.jpg)
ជនសង្ស័យត្រូវបានសមត្ថកិច្ចឃាត់ខ្លួន ករណីចេញសែកគ្មានសាច់ប្រាក់។ រូប FN
ភ្នំពេញៈ សមត្ថកិច្ចការិយាល័យកម្រិតស្រាលនៃនាយកដ្ឋានព្រហ្មទណ្ឌអគ្គស្នងការដ្ឋាននគរបាលជាតិកាលពីម្សិលមិញបានបញ្ជូនបុរសម្នាក់ទៅសាលាដំបូងរាជធានីភ្នំពេញ បន្ទាប់ពីចាប់ខ្លួននៅរាជធានីភ្នំពេញកាលពីថ្ងៃទី ៥ មេសា ឆ្នាំ ២០២០ ពាក់ព័ន្ធនឹងករណីចេញសែកអត់សាច់ប្រាក់ចំនួន ១៥០ ០០០ ដុល្លារ។
ក៏ប៉ុន្តែលោកឧត្តមសេនីយ៍ ឆាយ គឹមខឿន អ្នកនាំពាក្យអគ្គស្នងការនគរបាលជាតិបានថ្លែងថា ជុំវិញការបញ្ជូនជនសង្ស័យទៅសាលាដំបូងរាជធានីភ្នំពេញនេះគឺលោកមិនទាន់បានទទួលរបាយការណ៍ពីនាយកដ្ឋានព្រហ្មទណ្ឌនៅឡើយទេ។
លោកថ្លែងថា៖ «ខ្ញុំមិនអាចឆ្លើយប្រាប់បានទេ ដោយសារខ្ញុំមិនទាន់បានរបាយការណ៍»។
ទោះយ៉ាងណាមន្ត្រីនៃនាយកដ្ឋានព្រហ្មទណ្ឌ ១ រូប ដែលសុំមិនបញ្ចេញឈ្មោះប្រាប់ភ្នំពេញប៉ុស្ដិ៍កាលពីម្សិលមិញថា លោកបានឃាត់ខ្លួន និងបញ្ចូនជនសង្ស័យម្នាក់ឈ្មោះ ផូ ណូរិន អាយុ ៤៦ ឆ្នាំទៅសាលាដំបូងរាជធានីភ្នំពេញរួចហើយនៅរសៀលថ្ងៃទី ៧ មេសា ប៉ុន្តែលោកមិនបានប្រាប់លម្អិតទេ ដោយគ្រាន់តែថា ឃាត់ខ្លួនជនសង្ស័យនេះគឺធ្វើឡើងតាមបណ្តឹងរបស់ជនរងគ្រោះដែលបានប្តឹងមកនាយកដ្ឋានព្រហ្មទណ្ឌនៃក្រសួងមហាផ្ទៃ។
លោកបានបញ្ជាក់ថា៖ «រឿងចាប់នេះខ្ញុំចង់បានស្នាដៃហើយ ប៉ុន្តែជាគោលការណ៍ខ្ញុំមិនអាចជម្រាបព័ត៌មាននេះជូនបានទេ»។
នៅពេលទាក់ទងសួរតាមតេឡេក្រាមទៅអយ្យការអមសាលាដំបូងរាជធានីភ្នំពេញ លោកព្រះរាជអាជ្ញារង គុជ គឹមឡុង ជុំវិញការចោទប្រកាន់ពីតុលាការលើជនសង្ស័យយ៉ាងណានោះ លោកមិនបានឆ្លើយតបទេរហូតដល់ពេលព្រលប់ថ្ងៃម្សិលមិញ។
ទាក់ទិននឹងការចេញសែកគ្មានសាច់ប្រាក់នេះបើតាមបណ្ដាញព័ត៌មាន Fresh News កាលពីម្សិលមិញបានសរសេរថា កម្លាំងនាយកដ្ឋាននគរបាលព្រហ្មទណ្ឌបានចាប់ខ្លួនជនសង្ស័យឈ្មោះ ផូ ណូរិន នៅថ្ងៃទី ៥ ខែមេសា បន្ទាប់ពីទទួលបានបណ្តឹងពីជនរងគ្រោះទាក់ទងនឹងរឿងចេញមូលប្បទានបត្រគ្មានប្រាក់សរុប ១៥០ ០០០ ដុល្លារ ដោយបណ្ដឹងនោះមានភ្ជាប់ទាំងឯកសារ សែកស្អុយមកធ្វើជាភ័ស្តុតាងផងដែរ។
បើតាម Fresh News ដែលយោងតាមប្រភពបានអះអាងថា ជនសង្ស័យខាងលើបានប្រើល្បិចបញ្ចុះបញ្ចូលឲ្យជនរងគ្រោះជឿទុកចិត្តលើខ្លួនទើបឈានដល់ប្រើកលល្បិចចេញសែកស្អុយបោកជនរងគ្រោះ ទើបជនរងគ្រោះដាក់ពាក្យបណ្តឹងឲ្យសមត្ថកិច្ចនគរបាលនាយកដ្ឋានព្រហ្មទណ្ឌក្រសួងមហាផ្ទៃចាត់ការតាមច្បាប់តែម្តង៕
