ឧត្តរមានជ័យៈ នគរបាលព្រហ្មទណ្ឌខេត្តឧត្តរមានជ័យបានកសាងសំណុំរឿងបញ្ជូនបុរសម្នាក់ទៅសាលាដំបូងខេត្តកាលពីម្សិលមិញ បន្ទាប់ពីចាប់ខ្លួនកាលពីថ្ងៃទី ១៨ ខែឧសភា ពាក់ព័ន្ធករណីចាប់រំលោភសេពសន្ថវៈយុវតីម្នាក់រួចសម្លាប់ ប្រព្រឹត្តកាលពីថ្ងៃទី ១៥ ឧសភា នៅឃុំក្រសាំង ស្រុកចុងកាល់ ខេត្តឧត្តរមានជ័យ។
លោក យិន ណារ៉េត ប្រធានការិយាល័យព្រហ្មទណ្ឌកម្រិតធ្ងន់ខេត្តឧត្តរមានជ័យប្រាប់ ភ្នំពេញ ប៉ុស្តិ៍ កាលពីថ្ងៃ ១៨ ឧសភាថា ជនសង្ស័យឈ្មោះ អឿម សារី ហៅ ស្រី អាយុ ២៣ ឆ្នាំ។ ចំណែកយុវតីរងគ្រោះ ឈ្មោះ ង.ស.ណ អាយុ ១៧ ឆ្នាំ (ឈប់រៀន) ពួកគេរស់នៅក្នុងឃុំក្រសាំង ស្រុកចុងកាល់ ខេត្តឧត្តរមានជ័យ។
លោកប្រាប់ថា៖ «យើងមិនត្រូវការរកបក្ខពួកអីទេ ព្រោះជនសង្ស័យសារភាពថា គេធ្វើសកម្មភាពម្នាក់ឯង ហើយមានភ័ស្តុតាងស៊ីចង្វាក់នឹងចម្លើយសារភាពផង។ ដូច្នេះយើងមិនលំបាកក្នុងការប្រើពេលវេលាស្រាវជ្រាវច្រើនទេ។ រឿងនេះគាត់ថា គាត់ពិតជាបានប្រព្រឹត្តលើនារីរងគ្រោះមែន»។
លោកបានបន្តថា ក្រោយពេលសាកសួរ និងកសាងសំណុំរឿងរួច សមត្ថកិច្ចត្រូវបញ្ជូនជនសង្ស័យទៅតុលាការនៅរសៀលថ្ងៃទី ១៩ ឧសភា ដើម្បីចាត់ការបន្តតាមនីតិវិធីច្បាប់។
លោក ណារ៉េត បានរៀបរាប់តាមសម្ដីសាច់ញាតិជនរងគ្រោះថា យុវតីរូបនេះ ត្រូវបានម្តាយស្លាប់ចោល ហើយឪពុករបស់នាងបានយកប្រពន្ធថ្មីទៀត ដើម្បីបានមើលថែរក្សាកូនក្នុងគ្រួសារក្រីក្រដែលមានកូន ៤ នាក់ ក្នុងនោះមានស្រី ៣ នាក់។
ចំណែកយុវតីរងគ្រោះ ជាកូនពៅ រីឯបងប្រុសបន្ទាប់របស់នាងជាមនុស្សសរសៃប្រសាទ។ រវាងយុវតីរងគ្រោះ និងជនសង្ស័យគឺជាមនុស្សស្គាល់គ្នា ព្រោះជាអ្នករស់នៅក្នុងភូមិតែមួយ តែមិនធ្លាប់មានទំនាក់ទំនងស្នេហាអ្វីជាមួយគ្នាទេ។
លោកបានបន្តថា ចំពោះជនសង្ស័យបានឆ្លើយថា នៅព្រឹកថ្ងៃកើតហេតុ ថ្ងៃទី ១៥ ឧសភា គេបានឃើញនារីរងគ្រោះជិះកង់តែម្នាក់ឯងទៅរកបេះផ្លែព្រីងក្នុងព្រៃដាច់ស្រយាលដែលមានចម្ងាយពីភូមិប្រមាណជា ១០ គីឡូម៉ែត្រ ដោយនាងបានទុកកង់ចោលនៅលើផ្លូវលំដីក្រហម។ ខណៈនោះជនសង្ស័យបានជិះម៉ូតូទៅតាមក្រោយ ហើយដោយសារឃើញនៅក្នុងព្រៃស្ងាត់ល្អ ជនសង្ស័យក៏បានចាប់ជនរងគ្រោះសម្រាត ហើយរំលោភសេពសន្ថវៈរហូតបានសម្រេចតែម្តង។
បើតាមលោក ណារ៉េត ក្រោយពីចាប់រំលោភបានសម្រេចរួចហើយ ជនសង្ស័យបានចាប់ជនរងគ្រោះអូសទៅត្រពាំងទឹកនៅក្បែរនោះ ហើយបានយកអាវក្រៅរបស់នាងរុំមុខ រួចចាប់ក្បាលជនរងគ្រោះជ្រមុជចូលក្នុងទឹកត្រពាំងជម្រៅត្រឹមចង្កេះមនុស្សចាស់។
បន្ទាប់ពីដឹងថា ជនរងគ្រោះស្លាប់ ក្រោយពេលជ្រមុជចូលទឹកបានប្រមាណជាកន្លះម៉ោង ជនសង្ស័យក៏បានលើកសាកសព ហើយរុញទៅលាក់នៅក្នុងគុម្ពោធព្រៃក្នុងត្រពាំងទឹកដដែលនោះ។
លោកបន្តថា បន្ទាប់មកទៀតជនសង្ស័យបានយកកង់កញ្ចាស់របស់ជនរងគ្រោះទៅទម្លាក់ក្នុងស្រះទឹក ១ កន្លែងទៀតដែលមានចម្ងាយប្រមាណជា ២០០ ម៉ែត្រពីកន្លែងកើតហេតុ រួចក៏ជិះម៉ូតូត្រឡប់មកភូមិវិញ។
ចំណែកសាច់ញាតិជនរងគ្រោះ ដោយសារបាត់មុខមិនឃើញនាងត្រឡប់មកផ្ទះវិញ ក៏មានការឆោឡោផ្អើលដល់អ្នកភូមិ ទើបមានការជួយស្វែងរកដល់កន្លែងកើតហេតុ ហើយពេលចុះរាវក្នុងត្រពាំងទឹក ទើបរកឃើញសាកសពយុវតីរងគ្រោះនៅក្នុងគុម្ពោតព្រៃតែម្ដង។
លោកបន្តទៀតថា ក្រោយរកសាកសពឃើញ សមត្ថកិច្ចជំនាញព្រហ្មទណ្ឌនៃស្នងការដ្ឋាននគរបាលខេត្តឧត្តរមានជ័យបានបើកការស្រាវជ្រាវកំណត់មុខសញ្ញាជនសង្ស័យបាន ហើយក៏ដាក់កម្លាំងឃ្លាំមើលនៅក្នុងភូមិដែលជនសង្ស័យ និងជនរងគ្រោះរស់នៅ។
លុះដល់ព្រឹកថ្ងៃទី ១៨ ឧសភា ប្រហែលជាជនសង្ស័យដឹងខ្លួន ដោយសារឃើញនគរបាលដាក់កម្លាំងយាមតាមគោលដៅគេក៏ព្យាយាមជិះម៉ូតូគេចចេញពីភូមិ តែត្រូវសមត្ថកិច្ចរបស់លោកចាប់បាននៅតាមផ្លូវតែម្តង។
លោកបន្ថែមថា ក្រោយចាប់ខ្លួនគឺសមត្ថកិច្ចបានឱ្យជនសង្ស័យនាំទៅរកវត្ថុតាងនៅកន្លែងកើតហេតុដែលរួមមាន កង់កញ្ចាស់របស់ជនរងគ្រោះ ១ ខោលីអូ ១ និងអាវក្នុងដែលជនសង្ស័យសម្រាតហើយលាក់ទុកក្នុងព្រៃ។ ដូច្នេះដោយផ្អែកលើភ័ស្តុតាង និងចម្លើយសារភាពរបស់ជនសង្ស័យគឺស៊ីចង្វាក់គ្នាដែលបញ្ជាក់ថាជនសង្ស័យពិតជាបានរំលោភសម្លាប់យុវតីរងគ្រោះពិតមែន៕