កំពង់ស្ពឺៈ ស្នងការដ្ឋាននគរបាលខេត្តកំពង់ស្ពឺ កាលពីម្សិលមិញ បានបញ្ជូនបុរសម្នាក់ដែលចាប់រំលោភក្មេងស្រីទៅសាលាដំបូងខេត្ត ក្រោយពីទទួលបានជននេះពីនគរបាលនាយកដ្ឋានព្រហ្មទណ្ឌក្រសួងមហាផ្ទៃ បន្ទាប់ពីចាប់ខ្លួនបានកាលពីថ្ងៃទី ១៣ ឧសភា នៅខណ្ឌពោធិ៍សែនជ័យ។
លោក ជាវ វិបុល អនុប្រធាននាយកដ្ឋានព្រហ្មទណ្ឌក្រសួងមហាផ្ទៃ ប្រាប់ភ្នំពេញប៉ុស្តិ៍ ពីម្សិលមិញថា ជនសង្ស័យ ឈ្មោះ សំ ម៉ៅ អាយុ ៥៤ ឆ្នាំ គឺត្រូវបានប្រគល់ឲ្យសមត្ថកិច្ចខេត្តកំពង់ស្ពឺ ហើយពីព្រោះខេត្តកំពង់ស្ពឺជាម្ចាស់ករណី។
លោក សំ សាមួន ស្នងការនគរបាលខេត្តកំពង់ស្ពឺ ឲ្យដឹងពីម្សិលមិញថា ជនសង្ស័យ សំ ម៉ៅ ត្រូវសមត្ថកិច្ចជំនាញបញ្ជូនបន្តទៅសាលាដំបូងខេត្តកំពង់ស្ពឺ នៅថ្ងៃទី ១៤ ឧសភា បន្ទាប់ពីនាយកដ្ឋានព្រហ្មទណ្ឌក្រសួងមហាផ្ទៃប្រគល់ឲ្យ។ «ជនម្នាក់នេះត្រូវចាប់តាមដីការបស់តុលាការ»។
លោក យ័ន្ត សន នាយនគរបាលប៉ុស្តិ៍ត្រពាំងគង ស្រុក សំរោងទង បានរំឭកប្រាប់ពីម្សិលមិញថា ក្មេងស្រីរងគ្រោះត្រូវម្តាយឪពុកចេញទៅធ្វើការនៅស្រុកផ្សេងហើយបានទុកក្មេងស្រីរងគ្រោះឲ្យរស់នៅជាមួយជីដូន។
លុះនៅវេលាថ្ងៃត្រង់ថ្ងៃទី ៥ ខែ មិថុនា ឆ្នាំ ២០១៩ ក្មេងរងគ្រោះកំពុងស្រាតងូតទឹក ខណៈនោះ ជនសង្ស័យបានចេញពីផ្ទះ ហើយចាប់ដៃនាងអូសចូលព្រៃចាប់រំលោភរហូតបានសម្រេច។ ក្មេងរងគ្រោះប្រាប់សមត្ថកិច្ចកាលនោះថា បន្ទាប់ពីជនសង្ស័យធ្វើសកម្មភាពរំលោភនាងហើយ ជនសង្ស័យគំរាមថា «បើនិយាយរឿងនេះប្រាប់គេ អញសម្លាប់ចោល»។ ប៉ុន្តែក្រោយថ្ងៃកើតហេតុនោះ ដោយជីដូនមានការសង្ស័យពីអាការរបស់ចៅបានហៅនាងសួរ ហើយនាងបានរៀបរាប់ពីដំណើររឿងប្រាប់ជីដូន។
លោកបន្តថា ដំបូងឡើយជីដូនក្មេងស្រីរងគ្រោះ មិនបានប្តឹងនគរបាលប៉ុស្តិ៍ឃុំ ត្រពាំងគង របស់លោកទេ ដោយសារគាត់ចរចាសម្រួលគ្នាជាមួយគ្រួសារខាងជនល្មើស ប៉ុន្តែដោយសារចរចាមិនត្រូវគ្នាក៏ជីដូនក្មេងស្រីរងគ្រោះ ដាក់ពាក្យបណ្តឹងមកប៉ុស្តិ៍នគរបាលរបស់លោក។
លោក យ័ន្ត សន ប្រាប់ថា៖ «រឿងនេះ ជីដូនក្មេងរងគ្រោះទុកដល់ ១ អាទិត្យបានប្តឹងខ្ញុំព្រោះគាត់សម្រុះសម្រួលគ្នាមិនត្រូវ»។ បើតាមលោក សន ក្រោយពីទទួលបានបណ្តឹងសមត្ថកិច្ចបានចុះដល់ផ្ទះកើតហេតុ ដើម្បីហៅជនសង្ស័យសាកសួរ ប៉ុន្តែជនសង្ស័យបានគេចខ្លួនបាត់ តាំងពីពេលនោះមក។ ទោះយ៉ាងណា លោកបានធ្វើរបាយការណ៍បញ្ជូនទៅស្នងការដ្ឋាននគរបាលខេត្តកំពង់ស្ពឺ ហើយតុលាការខេត្តកំពង់ស្ពឺ ក៏ចេញដីកាបង្គាប់ឲ្យសមត្ថកិច្ចតាមចាប់ខ្លួនជនសង្ស័យ។ សមត្ថកិច្ចចាប់ខ្លួន សំ ម៉ៅ តាមដីកាបង្គាប់របស់សាលាដំបូងខេត្តកំពង់ស្ពឺ។ «ដូច្នេះជានីតិវិធី តុលាការនឹងបញ្ជូនគាត់ទៅឃុំនៅពន្ធនាគារតែម្តងមិនចាំបាច់សាកសួរទេ»៕