.jpg)
មន្ត្រីនគរបាលប៉ុស្តិ៍សង្កាត់និមិត្ត ដែលផ្ទុះអាវុធត្រូវពលរដ្ឋម្នាក់របួស។ រូបថត ហ្វេសប៊ុក
បន្ទាយមានជ័យៈ កម្លាំងនគរបាលព្រហ្មទណ្ឌនៃស្នងការដ្ឋាននគរបាលខេត្តបន្ទាយមានជ័យនៅរសៀលថ្ងៃចន្ទម្សិលមិញ បានបញ្ជូនមន្ត្រីនគរបាលប៉ុស្តិ៍សង្កាត់និមិត្តម្នាក់ទៅតុលាការពាក់ព័ន្ធករណីផ្ទុះអាវុធ បង្កឲ្យពលរដ្ឋម្នាក់រងរបួសធ្ងន់កាលពីយប់ថ្ងៃទី ២៨ ខែសីហា។
លោក សិទ្ធ ឡោះ ស្នងការរងខេត្តបន្ទាយមានជ័យថ្លែងថា លោក រិទ្ធី ពិសិដ្ឋ មានតួនាទីជានាយរងនគរបាលប៉ុស្តិ៍សង្កាត់និមិត្តត្រូវបានចាប់ខ្លួនភ្លាមៗ កាលពីយប់ថ្ងៃទី ២៨ សីហា ក្រោយពីបានបង្កការផ្ទុះអាវុធ ១ គ្រាប់បណ្ដាលឲ្យត្រូវរបួសបុរសម្នាក់ឈ្មោះ នាង មករា អាយុ ២១ ឆ្នាំ រស់នៅភូមិនិមិត្ត ១ សង្កាត់និមិត្ត ក្រុងប៉ោយប៉ែត ខណៈជនរងគ្រោះកំពុងធ្វើដំណើរនៅតាមដងផ្លូវជាតិលេខ ៥ កាលពីយប់ថ្ងៃទី ២៨ ខែសីហា។
លោកបន្តថា ក្នុងសំណុំរឿងនេះជនរងគ្រោះបានដាក់ពាក្យប្ដឹងចោទប្រកាន់ជនសង្ស័យដែលជាមន្ត្រីនគរបាលពីបទ «មនុស្សឃាតដោយចេតនា» ដោយអះអាងថា នៅយប់ថ្ងៃកើតហេតុ ខណៈកំពុងជិះម៉ូតូត្រឡប់ពីលេងហ្គេម Online តាមប្រព័ន្ធ Internet នៅផ្ទះលក់កាហ្វេមួយក្នុងភូមិនិមិត្ត ៣ មកផ្ទះវិញ ក៏ត្រូវជនសង្ស័យដែលជានគរបាលបានប្រើអាវុធខ្លីបាញ់ប្រហារមកលើរូបគេពីក្រោយខ្នង បណ្ដាលឲ្យរងរបួសតែម្ដង។ ប៉ុន្តែជនសង្ស័យបានបដិសេធ។
លោកបន្ថែមថា តាមចម្លើយរបស់ជនង្ស័យករណីផ្ទុះអាវុធនាយប់ថ្ងៃកើតហេតុនោះគឺបានកើតឡើងក្នុងអំឡុងពេលខ្លួនកំពុងប្រតិបត្តិការស្រាវជ្រាវ និងបង្ក្រាបមុខសញ្ញាជនសង្ស័យជួញដូរ និងប្រើប្រាស់គ្រឿងញៀននៅចំណុចភូមិសាស្ត្រភូមិនិមិត្ត ១ សង្កាត់និមិត្ត ក្រុងប៉ោយប៉ែត។ ស្របពេលជាមួយគ្នានោះ ម៉ូតូជនរងគ្រោះដែលជិះគ្នា ២ នាក់បានមកដល់ ហើយខ្លួនក៏បានហៅជនរងគ្រោះឲ្យឈប់ ដើម្បីធ្វើការសួរនាំ។ ក្នុងអំឡុងពេលនោះក៏មានទំនាស់ពាក្យសម្ដីជាមួយជនរងគ្រោះរហូតដល់មានការប្រទូសរ៉ាយនឹងគ្នា បន្ទាប់មកកាំភ្លើងរបស់ខ្លួនក៏បានរៀលកៃត្រូវជនរងគ្រោះតែម្ដង។
លោកថា៖ «ទោះជាបែបណាក្ដីនៅពេលនេះជនសង្ស័យត្រូវបានកម្លាំងសមត្ថកិច្ចនគរបាលជំនាញយើងកសាងសំណុំរឿងបញ្ជូនទៅកាន់តុលាការ»។
ជុំវិញករណីនេះ ឪពុកជនរងគ្រោះលោក នួន វល្លិ៍ អាយុ ៤៩ ឆ្នាំ បានប្រាប់ភ្នំពេញប៉ុស្តិ៍ថា នៅយប់ថ្ងៃកើតហេតុកូនរបស់គាត់ មិនបានបង្កប្រទូសរ៉ាយអ្វីជាមួយសមត្ថកិច្ចនោះទេ គឺកូនគាត់បានឃើញជនសង្ស័យឃាត់ម៉ូតូ ១ គ្រឿង និងមនុស្ស ២ នាក់ ដែលជាអ្នកនៅក្នុងភូមិជាមួយគ្នាហើយកូនរបស់គាត់បានសួរទៅជនសង្ស័យជាសមត្ថកិច្ចថា ពួកគេមានរឿងអី? ហើយមន្ត្រីនគរបាលរូបនោះបានឆ្លើយថា គ្មានរឿងអីទេ។
លោកបានឲ្យដឹងទៀតថា នៅពេលនោះកូនរបស់លោកក៏សួរទៀតថា បើពួកគេគ្មានរឿងអីទេ សូមអនុញ្ញាតឲ្យពួកគេត្រឡប់ទៅផ្ទះវិញទៅព្រោះយប់ហើយ។ ស្រាប់តែឈ្មោះ រិទ្ធី ពិសិដ្ឋ ដែលជានាយរងនគរបាលប៉ុស្តិ៍សង្កាត់និមិត្ត ស្រែកគំហកដាក់ថា «អ្ហែង ចេះដឹងអីខ្លាំងម្ល៉េះ! បើអ្ហែងខ្លាំងចុះពីលើម៉ូតូមក!»។
លោកអះអាងទៀតថា នៅពេលនោះកូនរបស់លោកមិនបានតបតអ្វីឡើយ ហើយក៏ជិះម៉ូតូមកផ្ទះ។ ប៉ុន្តែនៅពេលម៉ូតូជិះចេញបានប្រមាណ ២ ម៉ែត្រពីកន្លែងនោះ ឈ្មោះ រិទ្ធី ពិសិដ្ឋ ក៏បានស្ទុះមកបាញ់កូនរបស់លោកពីក្រោយតែម្ដង។
លោក វល្លិ៍ បានបញ្ជាក់ទៀតថា៖ «កូនរបស់ខ្ញុំរងរបួសខ្នង ហើយបៀមក្បាលគ្រាប់នៅក្នុងពោះតែត្រូវបានគ្រូពេទ្យជំនាញធ្វើការវះកាត់ យកក្បាលគ្រាប់នោះចេញបានរួចរាល់ហើយ។ ប៉ុន្តែអាការមុខរបួសនៅមិនទាន់ល្អប្រសើរនៅឡើយទេ និងកំពុងបន្តសម្រាកព្យាបាលនៅមន្ទីរពេទ្យខេត្តបន្ទាយមានជ័យនៅឡើយ»។
លោកបញ្ជាក់ថា៖ «ក្រោយពីករណីនេះកើតឡើងមានក្រុមគ្រួសារសាច់ញាតិជនបង្កបានទូរស័ព្ទទាក់ទងមកក្រុមគ្រួសារខ្ញុំ ដើម្បីធ្វើការសម្របសម្រួលផ្ដល់សំណងមួយចំនួនជាថ្នូរមិនដាក់បណ្ដឹងឡើងតុលាការ ប៉ុន្តែគ្រួសារខ្ញុំមិនព្រម»។
លោក ស៊ុំ ច័ន្ទគា មន្ត្រីសម្របសម្រួលសមាគមការពារសិទ្ធិមនុស្សអាដហុកបានថ្លែងកាលពីម្សិលមិញថា ទោះបីជាភាគីទាំង ២ មានការសម្របសម្រួលផ្ដល់សំណង ដើម្បីរំលត់បណ្ដឹងក្រៅប្រព័ន្ធតុលាការក៏ដោយ ក៏សំណុំរឿងនេះនៅតែមិនអាចបញ្ចប់ទាំងស្រុងបាននោះទេ ព្រោះវាជាបទល្មើសព្រហ្មទណ្ឌ។
លោកថ្លែងថា៖ «នៅពេលនេះយើងកំពុងតាមឃ្លាំមើលការអនុវត្តនីតិវិធីរបស់សមត្ថកិច្ចជំនាញលើសំណុំរឿងនេះ ព្រោះសមាគមអាដហុកយើងបានទទួលពាក្យបណ្ដឹងស្នើសុំកិច្ចអន្តរាគមន៍ផ្នែកច្បាប់ពីគ្រួសារជនរងគ្រោះក្នុងការដាក់ពាក្យប្ដឹងប្រឆាំងនឹងជនសង្ស័យទៅតុលាការ»។
លោក តេង សម័យ អ្នកនាំពាក្យអយ្យការអមសាលាដំបូងខេត្តបន្ទាយមានជ័យបានថ្លែងកាលពីម្សិលមិញថា ជនសង្ស័យដែលជាមន្ត្រីនគរបាលនៅក្នុងសំណុំរឿងនេះត្រូវបានបញ្ជូនមកដល់ដៃអយ្យការហើយ និងកំពុងត្រូវបានអនុវត្តនីតិវិធីទៅតាមផ្លូវច្បាប់៕
