សៀមរាបៈ សមត្ថកិច្ចការិយាល័យជួញដូរមនុស្សខេត្តសៀមរាប បានបញ្ជូនបុរសជនជាតិអាមេរិកាំងម្នាក់ទៅសាលាដំបូងខេត្តកាលពីម្សិលមិញ ក្រោយពីឃាត់ខ្លួននៅក្រុងសៀមរាប កាលពីថ្ងៃទី ២១ សីហា តាមបណ្តឹងពីម្តាយក្មេងប្រុសម្នាក់ពាក់ព័ន្ធនឹង អំពើអាស ប្រព្រឹត្តកាលពីថ្ងៃទី ១៤ ខែ សីហា ឆ្នាំនេះ។
លោក ជា ហេង ប្រធានការិយាល័យប្រឆាំងការជួញដូរមនុស្ស និងការពារអនីតិជនខេត្តសៀមរាប ប្រាប់កាលពីម្សិលមិញថា ជនសង្ស័យជនជាតិអាមេរិកាំងរូបនោះ ឈ្មោះ Robinson Shaun Earl (ហៅ សន រឺ ហៅចន) អាយុ ៤០ ឆ្នាំ ជាអ្នកទេសចរស្នាក់នៅបណ្តោះអាសន្ន នៅក្រុងសៀមរាប។
លោកថា៖ «ជនសង្ស័យម្នាក់នេះ ត្រូវម្តាយក្មេងប្រុសប្តឹងហើយសមត្ថកិច្ចរបស់ខ្ញុំបានស្រាវជ្រាវចាប់ខ្លួនគាត់បាន បន្ទាប់ពីទទួលបណ្តឹងបានប៉ុន្មានថ្ងៃ»។
លោកបានបន្តថា ក្នុងពាក្យបណ្តឹងនោះ ស្រ្តី ឈ្មោះ សាន់ ឃៀង អាយុ ៤១ ឆ្នាំ ជាម្តាយក្មេងប្រុសរងគ្រោះ បានរៀបរាប់ថា កាលពីយប់ថ្ងៃទី ១៤ សីហា ខណៈកូនប្រុសរបស់គាត់កំពុងដើរសុំលុយគេ (សុំទាន) នៅម្ដុំផ្សារចាស់ សង្កាត់ស្លក្រាម ស្រាប់តែជួបជនបរទេសម្នាក់ ឈ្មោះ Robinson Shaun Earl ហើយកូនគាត់ក៏បានសុំលុយ តែជននោះបែរជាហៅកូនរបស់គាត់ទៅបន្ទប់ជួលទៅវិញ។បន្ទាប់ពីទៅដល់បន្ទប់ជួល ជនជាតិបរទេសរូបនោះបានឲ្យកូនគាត់ស្រាតខោដេកលើគ្រែហើយជននោះក៏លេងប្រដាប់ភេទកូនប្រុសគាត់ និងបានបង្គាប់ឲ្យកូនរបស់គាត់លេងប្រដាប់ភេទរបស់គេវិញរហូតចេញទឹកកាម។ បន្ទាប់ពីដេកនៅទីនោះបានមួយយប់ ព្រឹកឡើងថ្ងៃទី ១៥ សីហា បុរសនោះបានឲ្យលុយទៅកូនរបស់គាត់ ២៥ ដុល្លារ ហើយឲ្យត្រឡប់មកផ្ទះវិញ។
លោកបន្តថា បន្ទាប់ពីទទួលបានពាក្យបណ្តឹងនោះ លោកបានសុំយោបល់ពីព្រះរាជអាជ្ញាអមសាលាដំបូងខេត្តសៀមរាប គឺលោក កើត វណ្ណារ៉េត ហើយក៏បានដឹកនាំកម្លាំងចុះប្រតិបត្តិការដោយឲ្យក្មេងរងគ្រោះនាំទៅបង្ហាញទីតាំងនោះ ហើយបានជួបជនសង្ស័យក៏ចាប់ខ្លួនតែម្តង។ចំណែកវត្ថុតាងមាន៖ Ipsy ១ គ្រឿង, អង្គចងចាំ ១ គ្រឿង, ដៃហ្គេមក្មេងលេង ៣ គ្រឿង, ទឹកថ្នាំរំអិល ២ ដប។
លោកប្រាប់ថា ក្រោយពីចាប់បានជនសង្ស័យហើយសមត្ថកិច្ចបានហៅក្មេងរងគ្រោះមកសួរហើយគេបានបំភ្លឺដូចអ្វីដែលមានរៀបរាប់នៅក្នុងពាក្យបណ្ដឹងនោះដែរ។
លោក ជា ហេង បានបញ្ជាក់ថា៖ «ក្រោយពីមានការបំភ្លឺដូច្នេះហើយទើបយើងបានឲ្យគាត់ចង្អុលបង្ហាញរូបថតទើបយើងស្គាល់អត្តសញ្ញាណជនសង្ស័យ»។
លោកប្រាប់ថា ឈ្មោះ Robinson Shaun Earl (ហៅ សន រី ហៅ ចន) បានឆ្លើយថាខ្លួនគេ ធ្លាប់បានហៅមនុស្សប្រុសទៅដេកលេងហ្គេមនៅផ្ទះជួលនោះ តែមិនបានធ្វើអ្វីទេ ចំណែកកុមារតូចៗមិនបានយកទៅទីនោះទេ៕