រតនគិរីៈ នគរបាលការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តរតនគិរីកាលពីម្សិលមិញបានបញ្ជូនបុរសជាជនសង្ស័យ ២ នាក់ទៅកាន់សាលាដំបូងខេត្តរតនគិរីបន្ទាប់ពីឃាត់ខ្លួនពាក់ព័ន្ធករណីសម្លាប់បុរស ២ នាក់ ប្រព្រឹត្តនៅស្រុកកូនមុំ ខេត្តរតនគិរីកាលពីថ្ងៃទី ២៣ ខែកក្កដា កន្លងទៅ។
លោក យិន ចំណាន ស្នងការនគរបាលខេត្តរតនគិរីបានប្រាប់ភ្នំពេញប៉ុស្តិ៍ថា ជនសង្ស័យឈ្មោះ សេត លី អាយុ ២៥ ឆ្នាំមានលំនៅភូមិស្រែពកធំ ឃុំសិរីមង្គល ស្រុកកូនមុំ ត្រូវបានសមត្ថកិច្ចចាប់ខ្លួនពីថ្ងៃទី ២ ខែសីហា ឆ្នាំ ២០២០ នៅចំណុចជាំភឹង ក្នុងភូមិប្រមា ឃុំកំពង់ដំរីស្រុកឆ្លូង ខេត្តក្រចេះ។ ចំណែកជនសង្ស័យម្នាក់ទៀតឈ្មោះ លី ក្រីវាន់ អាយុ ២៨ ឆ្នាំចាប់ខ្លួននៅថ្ងៃទី ៣ ខែសីហានៅស្រុកពញាក្រែក ខេត្តត្បូងឃ្មុំ ។
លោក ចំណាន បានបន្តថា ការតាមចាប់ខ្លួនក្រុមជនសង្ស័យទាំង ២ នេះគឺបន្ទាប់ពីមានករណីឃាតកម្មមួយនៅក្នុងចម្ការចេកនៃក្រុមហ៊ុនហ័ងអាញ់យ៉ាឡាយក្នុងភូមិស្រែពកធំ ឃុំសិរីមង្គល ស្រុកកូនមុំ ខេត្តរតនគិរី កាលពីថ្ងៃទី ២៣ ខែកក្កដា ។ ឃាតកម្មនេះបណ្ដាលឲ្យបុរស ២ នាក់ស្លាប់ ដោយម្នាក់ឈ្មោះ បាក់ ណាន អាយុ ២២ ឆ្នាំ និងម្នាក់ទៀតឈ្មោះ គឹម សារឿន អាយុ ២៦ ឆ្នាំដោយសាកសពពួកគេមានស្នាមចាក់នឹងកាំបិតត្រូវចំបំពង់ក និងពោះជាច្រើនកាំបិត។
លោក ចំណាន បានបញ្ជាក់ថា៖ «តាមចម្លើយសារភាពរបស់ឈ្មោះ សេត លី ដែលជាជនដៃដល់អំពើឃាតកម្មនេះកើតឡើងដោយសារជនរងគ្រោះឈ្មោះ បាក់ ណាន បានប្រព្រឹត្តអំពើសហាយស្មន់ជាមួយប្រពន្ធជនដៃដល់ធ្វើឲ្យជនដៃដល់ចងគំនុំ និងរកឱកាសសម្លាប់ដើម្បីសងសឹក»។
បើតាមលោក ចំណាន នៅល្ងាចថ្ងៃកើតហេតុ ជនរងគ្រោះទាំង ២ នាក់បានផឹកស្រាស្រវឹងហើយនាំគ្នាទៅរកឆ្លុះកង្កែបនៅក្នុងដីចម្ការចេករបស់ក្រុមហ៊ុនហង័អាញ់យ៉ាឡាយ។ ដោយឃើញឱកាសល្អ ជនដៃដល់ក៏ជិះម៉ូតូទៅស្ទាក់ផ្លូវមុន ហើយលួចចាក់ជនរងគ្រោះទាំង ២ បណ្ដាលឲ្យស្លាប់តែម្ដង។ បន្ទាប់មក ជនដៃដល់បានគេចទៅលាក់ខ្លួននៅស្រុកពញាក្រែកខេត្តត្បូងឃ្មុំ ។ លុះក្រោយមកដោយមានការបញ្ចេះពីឈ្មោះ លី ក្រីវាន់ ជាបងថ្លៃជនដៃដល់ក៏បានគេចមកនៅផ្ទះសាច់ញាតិរបស់ លី ក្រីវាន់ នៅក្នុងស្រុកឆ្លូង ខេត្តក្រចេះរហូតដល់ថ្ងៃចាប់ខ្លួន ។
លោកថា៖ «បច្ចុប្បន្នសំណុំរឿងបទល្មើសឃាតកម្ម និងជនសង្ស័យទាំង ២ នាក់នេះត្រូវបានកម្លាំងនគរបាលជំនាញរបស់យើងបញ្ជូនទៅតុលាការខេត្តរតនគិរី ដើម្បីមានចំណាត់ការបន្តតាមនីតិវិធី »។
ជុំវិញករណីនេះលោក រ៉ាបូរ៉ាន់នី ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តរតនគិរីបានបញ្ជាក់ប្រាប់ភ្នំពេញប៉ុស្តិ៍ពីម្សិលមិញថា ជនសង្ស័យទាំង ២ នាក់ក្នុងសំណុំរឿងនេះកំពុងស្ថិតក្រោមការសាកសួររបស់តំណាងអយ្យការនៅឡើយ៕