ព្រៃវែងៈ កុមារាម្នាក់បានស្លាប់ភ្លាមៗនៅកន្លែងកើតហេតុ ខណៈប្អូនស្រីរបស់ក្មេងរងគ្រោះត្រូវភ្លើងឆាបឆេះរលាកពេញខ្លួនរបួសធ្ងន់ ដោយសារបញ្ឆេះម៉ូតូ ហើយចេញអណ្តាតភ្លើងប៉ះដបសាំងផ្ទុះឆេះកាលពីរសៀលថ្ងៃចន្ទនៅក្នុងភូមិចំបក់ ឃុំប្រាសាទ ស្រុកកំពង់ត្របែក។
លោក សួន សំអឿន អធិការស្រុកកំពង់ត្របែកបានឲ្យដឹងថា កុមារារងគ្រោះឈ្មោះ ឈួ ម៉េងជឺ អាយុ ៥ ឆ្នាំ និងឈ្មោះ ឈួ សៀវអេង ភេទស្រី អាយុ ២ ឆ្នាំ ពួកគេជាកូនម្ចាស់តូបជួសជុលម៉ូតូកើតហេតុខាងលើ។ លោកប្រាប់ថា៖ «កុមារាដែលស្លាប់នោះត្រូវភ្លើងឆាបឆេះរលាកពេញខ្លួន និងភ្លើងឆាបរលាកដល់ប្អូនស្រីគេទៀត។ គាត់ស្លាប់ពេលបញ្ជូនដល់មន្ទីរពេទ្យបង្អែកស្រុកកំពង់ត្របែក»។
លោកប្រាប់តាមសម្តីសាក្សីនៅកន្លែងកើតហេតុថា ទីតាំងកើតហេតុមានតូបមួយដែលធ្វើសម្រាប់លក់សាំងដប និងជួសជុលម៉ូតូ។ មុនពេលកើតហេតុនៅវេលាម៉ោង ១២ និង ៤៥ នាទី គេឃើញម្ចាស់តូបដែលជាជាងជួសជុលម៉ូតូបានបញ្ឆេះម៉ូតូ ខណៈដែលក្មេងរងគ្រោះនៅក្បែរនោះដែរ ហើយក៏មានសាំងច្រកដបដាក់តម្រៀបនៅលើតុសម្រាប់លក់ដែរ។ នៅពេលបញ្ឆេះម៉ូតូនោះ គ្មានអ្នកណាមួយចាប់អារម្មណ៍ថាអាចកើតមានគ្រោះថ្នាក់អីទេ ព្រោះការងារបែបនេះតែងប្រព្រឹត្តទៅរាល់ថ្ងៃដូចសព្វមួយដងដែរ។
សាក្សីនិយាយទៀតថា ម៉ូតូ ១ គ្រឿង ដែលបញ្ឆេះនោះត្រូវបានគេយកទៅជួសជុល ហើយបញ្ឆេះវាមិនឆេះ ខណៈនោះពេលកំពុងបញ្ឆេះ ស្រាប់តែម៉ូតូនោះឆេះ ហើយចេញជាអណ្តាតភ្លើងប៉ើងទៅប៉ះដបសាំងបណ្តាលឲ្យឆាបឆេះតែម្តង។
ភ្លាមៗនោះបានរាលដាលឆាបឆេះដល់កុមារារងគ្រោះ ហើយរូបគេបានស្ទុះចូលក្នុងតូបនោះទាំងភ្លើងកំពុងឆេះធ្វើឲ្យប្រជាពលរដ្ឋនៅក្បែរនោះនាំគ្នាជួយពន្លត់ ហើយប្រញាប់ប្រញាល់ដឹកក្មេងប្រុសរងគ្រោះទៅមន្ទីរពេទ្យបង្អែកស្រុកកំពង់ត្របែក ដើម្បីសង្គ្រោះបន្ទាន់ តែដោយអំណាចកម្ដៅភ្លើងសាំងរលាកពេញខ្លួនខ្លាំងពេក ក្មេងរងគ្រោះក៏ដាច់ខ្យល់ស្លាប់ទៅ។
ដោយឡែកក្មេងស្រីរងគ្រោះក៏ត្រូវភ្លើងសាំងឆាបឆេះរលាកពេញខ្លួនដែរ ប៉ុន្តែរបួសធ្ងន់ និងកំពុងទទួលការសង្ក្រោះបន្ទាន់ពីគ្រូពេទ្យ។ លោកបានបញ្ជាក់ថា ក្រោយកើតហេតុសមត្ថកិច្ចបានធ្វើកោសល្យវិច័យលើសាកសពក្មេងប្រុសរងគ្រោះបង្ហាញថា ពិតជាស្លាប់ដោយត្រូវភ្លើងឆេះមែន។ ចំពោះតូបដែលជាទីតាំងកើតហេតុនោះមិនបានឆេះទេ គ្រាន់តែខូចខាតទ្រព្យសម្បត្តិបន្តិចបន្តួចប៉ុណ្ណោះ៕