.jpg)
បញ្ជូនបុរសខ្មែរ និងស្ត្រីវៀតណាម ២ នាក់ប្តីប្រពន្ធទៅតុលាការពាក់ព័ន្ធគ្រឿងញៀនជាង ១ គីឡូ បន្ទាប់ពីចាប់ខ្លួនពួកគេបានកាលពីថ្ងៃទី ១៦ មីនា។ រូបថត នគរបាល
ភ្នំពេញៈ បុរសខ្មែរម្នាក់ និងស្ត្រីវៀតណាមជាប្រពន្ធត្រូវបានសមត្ថកិច្ចនៃមន្ទីរប្រឆាំងគ្រឿងញៀនបញ្ជូនទៅសាលាដំបូងរាជធានីភ្នំពេញពីម្សិលមិញ ពាក់ព័ន្ធគ្រឿងញៀនមេតំហ្វេតាមីនទម្ងន់ ១០២៥,៥៦ក្រាម បន្ទាប់ពីចាប់ខ្លួនពួកគេបានកាលពីថ្ងៃទី ១៦ មីនានៅសង្កាត់ទួលសង្កែ ខណ្ឌប្ញស្សីកែវ រាជធានីភ្នំពេញ។
លោក អ៊ិន សុង នាយករងមន្ទីរប្រឆាំងគ្រឿងញៀនឲ្យដឹងពីម្សិលមិញថា ជនសង្ស័យដែលសមត្ថកិច្ចចាប់ខ្លួនឈ្មោះចុង សំអុល ភេទប្រុស អាយុ ៣៧ ឆ្នាំ ជនជាតិខ្មែរ និងស្ត្រីឈ្មោះ ឡេ ធីចិន ជាប្រពន្ធអាយុ ៣៨ ឆ្នាំជាជនជាតិវៀតណាម។ ពួកគេត្រូវបានសមត្ថកិច្ចបញ្ជូនបន្តទៅសាលាដំបូងរាជធានីភ្នំពេញហើយនៅថ្ងៃទី ១៨ មីនាក្រោយពីបញ្ចប់នីតិវិធីសាកសួរពួកគេ។
លោកថ្លែងថា៖ «ជនទាំង ២ នាក់បានបញ្ចប់នីតិវិធីសាកសួរហើយ ដែលគ្រឿងញៀនពួកគេមានជាង ១ គីឡូក្រាម»។
លោកឲ្យដឹងទៀតថា ប្រតិបត្តិការបង្ក្រាបគ្រឿងញៀននេះធ្វើឡើងនៅថ្ងៃទី ១៦ ខែមីនា វេលាម៉ោង ៤ កន្លះរសៀលស្ថិតនៅបន្ទប់ជួលលេខ ៤ ផ្លូវបេតុង សង្កាត់ទួលសង្កែ ខណ្ឌប្ញស្សីកែវ រាជធានីភ្នំពេញ។ កម្លាំងជំនាញរបស់មន្ទីរប្រឆាំងបទល្មើសគ្រឿងញៀន (ក ៦) ដឹកនាំដោយលោក ដាំ ឈឿន នាយករងមន្ទីរប្រឆាំងគ្រឿងញៀន និងមានការសម្របសម្រួលផ្នែកផ្លូវច្បាប់ពីលោក សឿន មុន្នីរ័ត្ន ព្រះរាជអាជ្ញារង និង ក្រឡាបញ្ជី លោក ឡេង ណាង។
លោកបន្តថាក្នុងប្រតិបត្តិការនេះដែរសមត្ថកិច្ចបានឃាត់ខ្លួនជនសង្ស័យ ២ នាក់ប្តីប្រពន្ធនេះដោយបានដកហូតនូវវត្ថុតាងជាសារធាតុញៀនមេតំហ្វេតាមីន (ICE) ទម្ងន់ ១០២៥,៥៦ ក្រាម។
បើយោងតាមរបាយការណ៍សង្ខេបស្តីពីលទ្ធផលត្រួតពិនិត្យគ្រឿងញៀនឆ្នាំ ២០១៩ និងលើកទិសដៅការងារឆ្នាំ ២០២០ បានបង្ហាញថានៅឆ្នាំ ២០១៩ តាមរយៈសន្និបាតបូកសរុបលទ្ធផលការងារត្រួតពិនិត្យគ្រឿងញៀនឆ្នាំ ២០១៩ និងទិសដៅការងារឆ្នាំ ២០២០ បង្ហាញថា ការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី ៤ (ពីថ្ងៃទី ១ ខែមករា ដល់ថ្ងៃទី ៣១ ខែធ្នូ ឆ្នាំ ២០១៩) បានអនុវត្តច្បាប់បង្ក្រាបបានចំនួន ៩ ៨០៦ ករណី។
ក្នុងប្រតិបត្តិការបង្ក្រាបនេះសមត្ថកិច្ចបានឃាត់ខ្លួនជនសង្ស័យ ២០ ៤៩០ នាក់រឹបអូសគ្រឿងញៀនបានចំនួន ៧៥០, ៧០ គីឡូក្រាមរួមទាំងមធ្យោបាយ សម្ភារ និងវត្ថុតាងមួយចំនួន។ ក្នុងនោះករណីបទល្មើសគ្រឿងញៀនធំៗ ចាប់បាន ១ គីឡូក្រាមឡើងមានចំនួន ៦១ ករណី (៦១ ក្រុម) ចាប់យកគ្រឿងញៀនសរុប ៦៩៧,៤៦ គីឡូក្រាម និងចាប់ឃាត់ខ្លួនចំនួន ១៤០ នាក់ក្នុងនោះមេខ្លោង ២៧ នាក់ខ្សែរយៈបណ្តាញចំនួន ១១៣ នាក់៕
