.jpg)
ជនសង្ស័យនិងវត្ថុតាងដែលសមត្ថកិច្ចរកឃើញ ។ ប៉ូលិស
ស្វាយរៀងៈ សមត្ថកិច្ចការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តស្វាយរៀងបានកសាងសំណុំរឿងបញ្ជូនបុរសជនជាតិអុីស្រាអែលម្នាក់ទៅសាលាដំបូងខេត្ត កាលពីល្ងាចម្សិលមិញ បន្ទាប់ពីចាប់ខ្លួនកាលពីថ្ងៃ ៣ កុម្ភៈ ពាក់ព័ន្ធនឹងការរក្សាទុកម្សៅសារធាតុគីមីនៅភូមិមេភ្លើង សង្កាត់-ក្រុង-ខេត្ត ស្វាយរៀង។
លោក កាន កេន ប្រធានការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តស្វាយរៀងប្រាប់កាលពីម្សិលមិញថា បុរសនោះឈ្មោះ Trillessky Ran អាយុ ៤១ ឆ្នាំ។
លោកប្រាប់ថា៖ «វត្ថុតាងដែលសមត្ថកិច្ចយើងឆែកឃើញនោះមិនមានគ្រឿងញៀនសុទ្ធទេ ប៉ុន្តែជាប្រភេទម្សៅជាសារធាតុគីមីដែលយើងសង្ស័យថាអាចយកទៅផ្សំជាគ្រឿងញៀនបានហើយនៅល្ងាច (ថ្ងៃទី ៤ កុម្ភៈ) នេះ ខ្ញុំបញ្ជូនទាំងជនសង្ស័យនិងវត្ថុតាងទៅសាលាដំបូងខេត្តស្វាយរៀងដើម្បីចាត់ការតាមផ្លូវច្បាប់បន្តទៀត»។
លោក កាន កេន បញ្ជាក់ថា ជនសង្ស័យខាងលើ បានមកខេត្តស្វាយរៀងហើយជួលបន្ទប់ផ្ទះសំណាក់យីហោជីឡុង បន្ទប់លេខ ២០៤ ក្នុងភូមិសង្កាត់ខាងលើកាលពីថ្ងៃទី ១ ខែកុម្ភៈ ឆ្នាំ ២០១៩។ លុះស្នាក់នៅបាន ១ ថ្ងៃ ម្ចាស់ផ្ទះសំណាក់មានការសង្ស័យក៏រាយការណ៍ប្រាប់សមត្ថកិច្ចរបស់លោក ហើយរហូតដល់ថ្ងៃទី ៣ ខែកុម្ភៈ ទើបសមត្ថកិច្ចចុះទៅឆែកឆេរក្នុងបន្ទប់ជនសង្ស័យនោះ។ បន្ទាប់ពីឆែកឆេរសមត្ថកិច្ចបានរកឃើញម្សៅពណ៌ស ៥ កញ្ចប់ធំនិង ២ កញ្ចប់តូច រួមនឹងសម្ភារដែលសង្ស័យថាជាសារធាតុគីមីសម្រាប់ផ្សំធ្វើគ្រឿងញៀនមួយចំនួនទៀត។
លោកបានបន្ថែមថា៖ «ចំពោះម្សៅដែលយើងដកហូតពីជនសង្ស័យនោះ យើងបានបញ្ជូនបន្តទៅកាន់ខាងមន្ទីរពិសោធន៍គ្រឿងញៀននៅរាជធានីភ្នំពេញហើយ ព្រោះម្សៅនោះមានច្រើនមុខដែលយើងសង្ស័យថា អាចលាយផ្សំកើតជាគ្រឿងញៀនបាន»៕
