.jpg)
លោក ជីវ ឡាវ អ្នកជំនាន់ក្រោយមានជំនាញសិល្បៈអំពូលណេអុង និងបន្តបង្រៀនមនុស្សជាច្រើនទៀត។ AFP
បន្ទាយមានជ័យ នគរបាលខេត្តបន្ទាយមានជ័យ បានបញ្ជូនបុរសឥណ្ឌូនេស៊ី ២ នាក់ទៅសាលាដំបូងខេត្តនៅថ្ងៃទី ២៤ ខែឧសភានេះ បន្ទាប់ពីឃាត់ខ្លួនពាក់ព័ន្ធគ្រឿងញៀន ២ កូនថង់តូច នៅកាស៊ីណូលីហួតក្នុងក្រុង ប៉ោយប៉ែត កាលពីទៀបភ្លឺថ្ងៃទី ២២ ខែឧសភា។
លោក ចាប សុផារិទ្ធ ស្នងការរងទទួលផែនបទល្មើសប្រឆាំងគ្រឿងញៀនខេត្តនេះបានឲ្យដឹងថា បុរសបរទេសទាំងនោះ ទី១-ឈ្មោះ FREDYSURYANDI អាយុ ៣១ ឆ្នាំ និងទី ២-ឈ្មោះ AUSTINFANG DORRA អាយុ ២១ ឆ្នាំ ពួកគេ ជាអ្នកទេសចរជាតិឥណ្ឌូនេស៊ី ។
លោកប្រាប់បន្តថា ជនសង្ស័យទាំង២នាក់ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តរួចហើយកាលពីព្រឹកមិញដើម្បីឲ្យតុលាការបន្តនីតិវិធី។
លោក សុផារិទ្ធ បញ្ជាក់ថា៖«ពួកគេយើងបានកសាងសំណុំរឿងបញ្ជូនបន្តទៅតុលាការហើយយើងបានសន្និដ្ឋានជាបឋមថារក្សាទុកគ្រឿងញៀន ដើម្បីប្រើប្រាស់។ ធម្មតា ពេលសមត្ថកិច្ចបញ្ជូនជនសង្ស័យទៅត្រូវឆ្លងកាត់ព្រះរាជអាជ្ញា បន្ទាប់មកបញ្ជូនសំណុំរឿងទៅចៅក្រមស៊ើបសួរដើម្បីចោទប្រកាន់ហើយបញ្ជូនជននោះទៅឃុំបណ្តោះអាសន្ននៅពន្ធនាគារ»។
លោក ធិន ស៊ីនដេត អធិការនគរបាលក្រុងប៉ោយប៉ែតបា្រប់ឲ្យដឹងដែរថា៖«ជនសង្ស័យបានសារភាពចំពោះមុខសមត្ថកិច្ចថាពួកគេពិតជាបានប្រើប្រាស់គ្រឿងញៀនមែនហើយពេលសមត្ថកិច្ចពិនិត្យទឹកនោមឃើញថាមានសារធាតុញៀន »។
តាមរបាយការណ៍នគរបាលក្រុង ប៉ោយប៉ែត បង្ហាញថា មុនឃាត់ខ្លួន គឺពួកគេមានទំនាស់គ្នានៅកាស៊ីណូលីហួត។ ពេលនោះ ក៏ត្រូវខាងសន្តិសុខកាស៊ីណូនោះរាយការណ៍ទើបសមត្ថកិច្ចកោះហៅមកសួរនៅអធិការដ្ឋាននគរបាលក្រុង ប៉ោយប៉ែត។ ខណៈសមត្ថកិច្ចកំពុងសួរពួកគេក៏ស្រាប់ តែមានជនបរទេស ២ ទៅ ៣ នាក់ យកម្សៅក្រាមពណ៌សថ្លាប្រភេទ មេតំហ្វេតាមីន ២ កូនថង់តូចហើយប្រាប់សមត្ថកិច្ចថាជារបស់ក្រុមជនសង្ស័យទាំង២នាក់នោះ។
របាយការណ៍ដដែលថា បន្ទាប់ពីមានការបង្ហាញគ្រឿងញៀន បុរសជនសង្ស័យជាតិឥណ្ឌូនេស៊ីទាំង ២ នោះ ក៏សារភាពថា ជារបស់ពួកគេមែនតែគេថាទិញមកសម្រាប់ជក់ទេ៕
