កណ្ដាលៈ បុរសជាជនសង្ស័យ ៤ នាក់ត្រូវកម្លាំងអាវុធហត្ថខេត្តកណ្ដាលកសាងសំណុំរឿងបញ្ជូនទៅសាលាដំបូងខេត្តកាលពីម្សិលមិញក្រោយពីឃាត់ខ្លួនបានជាបន្តបន្ទាប់នៅ ទីកន្លែងផ្សេងៗគ្នាចាប់ពីថ្ងៃ ១ កុម្ភៈដល់ថ្ងៃ ៣ កុម្ភៈ ពាក់ព័ន្ធនឹងករណីព្រួតគ្នាសម្លាប់មិត្តភក្ដិម្នាក់ប្រព្រឹត្តកាលពីថ្ងៃ ១២ មករា។
លោក ទូច អុីណាន មេបញ្ជាការរងកងរាជអាវុធហត្ថខេត្តកណ្តាលប្រាប់ភ្នំពេញប៉ុស្តិ៍កាលពីម្សិលមិញថា ក្រុមជនសង្ស័យពាក់ព័ន្ធនឹងអំពើឃាតកម្មនោះ ទី១- ឈ្មោះ ព្រំ វ៉ា់ដា អាយុ ៣១ ឆ្នាំ, ទី២- ឈ្មោះ ព្រំ សម្បត្ដិ (ហៅយួន) អាយុ ១៩ ឆ្នាំ,ទី៣- ឈ្មោះ ប៉ោង សំណាង (ហៅពៅ) អាយុ ១៨ ឆ្នាំ និងទី៤- ឈ្មោះ ម៉ម ហ័ត អាយុ ២៥ ឆ្នាំ។ រីឯបុរសរងគ្រោះឈ្មោះខនសារ៉ាត់អាយុ ១៩ ឆ្នាំ។
លោកប្រាប់ថា៖ «ក្រុមជនទាំង ៤ នាក់ បានសារភាពពីសកម្មភាពសម្លាប់ជនរងគ្រោះក្នុងរឿងគំនុំទំនាស់ពាក្យសម្តីគ្នា។ ពួកគេថា ជនរងគ្រោះនិយាយកុហក»។
លោករំឭក ប្រាប់តាមចម្លើយជនសង្ស័យថា ពួកគេជាមិត្តភក្ដិជាមួយគ្នា។ នៅមុនពេលកើតហេតុពួកគេទាំង ៤ នាក់បានបបួលជនរងគ្រោះឈ្មោះ ខន សារ៉ាត់ ទៅច្រៀងខារ៉ាអូខេហើយពួកគេបានសួរជនរងគ្រោះថា មានលុយប៉ាវអត់ ពេលនោះជនរងគ្រោះឆ្លើយថារឿងលុយកាក់មិនអីទេ។ បន្ទាប់ពីមានការអះអាងពីជនរងគ្រោះបែបនេះ ក្រុមជនសង្ស័យបាននាំគ្នាទៅកន្លែងខារ៉ាអូខេនោះ។
លោកបន្តថា ពេលទៅដល់កន្លែងខារ៉ាអូខេហើយ ក្រុមជនសង្ស័យបានសួរបញ្ជាក់ទៅជនរងគ្រោះថា ប្រាកដជាមានលុយប៉ាវពួកគេមែនឬ? ពេលនោះជនរងគ្រោះបានឆ្លើយបញ្ជាក់ប្រាប់ថាគេគ្មានលុយទេ។ លុះនិយាយប្រាប់ក្រុមជនសង្ស័យរួចភ្លាមជនរងគ្រោះបានដើរទៅនិយាយទូរស័ព្ទនៅវាលស្រែម្នាក់ឯង។
ដោយឃើញសភាពបែបនេះជនសង្ស័យម្នាក់ក្នុងចំណោម ៤ នាក់ បានទៅក្បែរជនរងគ្រោះហើយយកដៃម្ខាងក្រៀកកជនរងគ្រោះ បន្ទាប់មកក៏មានការប្រវាយប្រតប់គ្នា។ចំណែកឯបក្ខពួក ៣ នាក់ទៀតឃើញដូច្នេះស្រាប់តែម្នាក់ក្នុងចំណោមនោះបានដោះខ្សែក្រវាត់ពីចង្កេះរឹតករហូតដល់ស្លាប់នៅម៉ោង ១២ យប់។
លោកបញ្ជាក់បន្ថែមថា បន្ទាប់ពីដឹងថា ជនរងគ្រោះស្លាប់ ក្រុមជនសង្ស័យបាននាំគ្នាចាប់ជើងទាំង ២ របស់ជនរងគ្រោះអូសបញ្ច្រាស់សំដៅរកកន្លែងលាក់សាកសព។ បន្ទាប់មកក៏បាននាំគ្នាយកចំបើងទៅគ្របលើជនរងគ្រោះរួចរត់គេចខ្លួនអស់។
លុះដល់ថ្ងៃ ៣០ មករា ពលរដ្ឋបានប្រទះឃើញសាកសពជនរងគ្រោះនៅវាលស្រែក្នុងភូមិ ត្រពាំងបាគូ ឃុំត្រពាំងវែង ស្រុកកណ្តាលស្ទឹង ក៏រាយការណ៍ប្រាប់មន្ត្រីអាវុធហត្ថស្រុកទើបមានការរាយការណ៍បន្តទៅកាន់បញ្ជាការដ្ឋានកងរាជអាវុធហត្ថខេត្តកណ្តាលហើយក៏មានការចុះពិនិត្យដល់កន្លែងកើតហេតុតែម្តង។
លោកប្រាប់ថា បន្ទាប់ពីសមត្ថកិច្ចរបស់លោកកំណត់មុខសញ្ញាបានហើយក៏បើកប្រតិបត្តិការដោយសហការជាមួយកងរាជអាវុធហត្ថខេត្តព្រៃវែង និងភ្នំពេញចុះស្រាវជ្រាវអស់ពេល ៣ ថ្ងៃទើបចាប់ខ្លួនក្រុមជនសង្ស័យបានម្នាក់នៅខេត្តព្រៃវែង រីឯ ២ នាក់ចាប់នៅខេត្តកណ្ដាល ហើយម្នាក់ទៀត ចាប់បាននៅភ្នំពេញ៕