេរ​កូដ​បង្កើត Robot ត្រូវ​បាន​ដាក់​ឲ្យ​រៀន​សាកល្បង

ភ្នំពេញ​: សាលារៀន​ជំនាន់​ថ្មី​នៃ​វិទ្យាល័យ​ព្រះស៊ីសុវត្ថិ និង​សាលារៀន​ជំនាន់​ថ្មី​ចំនួន ៣ ​ផ្សេង​ទៀត​ត្រូវ​បាន​ដាក់​បញ្ចូល​នូវ​មុខវិជ្ជា​បច្ចេកទេស​បែប​សរសេរ​កូដ​បង្កើត Robot ឲ្យ​សិស្ស​សិក្សា​ដើម្បី​បង្កើន​សមត្ថភាព​ផ្នែក​បច្ចេកវិទ្យា​តាម​យុគសម័យ​ថ្មី​។ យោង​តាម​លោក សម្យ កំសាន្ត នាយករង​នៃ​វិទ្យាល័យ​ព្រះស៊ីសុវត្ថិ​ទទួល​បន្ទុក​សាលា​ជំនាន់​ថ្មី​បាន​ថ្លែង​ឲ្យ​ដឹង​កាលពី​ម្សិលមិញ​។

លោក កំសាន្ត ថ្លែង​ថា​មុខវិជ្ជា​សរសេរ​កូដ​បង្កើត Robot នេះ​ត្រូវ​បាន​ផ្ដួចផ្ដើម​ដោយ​អង្គការ​អន្តរជាតិ InSTEDD iLad Southeast Asia មកពី​សហរដ្ឋអាមេរិក​ដែល​បាន​សហការ​ជាមួយ​អង្គការ​សកម្មភាព​សម្រាប់​បឋមសិក្សា​នៅ​កម្ពុជា Kampuchea Action for Primary Education (KAPE) និង​ក្រសួង​អប់រំ យុវជន និង​កីឡា ដោយ​បាន​កំណត់​យក​សាលារៀន​ជំនាន់​ថ្មី​ចំនួន ៤ រួមមាន វិទ្យាល័យ​ព្រះស៊ីសុវត្ថិ វិទ្យាល័យ​ព្រែកលៀប វិទ្យាល័យ​ព្រែកអញ្ចាញ និង​វិទ្យាល័យ​ហ៊ុនសែន​កំពង់ចាម ដើម្បី​ដាក់​ដំណើរការ​សាកល្បង​នៅ​ពេល​បើក​បវេសនកាល​សម្រាប់​ឆ្នាំ​សិក្សា ២០១៨-២០១៩ នេះ​។

លោក សម្យ កំសាន្ត នាយករង​នៃ​វិទ្យាល័យ​ព្រះស៊ីសុវត្ថិ​ទទួល​បន្ទុក​សាលា​ជំនាន់​ថ្មី​បាន​ថ្លែង​ថា មុខវិជ្ជា​មួយ​នេះ​មាន​សារៈសំខាន់​ខ្លាំង​ណាស់​សម្រាប់​សិស្ស​សាលារៀន​ជំនាន់​ថ្មី ព្រោះ​សាលារៀន​ជំនាន់​ថ្មី​គឺ​ផ្ដោត​ទៅ​លើ​តែ​បច្ចេកវិទ្យា ហើយ​មុខវិជ្ជា​នេះ​បង្រៀន​សិស្ស​ឲ្យ​ចេះ​សរសេរ​កូដ​បង្កើត​ជា Robot ឬ​សរសេរ​ប្រូក្រាម (Program) ដើម្បី​ឲ្យ​ម៉ាស៊ីន​មាន​កាយវិការ និង​ធ្វើតាម​ការបញ្ជា​របស់​មនុស្ស​។

លោក​បន្ត​ថា​កន្លង​មក​សិស្ស​បាន​សិក្សា​ជា​លក្ខណៈ​ទ្រឹស្ដី​តាមរយៈ​ការប្រើប្រាស់​កុំព្យូទ័រ និង​អនុវត្ត​មិន​សូវ​បាន​ស៊ីជម្រៅ​ទេ ប៉ុន្ដែ​ពេល​នេះ​សាលារៀន​ជំនាន់​ថ្មី​បាន​បន្ថែម​មុខវិជ្ជា​សរសេរ​កូដ (Program) ដើម្បី​បង្កើត Robot ឬ​ហៅថា ការបញ្ជា​ម៉ាស៊ីន​ឲ្យ​ធ្វើការ​ដែល​ដាក់​ឲ្យ​សិស្ស​អនុវត្ត​នៅពេល​បើក​បវេសនកាល​សម្រាប់​ឆ្នាំ​សិក្សា​ ២០១៨-២០១៩​ ​នេះ​។

លោក សម្យ កំសាន្ដ បាន​បញ្ជាក់​ថា​៖ «​មុខវិជ្ជា​នេះ​ពិតជា​សំខាន់​ព្រោះ​វា​ឆ្លើយតប​ទៅនឹង​តម្រូវការ​របស់​សិស្ស និង​យុវជន ព្រោះ​វិទ្យាសាស្ត្រ​មិន​អាច​ស្ថិត​នៅ​តែមួយ​កន្លែង​បានទេ​។ ម្យ៉ាង​ទៀត​វា​អាច​ឆ្លើយតប​តាម​តម្រូវការ​ទីផ្សារ​ការងារ​ផង​ដែរ​»​។

លោកស្រី ស៊ុយ ចាន់ណេ ប្រធាន​គ្រប់គ្រង​ប្រចាំ​តំបន់​អាស៊ី​នៃ​អង្គការ​អន្តរជាតិ InSTEDD iLad Southeast Asia បាន​ថ្លែង​ថា មុខវិជ្ជា​នេះ​គឺជា​គម្រោង​ថ្មី​មួយ​របស់​អង្គការ​ដែល​ធ្វើការ​នៅក្នុង​ប្រទេស​កម្ពុជា ដោយ​មើល​ឃើញ​​ពី​លទ្ធភាព​របស់​សិស្សសាលា​រៀន​ជំនាន់​ថ្មី​នេះ​អាច​រៀន​មុខវិជ្ជា​នេះ ទើប​អង្គការ​សម្រេច​ចិត្ត​ដាក់​សាកល្បង ដើម្បី​ជំរុញ​ឲ្យ​សិស្ស និង​យុវជន​កម្ពុជា​មាន​សមត្ថភាព​ប្រកួតប្រជែង​ទីផ្សារ​ការងារ​នៅលើ​ឆាក​អន្តរជាតិ​ដែរ​។

លោកស្រី​បន្ដ​ថា​ការដាក់​ដំណើរការ​សាកល្បង​ចំនួន ៤ ​សាលារៀន​ជំនាន់​ថ្មី​នេះ គឺជា​គម្រោង​ដំបូង​គេ ហើយ​បើ​សិន​ជា​គម្រោង​នេះ​ជោគជ័យ អង្គការ​នឹង​បន្ថែម និង​ពង្រីក​ទៅ​សាលា​ផ្សេងៗ​ទៀត ជាពិសេស​ជំរុញ​បណ្ដុះបណ្ដាល​គ្រូបង្រៀន​ឲ្យ​មាន​សមត្ថភាព​ទាក់ទង​នឹង​មុខវិជ្ជា​ថ្មី​នេះ​។

លោកស្រី​បញ្ជាក់​ថា​៖ «​តាមពិត​ខាង​ក្រសួង​អប់រំ​គាត់​ឲ្យ​យើង​ដាក់​សាកល្បង​នៅ​សិស្ស​ថ្នាក់​ទី​ ៧ ឬ​ទី​ ៨ ប៉ុន្ដែ​ខ្ញុំ​ថា យើង​ទើប​តែ​សាកល្បង​អ៊ីចឹង គួរតែ​ដាក់​នៅ​ថ្នាក់​ទី​ ៩ ​ឬ​ ១០ ​សិន ព្រោះ​ពួកគាត់​ធំៗ​ល្មម​នឹង​​រៀន​មុខវិជ្ជា​នេះ​។ បើ​ជោគជ័យ យើង​នឹង​គិតគូរ​បន្ថែម​គម្រោង​ទៀត​»​។

សាលារៀន​ជំនាន់​ថ្មី​ (NGS) ជា​កម្មវិធី​កំណែទម្រង់​ប្រព័ន្ធ​អប់រំ​របស់​រាជរដ្ឋាភិបាល​កម្ពុជា​ដែល​ជា​មាគ៌ា​អភិវឌ្ឍន៍​ថ្មី​មួយ​នៅក្នុង​ប្រព័ន្ធ​អប់រំ​នាពេល​បច្ចុប្បន្ន​ដែល​ជួយ​បង្កើត​សាលារៀន​សាធារណៈ​ស្វយ័ត និង​រក្សា​បាន​ស្តង់ដារ​នៃ​ការអប់រំ​បាន​ខ្ពង់ខ្ពស់​បំផុត​តាមរយៈ​ការវិនិយោគ​ថវិកា​ច្រើន​។

NGS ផ្តោត​ទៅ​លើ​ការពង្រឹង​តម្លាភាព និង​ទទួល​ខុសត្រូវ​ដោយ​ការផ្លាស់ប្តូរ​វិធី​គ្រប់គ្រង​សាលារៀន​៕

អត្ថបទគួរចាប់អារម្មណ៍