ភ្នំពេញៈ បុរសដែលបានបើករថយន្តបុកមនុស្ស ២ នាក់ពេលកំពុងជិះម៉ូតូ បណ្តាលឲ្យស្លាប់កាលពីយប់ថ្ងៃទី ៣០ មីនា នៅភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញដែលសមត្ថកិច្ចចាប់ខ្លួនបានប៉ុន្មានម៉ោងក្រោយកើតហេតុត្រូវបានបញ្ជូនទៅសាលាដំបូងរាជធានីភ្នំពេញពីម្សិលមិញ។
លោក សែម រតនា នាយការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញថ្លែងពីម្សិលមិញថា នៅថ្ងៃទី ៣១ ខែមីនា ដោយមានការឯកភាពពីព្រះរាជអាជ្ញាអមសាលាដំបូងរាជធានីភ្នំពេញ សមត្ថកិច្ចជំនាញបានបញ្ជូនជនបង្កគ្រោះថ្នាក់ចរាចរណ៍ម្នាក់ឈ្មោះ សេង ចិន្តា អាយុ ៣៧ ឆ្នាំ ភេទប្រុស ទៅសាលាដំបូងរាជធានីភ្នំពេញ បន្ទាប់ពីបុរសរូបនេះបើករថយន្តបុកបុរស ២ នាក់ស្លាប់កាលពីម៉ោង ២១: ១០ នាទីថ្ងៃទី ៣០ ខែមីនា។
លោកបន្តថាក្រោយពីបង្កគ្រោះថ្នាក់ចរាចរណ៍រួចជនសង្ស័យបានរត់គេចខ្លួន ប៉ុន្ដែលោក ហួរ ម៉េងវ៉ាង អធិការនគរបាលខណ្ឌសែនសុខបានដឹកនាំកម្លាំងផ្ទាល់ក្នុងប្រតិបត្តិការនេះដោយតាមចាប់ខ្លួនជនសង្ស័យបានក្នុងប៉ុន្មានម៉ោងក្រោយមក។ លុះព្រឹកឡើងត្រូវបានបញ្ជូនទៅតុលាការនៅថ្ងៃទី ៣១ ខែមីនា ដើម្បីអនុវត្តបន្តតាមនីតិវិធីច្បាប់។
លោកថា៖ «ក្រោយកើតហេតុរយ:ពេលប្រហែលជា ៤ ម៉ោង ជនបង្កឈ្មោះ សេង ចិន្តា ត្រូវបានសមត្ថកិច្ចខណ្ឌសែនសុខស្រាវជ្រាវចាប់ខ្លួនបាននៅម៉ោងប្រហែល ១:២០ នាទីរំលងអធ្រាត្រព្រោះពេលបុកភ្លាមៗនោះគាត់រត់គេចខ្លួន»។
អ្នកនាំពាក្យសាលាដំបូងរាជធានីភ្នំពេញលោក គុជ គឹមឡុង ពីម្សិលមិញមិនអាចទាក់ទងសុំការបញ្ជាក់ពីករណីនេះបានទេ។
លោក ហួរ ម៉េងវ៉ាង អធិការនគរបាលខណ្ឌសែនសុខថ្លែងពីម្សិលមិញថា កម្លាំងលោកបានចូលរួមសហការក្នុងប្រតិបត្តិការនេះដែរ ប៉ុន្ដែមន្ត្រីជំនាញនៃស្នងការដ្ឋាននគរបាលរាជធានីភ្នំពេញបានចុះមកធ្វើកំណត់ហេតុផ្ទាល់។ ដូច្នេះលោកមិនបានដឹងច្បាស់ពីរបាយការណ៍លម្អិតទេ។
លោកថា៖ «អ៊ីចឹងប្រហែលជាសំណុំរឿងនេះគេបញ្ជូនទៅតុលាការរួចរាល់ហើយ»។
តាមរបាយការណ៍ស្នងការដ្ឋាននគរបាលរាជធានីភ្នំពេញឲ្យដឹងពីម្សិលមិញថា មានករណីគ្រោះថ្នាក់ចរាចរណ៍មួយបង្កឡើងដោយរថយន្ត ១ គ្រឿងម៉ាកធុនដ្រា ពណ៌ខ្មៅ ពាក់ស្លាកលេខភ្នំពេញ 2BA.9111 បានបើកបុកម៉ូតូ ១ គ្រឿងបណ្តាលឲ្យស្លាប់មនុស្ស ២ នាក់នៅលើផ្លូវ 59P ភូមិគោកឃ្លាង សង្កាត់គោកឃ្លាង ខណ្ឌសែនសុខ វេលាម៉ោង ២១:១០ នាទីរួចជនបង្កក៏បានបើករថយន្តគេចខ្លួន។
បើតាមកាមេរ៉ាសុវត្ថិភាពដែលគេបង្ហោះលើហ្វេសប៊ុកបង្ហាញឲ្យឃើញពីម្សិលមិញថា មានបុរស ២ នាក់ជិះម៉ូតូ ១ គ្រឿងម៉ាក Honda Dream C125 តាមបណ្តោយផ្លូវលំ បត់ឡើងមកផ្លូវមួយទៀត។ ប៉ុន្ដែបត់មិនទាន់ផុតក៏មានរថយន្ត ១ គ្រឿង បើកយ៉ាងលឿនបុកពេញទំហឹងបណ្តាលឲ្យបុរសទាំង ២ នាក់ស្លាប់។ បន្ទាប់ពីបុកអ្នកបើករថយន្ត បើករត់បន្សល់ទុកស្លាកលេខភ្នំពេញ 2BA-9111 នៅកន្លែងកើតហេតុ៕