.jpg)
សមត្ថកិច្ចពេលពិនិត្យសពនារីរងគ្រោះកន្លងមក។ ប៉ូលិស
ភ្នំពេញៈ មន្ត្រីនគរបាលក្រសួងមហាផ្ទៃបានឱ្យដឹងថាសមត្ថកិច្ចត្រូវបញ្ជូនបុរសជនសង្ស័យជាតិចិនម្នាក់ទៅសាលាដំបូងភ្នំពេញនៅថ្ងៃពុធ (ទី ២៤ កក្កដា) នេះ បន្ទាប់ពីបានសាកសួររួចពាក់ព័ន្ធនឹងករណីសម្លាប់សង្សារជាតិចិនដូចគ្នារួចដុតសាកសពចោល ប្រព្រឹត្តនៅភ្នំពេញកាលពីខែមិថុនា។
លោក ង៉េង ជួ ប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ បានប្រាប់ភ្នំពេញប៉ុស្តិ៍ពីម្សិលមិញថា ក្រោយពីឃាត់ខ្លួន ជនសង្ស័យបានសារភាព ហើយសមត្ថកិច្ចបានចោទគាត់ពីបទមនុស្សឃាត។
លោក ង៉េង ជួ បញ្ជាក់ថា៖ «គាត់សារភាពហើយថា គាត់ពិតជាបានសម្លាប់សង្សាររបស់គាត់មែន»។
តាមហ្វេសប៊ុកនាយកដ្ឋាននគរបាលព្រហ្មទណ្ឌបានឲ្យដឹងថាជនសង្ស័យមានឈ្មោះ Yang Yang អាយុ ២៨ ឆ្នាំ បានសម្លាប់សង្សារខ្លួនឯងទាំងមានកូនក្នុងផ្ទៃ ១ ខែរួចដុតសាកសពចោលនៅក្បែរស្ពានព្រែកព្នៅខណ្ឌជ្រោយចង្វារកាលពីយប់ថ្ងៃទី ២៩ ខែមិថុនា ហើយត្រូវបានចាប់ខ្លួនកាលពី ២២ កក្កដានៅក្រុមហ៊ុន THE PARK WAY ផ្លូវលេខ ២៧៣ សង្កាត់ទួលសង្កែទី១ ខណ្ឌឫស្សីកែវ បន្ទាប់ពីគេចខ្លួនមួយរយៈក្រោយធ្វើសកម្មភាព។
ហ្វេសប៊ុកនគរបាលដដែលថា តាមចម្លើយសារភាពរបស់ជនសង្ស័យថា គេបានចូលមកកម្ពុជានៅឆ្នាំ ២០១៦ ហើយបានធ្វើការក្នុងក្រុមហ៊ុន THE PARK WAY និងបានស្គាល់គ្នាជាមួយនារីរងគ្រោះឈ្មោះ Miao Xiaolin ក្នុងឆ្នាំ ២០១៨ ហើយក៏ស្រឡាញ់គ្នាជាសង្សារ។
ហ្វេសប៊ុកបន្តថា នៅថ្ងៃទី២៩ ខែមិថុនា ឆ្នាំ ២០១៩ ជនសង្ស័យបានឲ្យនារីរងគ្រោះរម្លូតកូនចេញពីព្រោះគេមានប្រពន្ធរួចហើយ ប៉ុន្តែនាងមិនព្រមក៏ឈ្លោះគ្នា ហើយជនសង្ស័យបានច្រានជនរងគ្រោះឲ្យដួលលើឥដ្ឋសន្លប់ហើយខ្លួនបានយកកន្សែងពោះគោរឹតកសម្លាប់។
បើតាមហ្វេសប៊ុកដដែលថាបន្ទាប់មកជនសង្ស័យបានទៅទិញវ៉ាលីសមួយនៅផ្សារថ្មីយកមកដាក់សាកសព។ លុះដល់ម៉ោងប្រហែល ៨ យប់ ថ្ងៃកើតហេតុខ្លួនក៏ដឹកវ៉ាលីសមានសាកសពតាមរថយន្តម៉ាក LexusRX330 ពណ៌សពាក់ស្លាកលេខភ្នំពេញ 2AM1334 និងទិញសាំង ១ ដប ធ្វើដំណើរទៅដុតចោលនៅចំណុចដីឡូតិ៍លីយ៉ុងផាត់ហើយគេចខ្លួនទៅប្រទេសចិននៅថ្ងៃទី ៦ ខែកក្កដា ឆ្នាំ ២០១៩។
លោក គង់ ប៊ុនលី ចៅសង្កាត់បាក់ខែងធ្លាប់បានប្រាប់ភ្នំពេញប៉ុស្តិ៍កាលពីថ្ងៃទី ៣០ មិថុនាថា សពមានសភាពដេកផ្កាប់មុខ ត្រូវជនដៃដល់ដុតឆេះខ្លោចដៃ និងជើងរាលដល់ត្រឹមជង្គង់។
លោកថា តាមសាក្សីជាក្រុមកម្មករបូមខ្សាច់នៅក្បែរនោះថា ហេតុការណ៍នេះកើតឡើងនៅម៉ោងជាង ៩ យប់ ថ្ងៃទី ២៩ ខែ មិថុនា ដោយពេលនោះពួកគេបានឃើញពន្លឺភ្លើងឆេះក៏ទៅមើលឃើញគេដុតសាកសពហើយបានប្រាប់ថៅកែបូមខ្សាច់ និងបានទូរស័ព្ទប្រាប់សមត្ថកិច្ចតែម្តង។ ប៉ុន្តែមុនពេលពួកគេទៅដល់កន្លែងភ្លើងឆេះបានឃើញរថយន្តម៉ាកឡិចស៊ិស RX330 ពណ៌ស ១ គ្រឿងបើកចេញពីម្ដុំនោះ ដោយមិនបើកភ្លើងចង្កៀងផងដែរ៕
