The Phnom Penh Post Search

Search form




Logo of Phnom Penh Post newspaper Phnom Penh Post - បញ្ជូន​បុរស​ចិន ​៣ នាក់​ទៅ​តុលាការ​ ពាក់ព័ន្ធ​នឹង​ការចាប់​ជំរិត​ចិន​ដូច​គ្នា




បញ្ជូន​បុរស​ចិន ​៣ នាក់​ទៅ​តុលាការ​ ពាក់ព័ន្ធ​នឹង​ការចាប់​ជំរិត​ចិន​ដូច​គ្នា

Content image - Phnom Penh Post
ជនសង្ស័យ​ជាជនជាតិ​ចិន​ចំនួន​ ៣ នាក់​ ត្រូវបាន​សមត្ថកិច្ច​បញ្ជូន​ទៅ​សាលា​ដំបូង​រាជធានី​ភ្នំពេញ​កាលពី​ថ្ងៃទី ១៥ ​មេសា។ រូបថត នគរបាល

បញ្ជូន​បុរស​ចិន ​៣ នាក់​ទៅ​តុលាការ​ ពាក់ព័ន្ធ​នឹង​ការចាប់​ជំរិត​ចិន​ដូច​គ្នា

ភ្នំពេញ៖ ជនសង្ស័យ​ជាជនជាតិ​ចិន​ចំនួន​ ៣ នាក់​ ត្រូវបាន​សមត្ថកិច្ច​បញ្ជូន​ទៅ​សាលា​ដំបូង​រាជធានី​ភ្នំពេញ​កាលពី​ថ្ងៃទី ១៥ ​មេសា​ ក្រោយពី​ឃាត់ខ្លួន​កាលពី​ថ្ងៃទី ១២​ មេសា ​ពាក់ព័ន្ធ​នឹង​ការចាប់​ជំរិត​ទារប្រាក់​ពី​ជនជាតិ​ចិន​ដូចគ្នា​ក្នុងសណ្ឋា​គារ​មួយ​ នៅ​សង្កាត់​បឹង​កេងកង​ទី១​ ខណ្ឌ​បឹង​កេងកង​ ដែល​ពេលនោះ​សមត្ថកិច្ច ​ក៏បាន​រំដោះ​ជនរងគ្រោះ​ម្នាក់​ផង​ដែរ។

លោក​ ស៊ីម ពិសិដ្ឋ ​អធិការ​នគរបាល​ខណ្ឌ​បឹង​កេងកងប្រាប់​ពី​ម្សិលមិញ​ថា​ ជនសង្ស័យ​ជនជាតិ​ចិន​ចំនួន​ ៣ នាក់​នោះ​ ត្រូវបាន​សមត្ថកិច្ច​ជំនាញ​នៃ​អធិការដ្ឋាន​នគរបាល​ខណ្ឌ​បឹង​កេង​កង ​បញ្ជូនទៅ​សាលាដំបូង​រាជធានី​ភ្នំពេញ​ នៅ​ថ្ងៃទី ១៥ ខែ​មេ​សា​ បន្ទាប់ពី​កម្លាំង​នគរបាល​ខណ្ឌ​បឹង​កេងកង ​និង​រាជធានី​ភ្នំពេញ ​បើក​ប្រតិបត្តិ​ការបង្ក្រាប​ករណី​ចាប់​ជំរិត​ទារប្រាក់​ជនជាតិ​ចិន​ដូចគ្នា​នៅក្នុង​សណ្ឋាគារ​មួយ​ក្នុង​សង្កាត់​បឹង​កេងកង​ទី ១។ ក្នុង​ប្រតិបត្តិការ​នោះ ​សមត្ថកិច្ច​ បាន រំដោះ​ជន​រង​គ្រោះ​ជា​ជនជាតិ​ម្នាក់។

លោក​បន្តថា​ ប្រតិបត្តិការ​នេះ​ធ្វើឡើង​ក្រោម​ការបញ្ជា​ផ្ទាល់​ពី​លោក​ នេត សាវឿន ​អគ្គស្នងការ​នគរបាល​ជាតិ និង​លោក​ ស ថេត ​អគ្គ​ស្នងការរង ​និង​ជា​ស្នងការ​នគរបាល​រាជធានី​ភ្នំពេញ ​ព្រមទាំង​ដឹកនាំ​ផ្ទាល់​ដោយ​លោក​សុង លី ​ស្នង​ការរង​ទ​ទួល​ផែន​ព្រហ្មទណ្ឌ។ ជនសង្ស័យ​ចំនួន ​៣ នាក់ ​ត្រូវបាន​ឃាត់ខ្លួន​ពីបទ​ចាប់ជំរិត​ទារប្រាក់ ​ដោយ​ពួកគេបាន​ចាប់​មនុស្ស​ដាក់​ក្នុង​រថយន្ដ​ធ្វើ​ទារុណកម្ម ​ហើយ​ទារ​ប្រាក់។

លោក ​ពិសិដ្ឋ បញ្ជាក់ថា​៖ «ខ្ញុំ​មិនទាន់​ដឹង​តុលាការ​សម្រេច​យ៉ាង​ណា​ទេ។ គាត់​ជំរិត​ទារប្រាក់​ពី​សាច់ញាតិ​ជន​រងគ្រោះ​ផង ​និង​ទារប្រាក់​ពី​សាមី​ខ្លួន​ផ្ទាល់​ប៉ុន្ដែ​ជនល្មើស​មិនទាន់​បាន​ប្រាក់​ជន​រងគ្រោះ​ទេ»។

លោក​ គុជ គឹម​ឡុង ​អ្នកនាំពាក្យ​និង​ជា​ព្រះរាជ​អាជ្ញារង​នៃ​សាលាដំបូង​រាជធានី​ភ្នំពេញ ​ពី​ម្សិលមិញ​មិនទាន់​អាច​ទាក់ទង​សុំ​ការបញ្ជាក់​ជុំវិញ​ការសម្រេច​របស់​តុលាការ​ក្នុង​ករណី​នេះ​នៅ​ឡើយ​ទេ។

តាម​របាយការណ៍​រប​ស់​ស្នងការដ្ឋាន​នគរបាល​រាជធានី​ភ្នំពេញ​បាន​ឲ្យ​ដឹង​កាលពី​ថ្ងៃទី​ ១៥ ​មេសា​ ថា​ ជនសង្ស័យ​ចំនួន ​៣ នាក់​ ដែល​ត្រូវបាន​ឃាត់ខ្លួនរួមមាន​ ទី១-​ឈ្មោះ​ ចម ជី​ង​មីង (ZHAO-JIANMING ) ភេទ​ ប្រុស ​អាយុ​ ៣៥ ឆ្នាំ​ ជនជាតិ​ចិន ​ស្នាក់នៅ​ម្ដុំ​ក្រោយ​ក្រសួង​ការពារជាតិ ​ទី២-​ឈ្មោះ​ ស៊ែ​វ ជៀន ​(XIAO-ZEAN) ភេទ ​ប្រុស ​ជនជាតិ​ចិន​ អាយុ​ ៣២ ឆ្នាំ ​ស្នាក់នៅ​ម្ដុំ​កោះ​ពេជ្រ ​មុខរបរ​មិន​ពិតប្រាកដ​ និង​ទី៣​-ឈ្មោះ​ ហ៊ូ ហ្វឹង​វិន (HU FENGWEN) ភេទ​ប្រុស​ អាយុ​ ៣១ ឆ្នាំ ​ជនជាតិ​ចិន ​ស្នាក់នៅ​ផ្ទះជួល​សង្កាត់​កាកាប ​ខណ្ឌ​ពោធិ៍​សែន​ជ័យ​ រាជធានី​ភ្នំពេញ ​មុខរបររកស៊ី​ខាង​រ៉ែ​មាស។

របាយ​ការណ៍​បន្តថា ​សមត្ថកិច្ច​បាន​រឹបអូស​យក​វត្ថុតាង​ មាន​ដូចជា ​រថយន្ដ​ ១ គ្រឿង​ (របស់​បក្ខពួក​ជនសង្ស័យ​រត់គេច​ខ្លួន)​ ទូរស័ព្ ទ​២ គ្រឿង​ លុយ​ចំនួន ​៣២៦ ដុល្លារ ​ដំបងឆក់ ​២ កាត​ធានា​គារ ​១ ខ្នោះដៃ​ចំនួន ​២ ក្រណាត់​ពណ៌​ខ្មៅ​ចំនួន ៤ ​(សម្រាប់​គ្រប​មុខ) លិខិត​ឆ្លងដែន ​១ កូនសោ​ ១​ ចង្កោម​ និង​កាបូប​ខ្មៅ ​១ (ជា​របស់​ឈ្មោះ XIAO ZEAN)។ ចំណែក​ជន​រងគ្រោះ​ឈ្មោះ Lin Wei xian ភេទ​ ប្រុស ជនជាតិ​ចិន​ អាយុ​ ៣១ ឆ្នាំ​ ស្នាក់នៅ​សណ្ឋាគារ​មួយ​ក្នុង​សង្កាត់​បឹង​កេងកង​ទី ១ ​ខណ្ឌ​បឹង​កេងកង​ មុខរបរ​ជា​បុគ្គលិក​ខារ៉ា​អូខេ។

របាយ​ការណ៍​បន្ថែមថា​ ជនសង្ស័យ​ចំនួន ​៣ នាក់​ (ជនជាតិ​ចិន) និង​វត្ថុតាង​ ត្រូវបាន​ឃាត់​នៅ​អធិការដ្ឋាន​នគរបាល​ខណ្ឌ​បឹង​កេងកង​កាលពី​ថ្ងៃទី ១២ ​ខែមេសា ​ហើយ​កសាង​សំណុំរឿង ​បញ្ជូន​បន្តទៅ​សាលាដំបូង​រាជធានី​ភ្នំពេញ​កាលពី​ថ្ងៃទី ១៥ ​ខែមេសា​ ដើម្បី​ចាត់ការ​តាម​នីតិវិធី​ច្បាប់៕

អត្ថបទគួរចាប់អារម្មណ៍

  • ព្រះសីហនុៈ រដ្ឋបាលខេត្ត​ព្រះសីហនុ​កំពុង​ចាក់​ខ្សាច់​ថ្មី​បំពេញ​នៅតាម​កន្លែង​ជ្រលង​ទឹកហូរ​ដែលមាន​ខ្សាច់​ទាប និង​ខ្សាច់​ខ្មៅ​នៅ​ចំណុច​ឆ្នេរ​អូរឈើទាល​ក្នុង​សង្កាត់​លេខ​ ៤ ក្រុងព្រះសីហនុ ដើម្បី​កែលម្អ​សោភណភាព​ឆ្នេរ​ខ្សាច់ ក៏ប៉ុន្តែ​មន្ត្រីខេត្ត​នៅ​មិន​អាច​ប៉ាន់ប្រមាណ​ថា​នឹង​ត្រូវ​ប្រើ​ខ្សាច់​ប៉ុន្មាន​រថយន្ត​នោះទេ​។

  • ភ្នំពេញៈ ប្រទេស​ជប៉ុន​ ផ្តល់​ជំនួយ​ឥតសំណង​ដល់​កម្ពុជា​ចំនួន ១ ១៣២ ​លាន​យ៉េន​ (១០,៨ ​លាន​ដុល្លារ​) ​សម្រាប់​អនុវត្ត​គម្រោង​អភិវឌ្ឍន៍​ចរាចរណ៍​នាវា​នៅ​កំពង់ផែ​ស្វយ័ត​ក្រុងព្រះសីហនុ​ដើម្បី ​ធ្វើឱ្យ​ប្រសើរ​ឡើង​នូវ​សុវត្ថិភាព​ផ្លូវ​សមុទ្រ​។ នេះ​បើតាម​ស្ថានទូត​ជប៉ុន​ប្រចាំ​នៅ​កម្ពុជា​។

  • ភ្នំពេញ៖ កីឡាការិនី​កូន​ខ្មែរ​កាត់​បារាំង វ័យ ១៧ ឆ្នាំ ម៉ា រីយ៉ាន មាន​ចំណង់​ចំណូលចិត្ត​ខ្លាំង​ទៅ​លើ​ប្រភេទ​កីឡា​ប្រយុទ្ធ ពិសេស​ការ​ប្រណាំង​ម៉ូតូ​ហោះ ហើយ​កញ្ញា​បាន​អះអាង​ថា នឹង​មិន​បោះបង់​ចោល​ជំនាញ​នេះ​ឡើយ បើ​ទោះបី​ជា​ប្រភេទ​កីឡា​នេះ មាន​ផល​ប៉ះពាល់ និង​ធ្លាប់​ជួប​ឧបសគ្គ​គ្រោះ​ថ្នាក់​ធំ​​ក៏​ដោយ។

  • ភ្នំពេញៈ តម្លៃ​ពោត​ក្នុង​រដូវ​ប្រមូលផល​ឆ្នាំនេះ​បាន​ស្ទុះ​ឡើង ដោយសារ​តែ​ការកើនឡើង​នៃ​តម្រូវការ​សម្រាប់​ការផលិត​ចំណី​សត្វ​ក្នុងស្រុក​។ ការប្រមូលផល​ពោតក្រហម​នៅក្នុង​ខេត្ត​ត្បូងឃ្មុំ​ពេលនេះ​សម្រេច​បាន​ប្រមាណ ៥០ ​ភាគរយ​ហើយ​ដោយ​តម្លៃ​គ្រាប់ពោត​ស្ងួត​បាន​កើនឡើង​ជិត ២០ ​ភាគរយ​ បើ​ធៀប​នឹង​រយៈពេល​ដូចគ្នា​កាលពី​ឆ្នាំមុន

  • កោះកុងៈ ដី​គម្រប​ព្រៃឈើ​របស់​រដ្ឋ​រាប់ពាន់​ម៉ែត្រការ៉េ​ក្នុង​ទំហំ​ដី​បម្រុង​របស់​រដ្ឋ​ទំហំ​ប្រមាណ​ ១១ ​ហិកតា ស្ថិតនៅ​ភូមិ​កោះស្តេច ឃុំ​កោះ​ស្តេច ស្រុក​គិរីសាគរ ខេត្តកោះកុង​ត្រូវបាន​ជន​មិន​ស្គាល់​អត្តសញ្ញាណ​ចាប់ផ្ដើម​លួច​បោះបង្គោល​ថ្ម និង​ឈើ​ទន្ទ្រាន​យក​ដោយ​ខុសច្បាប់​។

  • កំពង់ស្ពឺៈ ពលរដ្ឋ​ជាង​ ៥០០ ​គ្រួសារ ​រស់នៅក្នុង​ឃុំ​ទួល​អម្ពិល​ស្រុក​បសេដ្ឋ ខេត្តកំពង់ស្ពឺ​បាន​បង្ហាញ​ក្ដីបារម្ភ​ពី​ការខ្វះ​ទឹក​សម្រាប់​ស្រោចស្រព​ស្រែចម្ការ និង​ដំណាំ​ផ្សេងៗ ខណៈ​បច្ចុប្បន្ន​មាន​ឈ្មួញ​យក​ម៉ាស៊ីន​ទៅ​បូមទឹក​ទាំងយប់​ទាំង​ថ្ងៃ​នៅក្នុង​ទំនប់​បុរាណ​ព្រៃពាយ​ដែល​ពួកគាត់​កំពុង​ប្រើប្រាស់​ជាប្រចាំ​។