ភ្នំពេញៈ បុរសជនជាតិវៀតណាមម្នាក់ត្រូវបាននគរបាលព្រហ្មទណ្ឌក្រសួងមហាផ្ទៃបញ្ជូនទៅសាលាដំបូងរាជធានី-ភ្នំពេញកាលពីម្សិលមិញ បន្ទាប់ពីឃាត់ខ្លួនពាក់ព័ន្ធនឹងការលួចរថយន្ត ១ គ្រឿង ដោយប្រើល្បិចផ្តាច់ប្រព័ន្ធ GPS កាលពីថ្ងៃទី ១១ វិច្ឆិកា នៅសង្កាត់ច្រាំងចំរេះ ១ ខណ្ឌឫស្សីកែវ រាជធានីភ្នំពេញ។
លោកឧត្តមសេនីយ៍ឯក ង៉េងជួ ប្រធាននាយកដ្ឋានព្រហ្មទណ្ឌនៃក្រសួងមហាផ្ទៃប្រាប់ភ្នំពេញប៉ុស្ដិ៍កាលពីម្សិលមិញថា ករណីជនសង្ស័យឈ្មោះ Phan Van Ho អាយុ ២៩ ឆ្នាំ ដែលពាក់ព័ន្ធនឹងករណីលួចរថយន្តនោះត្រូវបានសមត្ថកិច្ចរបស់លោកកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញហើយនៅថ្ងៃពុធនេះ (ថ្ងៃទី ១៣ វិច្ឆិកា)។
លោកថ្លែងថា៖ «បុរសនោះខាងសមត្ថកិច្ចរបស់ខ្ញុំបានបញ្ជូនគាត់ទៅតុលាការនៅថ្ងៃនេះហើយ (ថ្ងៃទី ១៣ វិច្ឆិកា) ដើម្បីចាត់ការទៅតាមនីតិវិធីច្បាប់បន្តទៀត» ។
លោកបានបញ្ជាក់ថា ការចាប់ខ្លួនជនសង្ស័យរូបនេះបានធ្វើឡើង បន្ទាប់ពីមានពាក្យបណ្តឹងពីម្ចាស់រថយន្តម៉ាក Prius ពណ៌ស ១ គ្រឿង ពាក់ស្លាកលេខភ្នំពេញ 2Y-8393 ដោយសមត្ថកិច្ចរបស់លោកបានសហការជាមួយនគរបាលខណ្ឌឫស្សីកែវ ចុះស្រាវជ្រាវរហូតឈានទៅចាប់ខ្លួនជនសង្ស័យបានតែម្តង។
ពាក់ព័ន្ធនឹងករណីនេះដែរលោក ម៉ក់ សុភ័ណ្ឌ នាយនគរបាលប៉ុស្តិ៍ច្រាំងចំរេះទី ១ ខណ្ឌឫស្សីកែវបានឲ្យដឹងដែរថាជនសង្ស័យឈ្មោះ Phan Van Ho រូបនេះ បានធ្វើសកម្មភាពលួចរថយន្តនៅក្នុងភូមិស្វាយប៉ាក សង្កាត់ច្រាំងចំរេះ ខណ្ឌឫស្សីកែវរាជធានីភ្នំពេញ។ ឯការចាប់ខ្លួនគឺសមត្ថកិច្ចរបស់នាយកដ្ឋានព្រហ្មទណ្ឌក្រសួងមហាផ្ទៃ និងសមត្ថកិច្ចនគរបាលនៅក្នុងខណ្ឌឫស្សីកែវបានសហការគ្នាទើបអាចឈានទៅស្វែងរកចាប់ខ្លួនជនសង្ស័យបាន។
តាមចម្លើយរបស់ជនសង្ស័យដែលសមត្ថកិច្ចបានកត់ត្រាទុកបានបង្ហាញថា ជនសង្ស័យរូបនេះបានសារភាពថា ពិតជាបានធ្វើសកម្មភាពលួចរថយន្តម៉ាក Prius ប្រាកដមែន ហើយសកម្មភាពបែបនេះ មិនមែនរូបគេទើបតែធ្វើជាលើកទី ១ នោះទេ ប៉ុន្តែកន្លងមកគេក៏ធ្លាប់លួចរថយន្តបានចំនួនពី ២ ទៅ ៣ គ្រឿងមកហើយដែរ។ សម្រាប់រថយន្តណាដែលប្រើ smart key ចាប់ពីស៊េរីឆ្នាំ ២០០៩ ចុះក្រោមគឺគេមិនពិបាកក្នុងការលួចឡើយ ដោយប្រើពេលត្រឹមតែ ២ នាទីប៉ុណ្ណោះ ពីព្រោះខ្លួនមានឧបករណ៍មួយកំប្លេក្នុងនោះមានទាំងឧបករណ៍ផ្ដាច់ GPS និងឧបករណ៍ភ្ជាប់ជាមួយ smart key ដែលឧបករណ៍ទាំងនេះ គេបានយកមកពីប្រទេស វៀតណាម ៕