កណ្ដាលៈ ជនសង្ស័យម្នាក់ដែលបើកទីតាំងម៉ាស្សាបង្កប់សេវាផ្លូវភេទ ត្រូវនគរបាលប្រឆាំងការជួញដូរមនុស្សខេត្តកណ្តាលបញ្ជូនទៅសាលាដំបូងខេត្តកាលពីម្សិលមិញបន្ទាប់ពីឃាត់ខ្លួននៅភូមិព្រែកសំរោងសង្កាត់-ក្រុងតាខ្មៅ ខេត្តកណ្តាលកាលពីថ្ងៃទី ១៩ មីនា។
លោកស្រី ឈឹម វណ្ណនី ស្នងការ រងទទួលផែនប្រឆាំងអំពើជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តកណ្តាលបានប្រាប់ភ្នំពេញប៉ុស្តិ៍ពីម្សិលមិញថា ករណីជនសង្ស័យម្នាក់ឈ្មោះ កាន់ កាឌី អាយុ ៥១ ឆ្នាំ និងជាម្ចាស់ទីតាំងម៉ាស្សានោះសមត្ថកិច្ចជំនាញរបស់លោកស្រីបានកសាងសំណុំរឿងបញ្ជូនទៅសាលាដំបូងខេត្តកណ្តាលនៅថ្ងៃ (ថ្ងៃទី ២១ មីនា) នេះ។
លោកស្រី បានឲ្យដឹងថា ការបញ្ជូនជនសង្ស័យទៅតុលាការដើម្បីប្រឈមនឹងច្បាប់នេះគឺក្រោយពីសមត្ថកិច្ចបានសាកសួររួចហើយករណីនេះជនសង្ស័យបានសារភាពថា បានពាក់ព័ន្ធនឹងសកម្មភាពនេះ។
លោកស្រីបញ្ជាក់ថា៖ «ក្នុងអំពើជួញដូរនេះគឺមានតែជនសង្ស័យម្នាក់ទេ រីឯនារីរងគ្រោះ ៦ នាក់មានអ្នកខ្លះអាយុក្រោម ១៨ ឆ្នាំនិងអ្នកខ្លះលើស ១៨ ឆ្នាំយើងបានបំពេញនីតិវិធីប្រគល់ពួកគេឲ្យខាងមន្ទីរសង្គមកិច្ចខេត្តកណ្តាលហើយ»។
លោកស្រី ឈឹម វណ្ណនី បានរំឭកប្រាប់ថា កាលពីថ្ងៃទី ១៩ ខែ មីនា ឆ្នាំ ២០១៩ នៅវេលាម៉ោងប្រមាណ ៨ កន្លះយប់ កម្លាំងសមត្ថកិច្ចរបស់ស្នងការដ្ឋាននគរបាលខេត្តកណ្តាលផែនបង្ក្រាបបទល្មើសជួញដូរបានចុះប្រតិបត្តិការបង្ក្រាបទីតាំងម៉ាស្សាកោសជប់មួយកន្លែងដែលមានយីហោថាម៉ាស្សាដៃប្រសប់ ១៦៨ ស្ថិតក្នុងភូមិកើតហេតុខាងលើ។
ក្នុងប្រតិបត្តិការនោះសមត្ថកិច្ចបានឆែកឆេរក្នុងផ្ទះម៉ាស្សានិងប្រមូលបាននារីរងគ្រោះចំនួន ៦ នាក់ជាមួយវត្ថុតាងស្រោមអនាម័យប្រើរួចនិងមិនទាន់ប្រើបានមួយចំនួន និងឃាត់ខ្លួនបុរសសង្ស័យដែលជាម្ចាស់ទីតាំងម៉ាស្សាបានម្នាក់៕