.jpg)
ជនសង្ស័យក្រោយពេលសមត្ថកិច្ចចាប់ខ្លួនបាន។ រូបថត ប៉ូលិស
កណ្ដាលៈ សមត្ថកិច្ចព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្តាលកាលពីម្សិលមិញបានបញ្ជូនជនសង្ស័យម្នាក់ក្នុងចំណោម ៣ នាក់ ទៅសាលាដំបូងខេត្តក្រោយពីតាមចាប់ខ្លួនបានពីថ្ងៃទី ២០ មិថុនា ពាក់ព័ន្ធករណីព្រួតវាយបុរសម្នាក់បណ្ដាលឲ្យស្លាប់កាលពីថ្ងៃទី ១១ មិថុនា នៅភូមិអំពិលដាំទឹក ឃុំវិហារលួង ស្រុកពញាឮ ខេត្តកណ្តាល។
លោក រឿន ណារ៉ា ស្នងការរងទទួលផែនព្រហ្មទណ្ឌខេត្តកណ្តាលប្រាប់ភ្នំពេញប៉ុស្ដិ៍ពីម្សិលមិញថា ជនសង្ស័យរូបនេះឈ្មោះ ស៊ី ណាត អាយុ ៣៣ ឆ្នាំ ជាកម្មករសំណង់មានលំនៅក្នុងភូមិធ្លូកអណ្តូង ឃុំស្លក្រាម ក្រុង-ខេត្តសៀមរាប។ ជននេះត្រូវបានសមត្ថកិច្ចលោកបញ្ជូនទៅសាលាដំបូងខេត្តកណ្តាលនៅថ្ងៃទី ២២ មិថុនា ក្រោយពីបំពេញសំណុំរឿងចប់។
លោកបានបន្តថា ជនសង្ស័យ និងបក្ខពួកបានរត់គេចខ្លួនភ្លាមៗបន្ទាប់ពីវាយជនរងគ្រោះកាលពីយប់ថ្ងៃទី ១១ មិថុនា នៅស្រុកពញាឮ ខេត្តកណ្ដាល តែត្រូវសមត្ថកិច្ចរបស់លោកសហការជាមួយនគរបាលខេត្តសៀមរាបស្រាវជ្រាវចាប់ខ្លួនបានម្នាក់នៅភូមិកំណើតរបស់គេកាលពីថ្ងៃទី ២០ ខែមិថុនា។
លោកថ្លែងថា៖ «ក្រោយឃាត់ខ្លួន និងបញ្ចប់កិច្ចការសាកសួររួចរាល់គឺជនសង្ស័យត្រូវបានកសាងសំណុំរឿងបញ្ជូនទៅតុលាការនៅថ្ងៃនេះ (២២ មិថុនា)។
នៅមានជនសង្ស័យផ្សេងទៀតដែលសមត្ថកិច្ចខ្ញុំនឹងធ្វើកិច្ចការនេះបន្តទៀត»។
លោក ពេញ វុទ្ធី នាយផ្នែកព្រហ្មទណ្ឌនៃអធិការដ្ឋាននគរបាលស្រុកពញាឮបានឲ្យដឹងពីថ្ងៃទី ២១ មិថុនា ដែរថា តាមព័ត៌មានពីគ្រួសារជនរងគ្រោះទាំងជនរងគ្រោះ និងក្រុមជនសង្ស័យមានស្រុកកំណើតនៅខេត្តសៀមរាប។ ប៉ុន្តែពួកគេបានមកធ្វើសំណង់នៅស្រុកពញាឮខេត្តកណ្តាល។ លុះនៅយប់ថ្ងៃទី ១១ មិថុនា គ្នីគ្នាជនរងគ្រោះ ៣ នាក់ បានឲ្យលុយទៅជនរងគ្រោះដើម្បីទិញម្ហូប តែជនរងគ្រោះបែរជាទិញស្រាមកផឹក។
លោកបន្តថា ពេលនោះក្រុមជនសង្ស័យបានស្ដីបន្ទោសក៏ទាស់សម្តីគ្នាហើយក្រុមជនសង្ស័យបានយកដែកគាស់ និងចបជីកវាយជនរងគ្រោះបណ្តាលឲ្យរបួសធ្ងន់។ បន្ទាប់មកក្រុមជនសង្ស័យបានអូសជនរងគ្រោះទៅកន្លែងផ្សេងរួចគេចខ្លួន។
លោកថា ពួកគាត់វាយជនរងគ្រោះដួលហើយក៏លើកជនរងគ្រោះទៅកន្លែងផ្សេង និងយកប៉ែលចូកខ្សាច់លុបឈាម ដើម្បីបំបិទភ័ស្តុតាងហើយនាំគ្នាគេចខ្លួនអស់»។
លោកបានបន្តថា ភ្លាមនោះជនរងគ្រោះមិនទាន់ស្លាប់ទេ។
លុះព្រឹកឡើងថ្ងៃទី ១២ មិថុនា ម្ចាស់ការដ្ឋានសំណង់បានរាយការណ៍មកសមត្ថកិច្ចរបស់លោកទើបសមត្ថកិច្ចបានយកជនរងគ្រោះទៅមន្ទីរពេទ្យបង្អែកស្រុកពញាឮ ដើម្បីសង្គ្រោះ។ ប៉ុន្តែបន្ទាប់ពីព្យាបាលបាន ១ យប់គ្រូពេទ្យប្រាប់សាច់ញាតិជនរងគ្រោះថា អ្នកជំងឺមានសភាពធ្ងន់ធ្ងរ ទើបក្រុមគ្រួសារដឹកទៅស្រុកកំណើតនៅខេត្តសៀមរាប តែគាត់បានដាច់ខ្យល់ស្លាប់នៅពាក់កណ្ដាលផ្លូវ។
លោកបានបញ្ជាក់ថា ករណីនេះសមត្ថកិច្ចបានស្គាល់អត្តសញ្ញាណក្រុមជនសង្ស័យអស់ហើយ ប៉ុន្តែមិនទាន់អាចបញ្ជាក់ប្រាប់ឈ្មោះក្រុមជនសង្ស័យបានទេ ព្រោះសមត្ថកិច្ចកំពុងធ្វើការងារនេះបន្តទៀត៕
