.jpg)
ដងស្ទូចគ្រឿងចក្ររលំបង្កគ្រោះថ្នាក់ដល់មន្ត្រីទូតអាមេរិក និងខូចរថយន្តថ្ងៃទី ៤ កុម្ភៈ។ ហេង ជីវ័ន
ភ្នំពេញៈ អ្នកពាក់ព័ន្ធការដ្ឋានសំណង់ខ្មែរ-ចិន ៣ នាក់ ត្រូវបានសមត្ថកិច្ចបញ្ជូនទៅសាលាដំបូងរាជធានីភ្នំពេញកាលពីថ្ងៃទី ៥ ខែកុម្ភៈ ករណីរលំដងសន្ទូចគ្រឿងចក្រធ្លាក់ត្រូវរថយន្តស្ថានទូតអាមេរិក និងរបួសមន្ត្រីស្ថានទូតម្នាក់កាលពីរសៀលថ្ងៃទី ៤ ខែកុម្ភៈនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
លោក ប៊ុន សត្យា ប្រធានការិយាល័យព្រហ្មទណ្ឌនៃស្នងការដ្ឋាននគរបាលរាជធានីភ្នំពេញប្រាប់ភ្នំពេញប៉ុស្តិ៍ពីម្សិលមិញថា ករណីមនុស្សពាក់ព័ន្ធការដ្ឋានសំណង់មានខ្មែរ និងចិននោះត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញហើយនៅថ្ងៃទី ៥ កុម្ភៈ ដើម្បីប្រគល់ជូនតុលាការចាត់ការតាមច្បាប់។
លោកថ្លែងថា៖ «ពួកគាត់កំពុងត្រូវអយ្យការអមសាលាដំបូងរាជធានីភ្នំពេញចាត់ការសាកសួរបន្តហើយ»។
អ្នកនាំពាក្យសាលាដំបូងរាជធានី-ភ្នំពេញលោក គុជ គឹមឡុង បញ្ជាក់ពីម្សិលមិញថា ជនពាក់ព័ន្ធទាំង ៣ នាក់ក្នុងករណីរលំដងសន្ទូចគ្រឿងចក្រនេះកំពុងត្រូវបានតុលាការសាកសួរ។
យោងតាមមន្ត្រីតុលាការដែលស្រង់សម្តីដោយ Fresh News បានឲ្យដឹងថា អ្នកពាក់ព័ន្ធទាំង ៣ នាក់នោះរួមមាន ឈ្មោះ Fan Yuang Hang ភេទប្រុស អាយុ ៤១ ឆ្នាំជនជាតិចិនស្នាក់នៅក្នុងកន្លែងការដ្ឋានសំណង់កើតហេតុ។ ឈ្មោះ ZHang Jing Zhu ភេទប្រុស អាយុ ៤៩ ឆ្នាំ ជាមេការខួងដី និងដងសន្ទូចរបស់ក្រុមហ៊ុន ហ៊ុយប៉ាង កាន់លិខិតឆ្លងដែនលេខ EE3484029។ ឯម្នាក់ទៀតឈ្មោះ ញឹច សុខា ភេទប្រុស អាយុ ២២ ឆ្នាំ ជនជាតិខ្មែរជាអ្នកបញ្ជាដងសន្ទូច។
ពាក់ព័ន្ធករណីនេះដែរលោក ថេង សុថុល អភិបាលខណ្ឌ ចំការមនថ្លែងថា ជុំវិញបញ្ហានេះ សមត្ថកិច្ចធ្វើការពាក់ព័ន្ធនឹងការងារជំនាញជាអ្នកឃាត់ខ្លួន។ រីឯការងារសាងសង់ អាជ្ញាធរដែនដីមានភារកិច្ចផ្នែកត្រួតពិនិត្យលើសំណង់មានច្បាប់ ឬគ្មានច្បាប់។ ចំពោះអគារសំណង់ដែលមានបញ្ហានេះត្រូវផ្អាកការសាងសង់ជាបណ្តោះអាសន្នសិន ដើម្បីរង់ចាំការដោះស្រាយហើយម្យ៉ាងវាពាក់ព័ន្ធនឹងមន្ត្រីស្ថានទូតអាមេរិក។ ដូច្នេះក្នុងនាមអាជ្ញាធរដែនដីត្រូវតែធ្វើការនេះឲ្យបានច្បាស់លាស់ដែលត្រូវឃាត់ខ្លួនមេការសំណង់នោះប្រគល់ទៅផ្នែកសន្តិសុខ (នគរបាល) ជាអ្នកចាត់ការ។
លោកបន្តថា តាមពិតទៅការដ្ឋានសំណង់នោះមិនទាន់បានសាងសង់អ្វីឡើងទៅលើទេ និងទើបតែចាប់ផ្តើមចាក់គ្រឹះផ្នែកខាងក្រោមដីហើយនៅលើដីក៏មិនទាន់មានអ្វីដែរ តែបានបញ្ចប់គ្រឹះខាងក្រោមដីហើយ។ ប៉ុន្តែការដ្ឋានសំណង់នោះគឺលោកបានស្រាវជ្រាវ និងពិនិត្យឃើញថា សំណង់នោះមានច្បាប់អនុញ្ញាតសាងសង់ និងច្បាប់បើកការដ្ឋានត្រឹមត្រូវ តែដោយសារជួបបញ្ហាបែបនេះអាជ្ញាធរត្រូវផ្អាកការសាងសង់បណ្តោះអាសន្នសិន។
លោកបញ្ជាក់ថា៖ «នៅក្នុងឡាននោះមានជនជាតិអាមេរិកដែលជាមន្ត្រីស្ថានទូត ប៉ុន្តែគាត់របួសស្រាលទេដោយសារខ្សែកាបវាត់ត្រូវកញ្ចក់ហើយកញ្ចក់បែកលើគាត់»។
លោក សុខ សំអ៊ុត នាយនគរបាលប៉ុស្តិ៍សង្កាត់ទន្លេបាសាក់ប្រាប់ថាករណីនេះកើតឡើងនៅវេលាម៉ោង ៩ ព្រឹកថ្ងៃទី ៤ ខែកុម្ភៈស្ថិតនៅចំណុចសំណង់អគារខុនដូ ផ្លូវថ្មី សង្កាត់ទន្លេបាសាក់ ខណ្ឌចំការមន រាជធានីភ្នំពេញ ប៉ុន្តែសមត្ថកិច្ចទៅមិនទាន់ហេតុការណ៍នោះទេ។ ប៉ុន្តែបើតាមសាក្សីនៅកន្លែងកើតហេតុ និងពីប្រភពព័ត៌មានដែលសមត្ថកិច្ចប្រមូលបានគឺជនរងគ្រោះជាមន្ត្រីស្ថានទូតអាមេរិកត្រូវរបួសដៃដោយសារកញ្ចក់រថយន្តខ្ទាតត្រូវ។
ពាក់ព័ន្ធវិស័យសំណង់នេះលោក សុខ គីន ប្រធានសហព័ន្ធសហជីពសំណង់ ថ្លែងថាតាមដែលលោកពិនិត្យមើលទៅវិស័យសំណង់នៅតែមានបញ្ហាជាបន្តបន្ទាប់ ដូចជាករណីបញ្ហាគ្រោះថ្នាក់ការងារ បញ្ហាគុណភាពសំណង់ ដែលក្រុមហ៊ុនសាងសង់មួយចំនួនគាត់ប្រើប្រាស់សម្ភារដោយគ្មានការត្រួតពិនិត្យច្បាស់លាស់។ បញ្ហាទាំងអស់នេះហើយដែលបណ្តាលឲ្យមានបញ្ហាប្រឈមគ្រោះថ្នាក់នៅកន្លែងការងារសំណង់។ ប៉ុន្តែរយៈពេលចុងក្រោយនេះរាជរដ្ឋាភិបាលកម្ពុជាបានព្យាយាមប្រឹងប្រែងរកវិធីសាស្ត្រក្នុងការទប់ស្កាត់គ្រោះថ្នាក់ក៏ដូចជាបញ្ហាដែលបានជួបប្រទះកន្លងមក។
លោកថ្លែងថា៖ «ខ្ញុំយល់ថា ឥឡូវនេះឃើញមានអគារមួយចំនួនដែលគណៈកម្មការស្រាវជ្រាវឃើញថាខុសបច្ចេកទេសហើយអគារទាំងអស់នោះត្រូវផ្អាក។ នេះជាយន្តការមួយដ៏ល្អសម្រាប់ភាគីពាក់ព័ន្ធ»៕
