.jpg)
ប្តីប្រពន្ធ ២ នាក់ ត្រូវបានសមត្ថកិច្ចចាប់ឃាត់ខ្លួននៅឃុំទ្រៀក ស្រុកមេមត់ខេត្តត្បូងឃ្មុំ កាលពីថ្ងៃទី ១៦ មករា។ រូបថត FN
ភ្នំពេញៈ ប្តីប្រពន្ធ ២ នាក់ ត្រូវបានសមត្ថកិច្ចបញ្ជូនទៅតុលាការកាលពីម្សិលមិញ បន្ទាប់ពីចាប់ខ្លួននៅឃុំទ្រៀក ស្រុកមេមត់ខេត្តត្បូងឃ្មុំពីថ្ងៃទី ១៦ មករា ពាក់ព័ន្ធករណីជួយលាក់អាវុធជនល្មើសដែលបាញ់សម្លាប់មន្ត្រីនគរបាលម្នាក់ក្នុងទំនាស់រឿងគ្រោះថ្នាក់ចរាចរណ៍កាលពីរំលងអធ្រាត្រយប់ថ្ងៃទី ២៩ ធ្នូ ឈានចូលថ្ងៃ ៣០ ធ្នូ នៅភ្នំពេញ។
លោក សុង លី ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលរាជធានីភ្នំពេញបានប្រាប់ពីម្សិលមិញថា ជនទាំង ២ នាក់មានឈ្មោះ ហាយ ធីតា អាយុ ៣២ ឆ្នាំ រីឯប្តីឈ្មោះ កាន់ ចាន់ណា អាយុ ៣១ ឆ្នាំ ពួកគេរស់នៅភូមិ ដក់ពរ ឃុំ ទ្រៀក ស្រុកមេមត់ ខេត្តត្បូងឃ្មុំ។
អ្នកទាំង ២ ត្រូវបានបញ្ជូនទៅសាលាដំបូងរាជធានីភ្នំពេញនៅថ្ងៃទី ១៨ មករា។
លោកថ្លែងថា៖ «ជនសង្ស័យយើងចាប់នៅខេត្តត្បូងឃ្មុំ តែយើងមិនបញ្ជូនទៅខេត្តត្បូងឃ្មុំវិញទេ ព្រោះបក្ខពួកគេប្រព្រឹត្តបទល្មើសនៅភ្នំពេញ។ ជនសង្ស័យ ២ នាក់ប្តីប្រពន្ធនេះពាក់ព័ន្ធរក្សាអាវុធខុសច្បាប់»។
ពាក់ព័ន្ធការចាប់ខ្លួន ២ នាក់ប្តីប្រពន្ធនេះ លោក ហុង គឹមហឿន អធិការនគរបាលស្រុកមេមត់ឲ្យដឹងពីថ្ងៃទី ១៧ មករាថា ករណីនេះគឺដោយសារពួកគេបានលាក់អាវុធឲ្យជនល្មើស ឈ្មោះ អ៊ា ណារ៉េន អាយុ ៣៨ ឆ្នាំ ដែលបានបាញ់សម្លាប់មន្ត្រីនគរបាលក្នុងហេតុការណ៍គ្រោះថ្នាក់ចរាចរណ៍នៅភ្នំពេញ។ សមត្ថកិច្ចរបស់លោកគ្រាន់តែបានចូលរួមសហការក្នុងតួនាទីជាម្ចាស់មូលដ្ឋានប៉ុណ្ណោះ។ ករណីនេះគឺកម្លាំងនាយកដ្ឋានព្រហ្មទណ្ឌក្រសួងមហាផ្ទៃ និងសមត្ថកិច្ចនៃស្នងការដ្ឋាននគរបាលរាជធានីភ្នំពេញជាអ្នកចាប់ខ្លួនពួកគេផ្ទាល់។
លោក ព្រាប ភារ៉ាត់ នាយនគរបាលប៉ុស្តិ៍ ឃុំទ្រៀក ស្រុកមេមត់ ប្រាប់តាមចម្លើយសារភាពរបស់ឈ្មោះ ហាយ ធីតា និងប្តីឈ្មោះ កាន់ ចាន់ណា កាលពីថ្ងៃ ១៧ មករាថា ប៉ុន្មានថ្ងៃមុនការចាប់ខ្លួនគឺជនសង្ស័យឈ្មោះ អ៊ា ណារ៉េន ដែលរត់គេចពីការតាមចាប់របស់សមត្ថកិច្ចបានចូលទៅផ្ទះពួកគេប្រមាណ ៣ ម៉ោង។ ពេលនោះជនដៃដល់បានប្រគល់អាវុធខ្លីម៉ាករ៉ូឡូ ១ ដើមឲ្យឈ្មោះ កាន់ ចាន់ណា យកទៅកប់ដីលាក់ក្នុងទ្រុងទាខាងក្រោយផ្ទះ។
លោកបានបន្តថា ទាំង ២ នាក់ប្តីប្រពន្ធនោះធ្លាប់ទិញគ្រឿងញៀនពីជនដៃដល់យកទៅលក់។
រាល់ការទិញគ្រឿងញៀនម្តងៗគឺពួកគេបានណាត់ជួបគ្នាជាមួយឈ្មោះ អ៊ា ណារ៉េន ប៉ុន្តែថ្នាំញៀនទាំងនោះគឺពួកគេមិនសូវលក់ដូរក្នុងភូមិ-ឃុំទ្រៀកទេ តែច្រើនចែកចាយនៅតាមឃុំផ្សេងក្នុងស្រុកមេមត់តែមួយ។
លោកថា៖ «កន្លងមកយើងសង្ស័យ និងតាមដាន ២ នាក់ប្តី-ប្រពន្ធនេះដែរ តែដោយសារគ្មានភ័ស្តុតាង ទើបចាប់មិនកើត។ ពួកគេពាក់ព័ន្ធរក្សាទុកអាវុធខុសច្បាប់ និងជួញដូរគ្រឿងញៀន។
ជាក់ស្តែងសមត្ថកិច្ចដកហូតបានអាវុធខ្លី ១ ដើម និងជញ្ជីងថ្លឹងថ្នាំញៀន ១ គ្រឿង»។
ដោយឡែកពាក់ព័ន្ធនឹងការតាមចាប់ខ្លួនជនល្មើសឈ្មោះ អ៊ា ណារ៉េន រហូតឈានដល់បាញ់ស្លាប់នោះលោក ប៊ុន ឈឿន អធិការនគរបាលស្រុកសំបូរ ខេត្តក្រចេះបានឲ្យដឹងពីថ្ងៃទី ១៧ មករាថា ប្រតិបត្តិការនេះគឺមានសមត្ថកិច្ចចម្រុះពីក្រសួងមហាផ្ទៃស្នងការដ្ឋាននគរបាលខេត្តក្រចេះ និងសមត្ថកិច្ចខេត្ត-ស្ទឹងត្រែង។ ក៏ប៉ុន្តែបែងចែកគោលដៅផ្សេងគ្នា ព្រោះនៅអូរកណ្តៀរ ក្នុងភូមិឃុំអូរព្រះ ស្រុកសំបូរដែលជនល្មើសលាក់ខ្លួនមានព្រំប្រទល់ជាប់ខេត្ត ៣។
លោកបន្តថា មុនដំបូងសមត្ថកិច្ចប្រើវិធានការឲ្យជនល្មើសចូលខ្លួនតាមសម្រួលទេ ប៉ុន្តែជនល្មើសបានបាញ់តដៃមកសមត្ថកិច្ច។ ពេលនោះសមត្ថកិច្ចក៏បានបាញ់ការពារខ្លួនបណ្ដាលឱ្យជនល្មើសស្លាប់នៅល្ងាចថ្ងៃទី ១៥ មករា តែម្ដង។
គួររំឭកថា កាលពីរំលងអធ្រាត្រយប់ថ្ងៃ ២៩ ធ្នូ ឈានចូលថ្ងៃទី ៣០ ធ្នូ ឆ្នាំ ២០២០ ក្រុមជនសង្ស័យបានជិះរថយន្តម៉ាកឡិចស៊ីស ១ គ្រឿង បើកបុកគូទរថយន្តជនរងគ្រោះនៅតាមមហាវិថីសហព័ន្ធរុស្ស៊ីក្នុងភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញរួចព្យាយាមបើករត់។ ប៉ុន្តែភាគីជនរងគ្រោះបានបើករថយន្តតាមទាន់ក៏មានការទាស់សម្តីគ្នា ហើយជនល្មើសបានបាញ់ជនរងគ្រោះជាមន្ត្រីនគរបាលថ្នាក់វរសេនីយ៍ឈ្មោះ រ៉េត ស៊ីណាត ស្លាប់នៅកន្លែងកើតហេតុ រួចបានបើករថយន្តគេចខ្លួន។
ក៏ប៉ុន្តែក្រោយមក សមត្ថកិច្ចស្រាវជ្រាវចាប់បានបុរសឈ្មោះ កែ ចាន់មាន នៅខេត្តបាត់ដំបង ជាអ្នកបើករថយន្តដឹកជនល្មើសហើយត្រូវបានសាលាដំបូងរាជធានីភ្នំពេញចោទ ២ បទល្មើសគឺបទសមគំនិតក្នុងអំពើឃាតកម្ម និងការជួញដូរគ្រឿងញៀន។ រីឯឈ្មោះ អ៊ា ណារ៉េន បានគេចទៅលាក់ខ្លួនដល់ខេត្តរតនគិរី,ខេត្តមណ្ឌលគិរី,ខេត្តស្ទឹងត្រែង និងចុងក្រោយត្រូវសមត្ថកិច្ចបង្ក្រាបបាននៅក្នុងខេត្តក្រចេះ៕
