.jpg)
សមត្ថកិច្ចបង្ហាញខ្លួនជនសង្ស័យ ២ នាក់ និងគ្រឿងញៀនប្រភេទមេតំហ្វេតាមីនចំនួន ២០០ គីឡូក្រាម។ រូបថត ប៉ូលិស
ព្រះវិហារៈ កម្លាំងនគរបាលខេត្តព្រះវិហារពីម្សិលមិញបានបញ្ជូនជនប្រព្រឹត្តបទល្មើសជួញដូរ គ្រឿងញៀនឆ្លងដែន ២ នាក់ទៅសាលាដំបូងខេត្ត ដើម្បីមានចំណាត់ការបន្តតាមនីតិវិធីច្បាប់ បន្ទាប់ពីពួកគេត្រូវបានចាប់ខ្លួនជាមួយវត្ថុតាងគ្រឿងញៀនប្រភេទមេតំហ្វេតាមីនចំនួន ២០០ គីឡូក្រាម។
លោក ម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀនបានប្រាប់ភ្នំពេញប៉ុស្តិ៍នៅថ្ងៃអាទិត្យថា ជនប្រព្រឹត្តបទល្មើសគ្រឿងញៀនឆ្លងដែនទាំង ២ នាក់នោះ ត្រូវបានកម្លាំងសមត្ថកិច្ចជំនាញនៃមន្ទីរប្រឆាំងគ្រឿងញៀនក្រសួង មហាផ្ទៃ រួមសហការជាមួយកម្លាំង នគរបាលជំនាញនៃស្នងការដ្ឋាននគរបាលខេត្តព្រះវិហារ ចាប់ខ្លួននៅចំណុចកំពង់ស្រឡៅ ស្រុកឆែប ខេត្តព្រះវិហារ។
សមត្ថកិច្ចចាប់ខ្លួនជនទាំង ២ នេះកាលពីថ្ងៃទី ២៦ ខែ កក្កដា ឆ្នាំ ២០២០ បន្ទាប់ពីសមត្ថកិច្ច ឆែកឆេររកឃើញថ្នាំញៀនប្រភេទមេតំហ្វេតាមីនចំនួន ២០០ គីឡូក្រាម ដែលពួកគេបានដឹកជញ្ជូនតាមរ៉ឺម៉កកង់ ៣ ឥណ្ឌា។
ទោះយ៉ាងណាលោក ម៉ក់ ជីតូ មិនបានប្រាប់ឲ្យដឹងអំពីអត្តសញ្ញាណនៃជនសង្ស័យទាំង ២ នោះទេកាលពីម្សិលមិញ ដោយលោកថ្លែងថា៖ «នៅពេលនេះសមត្ថកិច្ចយើងកំពុងបន្តធ្វើការស្រាវជ្រាវរកបណ្ដាញរបស់ពួកគេ។ ដូច្នេះខ្ញុំសុំមិនប្រាប់ឲ្យដឹងអំពីអត្តសញ្ញាណរបស់ពួកគេទាំង ២ ជាបណ្ដោះអាសន្នសិន។ ពួកគេទាំង ២ គឺជាជនជាតិខ្មែរ ហើយគ្រឿងញៀនទាំង ២០០ គីឡូក្រាមនោះ គឺពួកគេនាំចូលពីប្រទេសឡាវតាមផ្លូវទឹក។ ពួកគេជាក្រុមចាស់ដែលសមត្ថកិច្ចយើងបានស្រាវជ្រាវ និងស្វែងរកចាប់ខ្លួនជាយូរមកហើយ»។
បើតាមមន្ត្រីនគរបាលជាន់ខ្ពស់រូបនេះ ការបង្ក្រាបចាប់ជនប្រព្រឹត្តបទល្មើសជួញដូរគ្រឿងញៀនឆ្លងដែន ២ នាក់នោះ កម្លាំងនគរបាលមន្ទីរប្រឆាំងគ្រឿងញៀនបានសហការជាមួយកម្លាំងជំនាញនៃស្នងការដ្ឋាននគរបាលរាជធានី-ខេត្តទាំងអស់។ ក្រៅពីនេះក៏មានការចូលរួមសម្របសម្រួលផ្នែកច្បាប់ពីតំណាងអយ្យការអមសាលាដំបូងរាជធានីភ្នំពេញ កំពង់ស្ពឺ និងខេត្តព្រះវិហារ។
លោកបន្តថា នៅពេលនេះជនប្រព្រឹត្តបទល្មើសគ្រឿងញៀនទាំង ២ រួមទាំងវត្ថុតាងគ្រឿងញៀន ម៉េតំហ្វេតាមីន ២០០ គីឡូក្រាម និងមធ្យោបាយដឹកជញ្ជូនរ៉ឺម៉កកង់៣ឥណ្ឌា ១ គ្រឿងត្រូវបានកម្លាំងនគរបាលជំនាញប្រឆាំងបទល្មើសគ្រឿងញៀន ខេត្តព្រះវិហារ កសាងសំណុំរឿងបញ្ជូនទៅតុលាការខេត្តព្រះវិហារ ដើម្បីមានចំណាត់ការបន្តតាមនីតិវិធី។
ជុំវិញករណីនេះលោកស្រី ជុំ កន្និយ៉ា ប្រធានលេខាធិការដ្ឋានសាលាដំបូងខេត្តព្រះវិហារបានប្រាប់ភ្នំពេញប៉ុស្តិ៍ពីថ្ងៃអាទិត្យថា ជនសង្ស័យ ២ នាក់ដែលពាក់ព័ន្ធសំណុំរឿងបទល្មើសជួញដូរគ្រឿងញៀនឆ្លងដែននោះ កំពុងស្ថិតក្រោមនីតិវិធីនៃការស៊ើបសួររបស់តុលាការនៅឡើយ។
គួរបញ្ជាក់ថា ការផលិត ចរាចរណ៍ ជួញដូរគ្រឿងញៀនលើពិភពលោក និងក្នុងតំបន់ត្រូវបានគេកត់សម្គាល់ឃើញថា នៅតែមានការប្រែប្រួលកើនឡើងឥតឈប់ឈរ ហើយល្បិចកលលួចលាក់ធ្វើសកម្មភាពរបស់ក្រុមឧក្រិដ្ឋជនគ្រឿងញៀនកាន់តែមានលក្ខណៈស្មុគស្មាញជាងមុន។
កត្តាទាំងនេះបានធ្វើឲ្យកម្ពុជានៅតែបន្តទទួលរងនូវឥទ្ធិពលដ៏អាក្រក់ និងការគំរាមកំហែងពីការចរាចរឆ្លងកាត់ និងហូរចូលគ្រឿងញៀនទាំងតាមផ្លូវគោក ផ្លូវទឹក ផ្លូវអាកាស និងតាមបញ្ញើប្រៃសណីយ៍ ក៏ដូចជាការប៉ុនប៉ងផលិតកែច្នៃគ្រឿងញៀន និងការរីករាលដាលនៃការប្រើប្រាស់គ្រឿងញៀននៅផ្ទៃក្នុងប្រទេស។
គិតចាប់ពីថ្ងៃទី ១ ខែមករា ដល់ថ្ងៃទី ៣១ ខែកក្កដា ឆ្នាំ ២០២០ កម្លាំងសមត្ថកិច្ចបានបង្ក្រាបករណីគ្រឿងញៀនសរុបនៅទូទាំងប្រទេសបានចំនួន ៦១៦៩ ករណី និងបានឃាត់ខ្លួនមនុស្សសរុបចំនួន ១២ ២៧៤ នាក់។ ក្នុងនោះមានស្រី្តចំនួន ៧៦៤ នាក់ និងមានជនបរទេសចំនួន ១៧៨ នាក់មាន ១៤ សញ្ជាតិ។ នេះបើយោងតាមរបាយការណ៍របស់សមត្ថកិច្ចបង្ក្រាបគ្រឿងញៀន ដែលភ្នំពេញ-ប៉ុស្តិ៍ទទួលបាននៅព្រឹកថ្ងៃទី ២ ខែសីហា ឆ្នាំ ២០២០។
វត្ថុតាងសារធាតុញៀនគ្រប់ប្រភេទដែលរឹបអូសបានមានចំនួនជាង ២៩០ គីឡូក្រាម និង ៧៨៩ កញ្ចប់តូច កញ្ឆាជាង ២៥០ គីឡូក្រាម និងសម្ភារចាប់យកមានរថយន្ដ ៧៦ គ្រឿង ម៉ូតូ ១ ៥២៩ គ្រឿង ទូរស័ព្ទ ៤ ២៩១ គ្រឿង ជញ្ជីង ២៧៦ គ្រឿង អាវុធខ្លី ១៦ ដើម អាវុធវែង ១៧ ដើម។
ដោយឡែក តុលាការប្រជាជនខេត្តតៃនិញប្រទេសវៀតណាមកាលពីថ្ងៃទី ៣១ ខែ កក្កដា ឆ្នាំ ២០២០ បានសម្រេចកាត់ទោសប្រហារជីវិតស្ត្រីខ្មែរម្នាក់ ឈ្មោះ មៀច ស្រីនាង អាយុ ២៧ ឆ្នាំ មានទីលំនៅក្នុងរាជធានីភ្នំពេញពីបទ «ជួញដូរគ្រឿងញៀនឆ្លងកាត់ព្រំដែនកម្ពុជា-វៀតណាម»។
នេះបើយោងតាមការផ្សាយរបស់ទីភ្នាក់ងារព័ត៌មានវៀតណាម VNA កាលពីថ្ងៃសុក្រសប្ដាហ៍មុន។ របាយការណ៍ព័ត៌មានរបស់ VNA បានរៀបរាប់ថា ស្ត្រីខ្មែររូបនោះត្រូវកម្លាំងសមត្ថកិច្ចនគរបាលវៀតណាមចាប់ឃាត់ខ្លួននៅព្រំដែនអន្តរជាតិបាវិត-ម៉ុកបៃ ក្នុងទឹកដីខេត្តតៃនិញកាលពីថ្ងៃទី ២ ខែធ្នូ ឆ្នាំ ២០១៩ បន្ទាប់ពីបានឆែកឆេររកឃើញថ្នាំញៀនប្រភេទម៉េតំហ្វេតាមីន ៥ កញ្ចប់ដែលមានទម្ងន់ជិត ៥ គីឡូក្រាម៕
