.jpg)
ជនសង្ស័យ ក្រោយពេលសមត្ថកិច្ចឃាត់ខ្លួន។ រូបថត ប៉ូលិស
ពោធិ៍សាត់: នគរបាលស្រុកក្រគរកាលពីម្សិលមិញបានបញ្ជូនខ្លួនមន្ត្រីយោធាម្នាក់ទៅស្នងការដ្ឋាននគរខេត្តពោធិ៍សាត់ ដើម្បីបន្តនីតិវិធី បន្ទាប់ពីឃាត់ខ្លួនករណីបាញ់ពលរដ្ឋម្នាក់ស្លាប់កាលពីថ្ងៃទី ១៨ ខែកញ្ញា នៅក្នុងភូមិថ្មី ឃុំត្នោតជុំ ស្រុកក្រគរ ដោយសមត្ថកិច្ចអះអាងថា មានមូលហេតុមកពីទំនាស់ពាក្យសម្ដីគ្នាក្នុងវង់ផឹកស៊ី។
លោក ឃុន រី នាយរងផ្នែកសន្ដិសុខនៃអធិការដ្ឋាននគរបាលស្រុកក្រគរបានថ្លែងពីម្សិលមិញថា ជនសង្ស័យមានឈ្មោះ ប្រាក់ សុផល អាយុ ៥៧ ឆ្នាំ ជាមន្ត្រីយោធាថ្នាក់វរសេនីយ៍ត្រីមានតួនាទីជានាយរងការិយាល័យហ្វឹកហ្វឺនកងពលតូចអន្តរាគមន៍លេខ ១៤ ស្រុកក្រគរ។ លោកថា មន្ត្រីជំនាញនគរបាលស្រុកក្រគរបានបញ្ជូនខ្លួនគាត់ទៅស្នងការដ្ឋាននគរបាលខេត្តពោធិ៍សាត់នៅថ្ងៃទី ២០ ខែកញ្ញា ដើម្បីសាកសួរបន្តនីតិវិធីតាមច្បាប់។
លោកបន្តថា ការឃាត់ខ្លួននេះបន្ទាប់ជនសង្ស័យបានបាញ់បោះបណ្ដាលឲ្យត្រូវបុរសឈ្មោះ នួន ទូច អាយុ ៣៥ ឆ្នាំស្លាប់នៅភូមិ-ឃុំខាងលើ។ ករណីនេះកើតឡើង ខណៈជនសង្ស័យផឹកស្រាស្រវឹង ហើយទាស់សម្ដីជាមួយជនរងគ្រោះ ក៏ឈានដល់ការផ្ទុះអាវុធ ១ គ្រាប់ ត្រូវចំក្រោមឆ្អឹងជំនីរខាងឆ្វេងជនរងគ្រោះ ធ្លាយមកឆ្អឹងជំនីរស្តាំស្លាប់ភ្លាមៗនៅក្នុងវង់ផឹកស៊ីជាមួយគ្នា។
លោកថា៖ «ក្រោយកើតហេតុភា្លមហ្នឹង សមត្ថកិច្ចជំនាញយើងបានសហការជាមួយមន្ត្រីកងរាជអាវុធហត្ថស្រុកក្រគរចុះធ្វើអន្តរាគមន៍ ហើយយើងបានធ្វើកោសល្យវិច័យ និងឈានទៅចាប់ខ្លួនជនសង្ស័យបាននៅរសៀលថ្ងៃទី ១៨ ខែកញ្ញាជាថ្ងៃកើតហេតុ ខណៈជនសង្ស័យបានរត់ទៅលាក់ខ្លួននៅផ្ទះពលរដ្ឋជិតនោះ»។
លោក ស ថេង ស្នងការនគរបាលខេត្តពោធិ៍សាត់បានថ្លែងពីម្សិលមិញថា លោកបានឃើញសំណុំរឿងនេះ ហើយថា នគរបាលជំនាញកំពុងសាកសួរតាមនីវិធីច្បាប់ ប៉ុន្ដែលោកមិនទាន់អាចបញ្ជាក់ពីពេលវេលាដែលត្រូវបញ្ជូនទៅសាលាដំបូងខេត្តនៅឡើយ ដោយរង់ចាំការសួរចប់សិន។
លោកបញ្ជាក់ថា៖ «មន្ត្រីនគរបាលស្រុកក្រគរបានបញ្ជូនជនសង្ស័យមកដល់ស្នងការដ្ឋានគរបាលខេត្តហើយ ឥឡូវនេះមន្ត្រីជំនាញយើងកំពុងសួរតែខ្ញុំមិនទាន់ដឹងត្រូវបញ្ជូនទៅតុលាការពេលណាទេ បើសួរចប់ពេលណាគឺយើងនឹងបញ្ជូនទៅតុលាការភ្លាមតែម្ដង»។
លោក នៅ សុជាតិ មេបញ្ជាការកងរាជអាវុធហត្ថស្រុកក្រគរបានថ្លែងពីម្សិលមិញថា កម្លាំងជំនាញរបស់លោកបានចូលរួមសហការអន្តរាគមន៍លើករណីនេះ ប៉ុន្ដែសំណុំរឿងនេះបានប្រគល់ជូនទៅខាងនគរបាលជាអ្នកចាត់ចែងបន្ត។
លោកបញ្ជាក់ថា៖ «ខ្ញុំមិនបានដឹងរឿងច្បាស់ទេ តែខ្ញុំបានសួរអ្នកភូមិគឺគាត់ថា មុនកើតហេតុមិនដឹងរឿងអ្វីទេ ស្រាប់តែមន្ត្រីយោធាឈ្មោះ ផល បានដកកាំភ្លើងខ្លីមកបាញ់សំដៅជនរងគ្រោះស្លាប់ភ្លាមៗតែម្តង។
ក្រោយបាញ់រួចជនដៃដល់បានទៅសំងំក្នុងផ្ទះប្រជាជន តែត្រូវបានសមត្ថកិច្ចយើងចាប់បានយកទៅបន្តនីតិវិធីនៅអធិការដ្ឋាននគរបាលស្រុកក្រគរ»។
ជុំវិញបញ្ហានេះ ភ្នំពេញប៉ុស្តិ៍មិនអាចស្វែងរកប្រភពដើម្បីទាក់ទងសុំការបញ្ជាក់បន្ថែមពីក្រុមគ្រួសារ និងសាច់ញាតិជនរងគ្រោះបានឡើយកាលពីម្សិលមិញ៕
