កំពង់ធំៈ នគរបាលខេត្តកំពង់ធំបានបញ្ជូនយុវជនសង្ស័យ ៣ នាក់ ទៅសាលាដំបូងខេត្តកាលពីរសៀលម្សិលមិញ បន្ទាប់ពីសមត្ថកិច្ចចាប់ខ្លួនពាក់ព័ន្ធអំពើមនុស្សឃាត ក្រោយពេលមានពិធីរាំធុងបាស់មួយកាលពីយប់ថ្ងៃទី ៧ មីនា នៅភូមិស្ពានគ្រង ឃុំចំណារក្រោម ស្រុកស្ទោង ខេត្តកំពង់ធំ។
លោក ទិត្យ សំណាង ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលខេត្តកំពង់ធំឱ្យដឹងពីម្សិលមិញថា ជនសង្ស័យទាំង ៣ នាក់ ទី១- ឈ្មោះ កុយ មករាអាយុ ២០ ឆ្នាំ ,ទី២- ឈ្មោះ ឡោម លុច អាយុ ២០ ឆ្នាំ និងឈ្មោះ នឿង សាញ់ អាយុ ២១ ឆ្នាំ។ រីឯយុវជនរងគ្រោះឈ្មោះ លន គង់ស៊ីអ៊ីម ហៅ ចើប អាយុ ១៩ ឆ្នាំជាកសិករ។ ពួកគេមានលំនៅភូមិជីអាប់ ឃុំចំណារក្រោម ស្រុកស្ទោង ខេត្តកំពង់ធំ។
លោកប្រាប់ថា ក្រុមជនសង្ស័យត្រូវសមត្ថកិច្ចរបស់លោកបញ្ជូនបន្តទៅសាលាដំបូងខេត្តកំពង់ធំនៅរសៀលថ្ងៃទី ១០ ខែមីនា បន្ទាប់ពីនគរបាលស្រុកស្ទោងបញ្ជូនពួកគេដល់ស្នងការដ្ឋាននគរបាលខេត្តកំពងធំបានប៉ុន្មានម៉ោង និងក្រោយពីសមត្ថកិច្ចលោកបញ្ចប់នីតិវីធីស៊ើបសួរ។
លោកថា៖ «រឿងនេះយើងមិនទាន់សន្មតថាមនុស្ស ៣ នាក់នេះជាអ្នកសម្លាប់ជនរងគ្រោះនៅឡើយទេ គ្រាន់តែថាអ្នកទាំង ៣ ស្ថិតក្នុងក្រុមមនុស្សបង្កបទល្មើសនោះឯង។ ព្រោះពេលនោះយប់ងងឹតមិនដឹងថានរណាជាជនដៃដល់ពិតប្រាកដទេ ដូច្នេះហើយយើងត្រូវការសួរពួកគេបន្តទៀត។ ធម្មតាពេលសមត្ថកិច្ចចាប់បានជនសង្ស័យមិនសូវប្រាប់សមត្ថកិច្ចអស់ទេ តែយ៉ាងណាតុលាការនឹងចាត់ការតាមនីតិវិធីបន្តទៀត»។
លោក វ៉ន សុភ័ណ អធិការរងនគរបាលស្រុកស្ទោងបានរៀបរាប់ពីម្សិលថា មុនកើតហេតុនៅក្នុងភូមិស្ពានគ្រងមានពិធីរាំធុងបាស់។ លុះចប់កម្មពិធីមនុស្សម្នាក៏ទៅផ្ទះរៀងៗខ្លួន។ ប៉ុន្តែមិនដឹងថា ក្រុមជនបង្ក និងក្រុមជនរងគ្រោះទាស់សម្តីគ្នាយ៉ាងណាទេក៏ស្រាប់តែណាត់មកវ៉ៃគ្នានៅថ្នល់ជាតិ ឆ្ងាយពីកន្លែងរាំជាង ១ គីឡូម៉ែត្រ។
លោកបន្តថា ពេលកំពុងវ៉ៃគ្នាស្រាប់តែជនរងគ្រោះឈ្មោះ លន គង់ស៊ីអ៊ីម បានជិះម៉ូតូម្នាក់ឯងមកដល់ ហើយគាត់ស្គាល់មនុស្សម្នាក់ក្នុងចំណោមទាំង ២ ក្រុមនេះ។ ពេលនោះជនរងគ្រោះបានចូលទៅឃាត់កុំឱ្យគេវ៉ៃបុរសដែលគាត់បានស្គាល់នោះ។ តែក៏ត្រូវគេវ៉ៃនឹងវត្ថុរឹងចំក្បាលផ្នែកខាងក្រោយបណ្តាលឱ្យរបួសធ្ងន់ ហើយត្រូវបានក្រុមគ្រួសារដឹកទៅសង្គ្រោះនៅមន្ទីរពេទ្យបង្អែកស្រុកស្ទោង តែបានស្លាប់ពេលបញ្ជូនដល់មន្ទីរពេទ្យ។
លោកប្រាប់ តាមសម្តីអ្នកឃើញហេតុការណ៍ថា៖ «ពេលនោះយប់ងងឹតមិនដឹងថា នរណាវ៉ៃត្រូវជនរងគ្រោះទេ ប៉ុន្តែបក្ខពួកបង្ក យើងចាប់បាន ៣ នាក់»។
បើតាមលោក សុភ័ណ ក្រោយកើតហេតុប្រមាណ ២០ នាទីសមត្ថកិច្ចស្រុកស្ទោង និងមានការដឹកនាំពីលោក ទិត្យ សំណាងស្នងការរងទទួលផែនព្រហ្មទណ្ឌបានចុះអន្តរាគមន៍ ហើយភ្លាមៗនោះក៏បានស្រាវជ្រាវឃាត់ខ្លួនបាន ៣ នាក់។ រីឯអ្នកពាក់ព័ន្ធផ្សេងទៀតបានគេចខ្លួនអស់ តែសមត្ថកិច្ចកំពុងបន្តតាមរកបក្ខពួកនៅឡើយ។
ករណីដោយឡែកមួយទៀតនៅយប់ថ្ងៃទី ៧ មីនានោះ ក៏មានសកម្មភាពវ៉ៃគ្នាកើតឡើងផងដែរ នៅក្នុងភូមិសង្គ្រោះ ឃុំបឹងល្វា ស្រុកសន្ទុក ខេត្តកំពង់ធំ បណ្ដាលឱ្យយុវជនម្នាក់ឈ្មោះ នៀត អាយុ ១៨ ឆ្នាំ ត្រូវគេកាប់របួសស្រាំលលាដ៍ក្បាល។ នេះបើតាមលោក ជា ពឿន នាយការិយាល័យព្រហ្មទណ្ឌកម្រិតធ្ងន់ខេត្តកំពង់ធំប្រាប់កាលពីម្សិលមិញ។
លោកបានឱ្យដឹងថា បច្ចុប្បន្នជនរងគ្រោះរូបនេះកំពុងត្រូវយកទៅសង្គ្រោះនៅមន្ទីរពេទ្យព្រះកុសុមៈ (ពេទ្យលោកសង្ឃ) ខណៈសមត្ថកិច្ចកំពុងស្រាវជ្រាវចាប់ខ្លួនជនសង្ស័យ៕