ភ្នំពេញៈ នគរបាលនៃមន្ទីរប្រឆាំងគ្រឿងញៀនក្រសួងមហាផ្ទៃ បានបញ្ជូនបុរសសង្ស័យ ២ នាក់ និងស្រ្តីម្នាក់ទៅសាលាដំបូងរាជធានីភ្នំពេញកាលពីម្សិលមិញ បន្ទាប់ពីចាប់ខ្លួនកាលពីថ្ងៃទី ៥ សីហា នៅខណ្ឌច្បារអំពៅ និងខណ្ឌចំការមន រាជធានីភ្នំពេញពាក់ព័ន្ធគ្រឿងញៀនចម្រុះចំនួន ២,១១១ គីឡូក្រាម។
លោក វ៉ាន់ កុសល នាយករងមន្ទីរប្រឆាំងគ្រឿងញៀន ប្រាប់ពីម្សិលមិញថា ជនសង្ស័យដែលសមត្ថកិច្ចរបស់លោកចាប់ខ្លួនបានពាក់ព័ន្ធគ្រឿងញៀននេះទី១-ឈ្មោះ អាន វាសនា ភេទប្រុស អាយុ ៣៨ ឆ្នាំ ទី២- ឈ្មោះ ម៉ែន សុទ្ធសំណាង ភេទប្រុស អាយុ ២៦ ឆ្នាំ និងទី៣-ឈ្មោះ សេក ស្រីប៉ុច ភេទស្រី អាយុ ៣១ ឆ្នាំ។ ពួកគេទាំង ៣ នាក់នេះ ត្រូវបានសមត្ថកិច្ចរបស់លោកបញ្ជូនទៅសាលាដំបូងរាជធានីភ្នំពេញហើយនៅរសៀលថ្ងៃនេះ (ថ្ងៃទី៧ សីហា)។
លោកបានថ្លែងថា៖ «ពាក់ព័ន្ធរឿងនេះ សមត្ថកិច្ចរបស់យើងបានបញ្ចប់នីតិវិធីនៅត្រឹមថ្ងៃនេះ (ថ្ងៃទី ៧ សីហា) ហើយបញ្ជូនក្រុមជនសង្ស័យបន្តទៅតុលាការនៅរសៀលថ្ងៃនេះដែរ »។
លោកប្រាប់ថា មុនមានការចាប់ខ្លួនជនសង្ស័យទាំង ៣ នាក់ខាងលើ គឺសមត្ថកិច្ចនៃមន្ទីរប្រឆាំងគ្រឿងញៀនបានធ្វើជាអ្នកបញ្ជាទិញហើយបានទាក់ទងទៅស្រ្តីឈ្មោះ សេក ស្រីប៉ុច នៅម្តុំវត្តនិរោធ សង្កាត់និរោធ ខណ្ឌច្បារអំពៅ ដោយស្រ្តីសង្ស័យប្រាប់ថា គេមានថ្នាំញៀនតែ ៦៦ គ្រាប់ទេ ហើយសមត្ថកិច្ចថា ចំនួន ៦៦ គ្រាប់ក៏យកដែរ ។ បន្ទាប់មកសមត្ថកិច្ចសួរទៅស្រ្តីសង្ស័យនោះទៀតថា គាត់បញ្ជាទិញ ១ ពាន់គ្រាប់ទៀត តើមានទេ? ហើយស្រ្តីសង្ស័យប្រាប់ថា ថ្នាំញៀន ១ ពាន់គ្រាប់ គេរកឲ្យបានហើយកម្លាំងសមត្ថកិច្ចក៏បានណាត់ជួបគ្នាដើម្បីដោះដូរទំនិញហើយក៏ចាប់បានស្រ្តីរូបនោះនៅថ្ងៃទី ៥ សីហា តែម្តង ។
លោកបានប្រាប់បន្តថា បន្ទាប់ពីចាប់ខ្លួនស្រ្តីសង្ស័យរូបនេះហើយ សមត្ថកិច្ចក៏បានឲ្យស្រ្តីម្នាក់នេះនាំទៅរកបក្ខពួកគ្នាគេបន្តទៀត ទើបឈានដល់ចាប់ខ្លួនបានបុរសសង្ស័យ ២ នាក់ទៀត នៅក្នុងថ្ងៃតែមួយ។ ក្នុងនោះគោលដៅទី១ នៅចំណុចផ្ទះហ្គេមអុីនធឺណិត ៧៧៧៧ ខាងក្រោយផ្សារសុវណ្ណា សង្កាត់ទំនប់ទឹក ខណ្ឌចំការមន និងគោលដៅទី២ នៅចំណុចក្នុងផ្ទះលេខ ២៨AZ ផ្លូវលេខ ២៧៨ សង្កាត់អូឡាំពិក ខណ្ឌចំការមន រាជធានីភ្នំពេញ។ ចំពោះគ្រឿងញៀនដែលសមត្ថកិច្ចដកហូតបានរួមមាន ថ្នាំញៀនប្រភេទ (WY) ថ្នាំគ្រវី និងថ្នាំអិចស្តាហ្ស៊ីគ្រាប់មានទម្ងន់ ១៧៧,៦៤ ក្រាម និងថ្នាំប្រភេទម្សៅសម្រាប់កែច្នៃផលិតជាថ្នាំញៀនមេតំហ្វេតាមីននិងថ្នាំញៀនគ្រវី) ទម្ងន់ ១ ៩៣៣,៩៦ ក្រាម សរុបទម្ងន់ ២,១១១ គីឡូក្រាម ។
លោកបញ្ជាក់ថា៖ «ថ្នាំប្រភេទម្សៅនោះ គឺជនល្មើសប្រើសម្រាប់លាយផ្សំបានជាប្រភេទគ្រឿងញៀនមេតំហ្វេតាមីនផង និងបានជាប្រភេទគ្រឿងញៀនអិចស្តាហ្ស៊ីផង។ កន្លងមក មានការកែច្នៃថ្នាំញៀនច្រើននៅក្នុងរាជធានីភ្នំពេញរបស់យើង »៕