.jpg)
ជនសង្ស័យទាំង ៣ នាក់ ទៅសាលាដំបូងខេត្តពីថ្ងៃរសៀលម្សិលមិញ ក្នុងករណីកាប់គូទំនាស់ដាច់កស្លាប់ និងម្នាក់ទៀតរបួសធ្ងន់។ រូបថត ប៉ូលិស
ពោធិ៍សាត់ៈ នគរបាលខេត្តពោធិ៍សាត់បានបញ្ជូនជនសង្ស័យ ៣ នាក់ ទៅសាលាដំបូងខេត្តពីថ្ងៃរសៀលម្សិលមិញ បន្ទាប់ពីចាប់ខ្លួនពីថ្ងៃទី ៣ មីនា ពាក់ព័ន្ធករណីកាប់គូទំនាស់ដាច់កស្លាប់ និងម្នាក់ទៀតរបួសធ្ងន់ប្រព្រឹត្តពីយប់ថ្ងៃទី ១៦ កុម្ភៈ ឆ្នាំ ២០២១ នៅភូមិស្ថានីយ សង្កាត់ស្វាយអាត់ ក្រុង-ខេត្តពោធិ៍សាត់។
លោក ម៉ូ លីដា ស្នងការរងនគរបាលខេត្តនេះឱ្យដឹងពីម្សិលមិញថា ជនសង្ស័យទី១- ឈ្មោះ កោះ បញ្ញា អាយុ ១៨ ឆ្នាំ, ទី២ ឈ្មោះ សារឿន រដ្ឋា អាយុ ១៩ ឆ្នាំ។ ទាំង ២ នាក់ រស់នៅក្រុងពោធិ៍សាត់ និងទី៣- ឈ្មោះ ធុជ វុទ្ធី អាយុ ១៧ ឆ្នាំ រស់នៅឃុំត្នោតជុំ ស្រុកក្រគរ។ រីឯអ្នកស្លាប់ឈ្មោះ ជួប សុខលី រស់នៅឃុំបាក់ចិញ្ចៀន ស្រុកភ្នំក្រវាញ ។
លោកថា៖ «យើងបញ្ជូនជនទាំង ៣ នាក់នេះទៅតុលាការនៅរសៀលនេះហើយ (ថ្ងៃទី ៤ មីនា) ប៉ុន្តែយើងមិនទាន់កំណត់ថា ជនណាម្នាក់ជាជនដៃដល់ពិតប្រាកដទេ ព្រោះពួកគេឆ្លើយដាក់គ្នា។
ប៉ុន្តែនឹងមានការសាកសួរពីតុលាការបន្តទៀត»។
បើតាមលោក លីដា ចម្លើយក្រុមជនសង្ស័យថា ពួកគេមានគ្នា ១២ នាក់ រីឯក្រុមជនរងគ្រោះមានគ្នា ៥ នាក់។ ក្រុមទាំង ២ ធ្លាប់មានគំនុំគ្នា ហើយនៅយប់កើតហេតុពួកគេបានជួបគ្នានៅមុខគ្រឹះស្ថានមីក្រូហិរញ្ញវត្ថុប្រាសាក់ក្នុងភូមិស្ថានីយ សង្កាត់ស្វាយអាត់ ក្រុង-ខេត្តពោធិ៍សាត់។ ពេលនោះក្រុមជនសង្ស័យបានយកដាវសាមូរ៉ៃកាប់ឈ្មោះ ជួប សុខលី ស្ទើរដាច់ក ស្លាប់ភ្លាមៗ។
រីឯម្នាក់ទៀតឈ្មោះ ភា ធី អាយុ ១៩ ត្រូវគ្នីគ្នាជនសង្ស័យកាប់ត្រូវស្មាឆ្វេង ១ ដាវ ចំណែកភាគីជនរងគ្រោះ ៣ នាក់ទៀតបានជិះម៉ូតូគេចខ្លួន។
លោកបន្តថា ក្រោយពីសមត្ថកិច្ចស្រាវជ្រាវ សាក្សីប្រាប់ថា ឈ្មោះ សារឿន រដ្ឋា ជាអ្នកកាប់ហើយសមត្ថកិច្ចក៏ស្រាវជ្រាវចាប់បាន ៣ នាក់ពីថ្ងៃទី ៣ មីនា។
លោកថា៖ «យើងបានសួរចម្លើយជនទាំង ៣ នាក់ តែគ្មាននរណាម្នាក់សារភាពទេ គឺឆ្លើយដាក់គ្នា។ ប៉ុន្តែពួកគេទទួលស្គាល់ពីការឈ្លោះកាប់គ្នាមែន៕
