.jpg)
បុរសជាជនសង្ស័យកាប់សម្លាប់ប្រពន្ធ ត្រូវបានបញ្ជូនទៅកាន់តុលាការខេត្ត។ រូបថត នគរបាល
កំពង់ធំៈ នគរបាលព្រហ្មទណ្ឌខេត្តកំពង់ធំនៅថ្ងៃទី ២២ កក្កដា នេះ បានបញ្ជូនបុរសជាជនសង្ស័យម្នាក់ទៅសាលាដំបូងខេត្តបន្ទាប់ពីចាប់ខ្លួនពីថ្ងៃទី ២១ កក្កដា ពាក់ព័ន្ធករណីកាប់ស្លាប់ប្រពន្ធខ្លួនរួចយកទៅទម្លាក់ក្នុងស្រះទឹកក្រោយផ្ទះនៅភូមិខ្វាន់ទៀង ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ។
លោក ជា ពឿន ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំព់ងធំឲ្យដឹងនៅថ្ងៃទី ២២ កក្កដា នេះថា ជនសង្ស័យមានឈ្មោះ ធល ធារិទ្ធ អាយុ ៣០ ឆ្នាំ។ រីឯប្រពន្ធឈ្មោះ ស្រ៊ុន ចន្ទ្រា អាយុ ២៩ ឆ្នាំ មានរបរពេទ្យឯកជន និងមានកូន ៣ នាក់ ក្នុងនោះស្រីម្នាក់។ ប៉ុន្តែជនសង្ស័យត្រូវបានបញ្ជូនទៅសាលាដំបូងខេត្តកំពង់ធំ ហើយកាលពីរសៀលថ្ងៃទី ២២ កក្កដា នេះ។
លោកប្រាប់ថា៖ «ជនសង្ស័យបានសារភាពនៅដំណាក់កាលនគរបាលមូលដ្ឋានរួចហើយ ដូច្នេះពេលខាងអធិការស្រុកបញ្ជូនដល់ខេត្ត គឺខ្ញុំនឹងបញ្ជូនបន្តទៅតុលាការតែម្តង»។
ទោះយ៉ាងណា បើតាមមន្រ្តីនគរបាលយុត្តិធម៌ខេត្តកំពង់ធំម្នាក់សុំមិនឲ្យបញ្ចេញឈ្មោះប្រាប់ថា កាលពីព្រឹកវេលាម៉ោង ៦ កន្លះថ្ងៃទី ២១ កក្កដា ឆ្នាំ ២០២០ ប្តីរបស់ស្រ្តីរងគ្រោះអះអាងពីការបាត់ប្រពន្ធហើយបានប្រាប់បងប្អូនឲ្យនាំគ្នាដើររក។
រីឯគាត់ (ជនសង្ស័យ) បានដើរទៅស្រះទឹក ១ ខាងក្រោយផ្ទះចម្ងាយប្រហែល ៦០ ម៉ែត្រ។ ក្រោយពីប្រទះឃើញសាកសព បុរសជាប្ដីនោះបានរាយការណ៍ប្រាប់សមត្ថកិច្ច ហើយសមត្ថកិច្ចផ្នែកជំនាញកោសល្យវិច័យខេត្ត និងគ្រូពេទ្យបានចុះដល់ហើយពេលធ្វើកោសល្យវិច័យឃើញថាស្ត្រីរងគ្រោះ ជាប្តីបានកាប់ចំកនៅផ្នែកក្រោមត្រចៀករយះស្ទើរដាច់ក។
មន្រ្តីបន្តថា ដោយសារសង្ស័យនៅថ្ងៃទី ២១ កក្កដា នោះ សមត្ថកិច្ចនគរបាលស្រុកប្រាសាទបល្ល័ងក៏បានហៅបុរសជាប្តី និងឪពុកបង្កើតរបស់ស្រ្តីរងគ្រោះទៅសួរនៅអធិការដ្ឋាននគរបាលស្រុករហូតដល់ម៉ោង ២ រសៀលថ្ងៃ ទើបជនសង្ស័យសារភាព។ ចំណែកឪពុកបង្កើតរបស់ស្រ្តីរងគ្រោះ ត្រូវបានអនុញ្ញាតឲ្យត្រឡប់ទៅផ្ទះវិញ។
មន្រ្តីបញ្ជាក់ប្រាប់ថា ជនសង្ស័យបានសារភាពថារូបគេបានយកកាំបិតផ្កាក់កាប់ស្រ្តីរងគ្រោះនៅពេលយប់ពេលឈ្លោះប្រកែកគ្នា។ ក្រោយពីសម្លាប់រួចគាត់បានអូសសាកសពទៅទម្លាក់ចោលក្នុងស្រះទឹកហើយបានដើរត្រឡប់មកផ្ទះវិញ។ លុះព្រឹកឡើងថ្ងៃទី ២១ កក្កដា ជនសង្ស័យបានធ្វើជាឆោឡោថាបាត់ប្រពន្ធ និងប្រាប់សាច់ញាតិខាងប្រពន្ធឲ្យជួយរកតែពួកគេរកមិនឃើញទេ។ ចំណែកជនសង្ស័យបានដើរសំដៅស្រះទឹកហើយថា បានរកឃើញសពស្ត្រីនោះ។
មន្រ្តីនគរបាលរូបនោះបន្ថែមថា ជនសង្ស័យសារភាពថាមូលហេតុដែលរូបគេសម្លាប់ប្រពន្ធ គឺដោយសារស៊ើបដឹងថាប្រពន្ធខ្លួនលួចផិតក្បត់ហើយក៏ឈ្លោះគ្នារហូតឈានដល់សម្លាប់បែបនេះ។ ក្រោយសម្លាប់រួចដោយមិនដឹងថាត្រូវយកសពទៅទុកកន្លែងណាដើម្បីកុំឲ្យសមត្ថកិច្ចដឹង ទើបជនសង្ស័យអូសសពប្រពន្ធទៅទម្លាក់ក្នុងទឹកស្រះតែម្ដង៕
