ពោធិ៍សាត់ៈ នគរបាលខេត្តពោធិ៍សាត់កាលពីម្សិលមិញបានបញ្ជូនអ្នកកាសែត ៤ នាក់ និងស្ត្រីម្នាក់ទៅសាលាដំបូងខេត្ត បន្ទាប់ពីឃាត់ខ្លួនពាក់ព័ន្ធនឹងករណីសង្ស័យថាបានគំរាមទារប្រាក់ពីពលរដ្ឋដែលរកស៊ីលក់ប្រេងឥន្ធនៈ។ នេះបើតាមលោកស្នងការរងនគរបាលខេត្តពោធិ៍សាត់។
លោកវរសេនីយ៍ឯក ម៉ូ លីដា ស្នងការរងនគរបាលទទួលបន្ទុកការងារព្រហ្មទណ្ឌខេត្តពោធិ៍សាត់បានឲ្យដឹងថា នគរបាលខេត្តបានបញ្ជូនអ្នកកាសែត ៤ នាក់ និងស្រី្តម្នាក់ទៅសាលាដំបូងខេត្តនៅថ្ងៃទី ២១ ខែសីហា បន្ទាប់ពីឃាត់ខ្លូនពួកគេពាក់ព័ន្ធករណីគំរាមទារប្រាក់ពីម្ចាស់ស្ថានីយប្រេងមួយកាលពីថ្ងៃ ១៩ ខែសីហា នៅស្រុកក្រគរ ខេត្តពោធិ៍សាត់។
លោកថា៖ «យើងបញ្ជូននៅល្ងាចនេះយើងបានឃាត់ខ្លួនពួកគេ បន្ទាប់ពីមានពលរដ្ឋប្តឹងថាបានទារលុយពីម្ចាស់ហ្គារ៉ាស់សាំង។ គាត់គំរាមទារលុយពី ២ ទៅ ៣០០ ដុល្លារជាថ្នូរនឹងសម្រួលការផាកពិន័យម្ចាស់ហ្គារ៉ាស់សាំង តែម្ចាស់ហ្គារ៉ាស់សាំងថា គ្មានលុយ តែបានប្រគល់ឲ្យ ១០ ដុលា្លរ ហើយបានប្តឹងសមត្ថកិច្ចឲ្យចាប់ខ្លួន»។
លោកបានឲ្យដឹងថា អ្នកសារព័ត៌មាន ៤ នាក់នោះមានឈ្មោះ ឯម សូវិសាល ភេទប្រុស អាយុ ៣១ ឆ្នាំនៅអង្គភាពសារព័ត៌មាន (TNC) ឈ្មោះ រុំ រដ្ឋា ភេទប្រុស អាយុ ៣១ ឆ្នាំ នៅអង្គភាពសារព័ត៌មាន (NTC) ថុង គឹមងួន ភេទប្រុស អាយុ ៤០ ឆ្នាំ នៅអង្គភាពសារព័ត៌មាន (PCN) និង ឯម សុវិសិដ្ឋ ភេទប្រុស អាយុ ៣១ ឆ្នាំ នៅអង្គភាពសារព័ត៌មាន (CPN)។ រីឯស្ត្រីម្នាក់ ឈ្មោះ សុំ គឹមសៀ អាយុ ២១ ឆ្នាំជាប្រពន្ធឈ្មោះ ឯម សុវិសិដ្ឋ ដែលរួមដំណើរជាមួយគ្នា។
ទោះជាយ៉ាងណាលោក ម៉ូលីដា បានអះអាងថាបើតាមចម្លើយ គឺអ្នកកាសែត ៤ នាក់ និងស្រី្តម្នាក់នោះបានបដិសេធ ហើយថាពួកគេមិនបានប្រព្រឹត្តដូចការចោទប្រកាន់នោះទេ។
លោក ផុស សុវណ្ណ អ្នកនាំពាក្យក្រសួងព័ត៌មានបានថ្លែងកាលពីម្សិលមិញថា លោកមិនទាន់ទទួលព័ត៌មានពាក់ព័ន្ធនឹងករណីនេះទេ ប៉ុន្តែលោកថា កន្លងមកធ្លាប់មានករណីអ្នកកាសែតមួយចំនួនតូចបានបំពានលើក្រមសីលធម៌វិជ្ជាជីវៈ ហើយត្រូវបានសមត្ថកិច្ចឃាត់ខ្លួន ខណៈក្រសួងព័ត៌មានបានខិតខំផ្សព្វផ្សាយ និងអប់រំអ្នកសារព័ត៌មានឲ្យដឹងកាន់តែច្បាស់ពីវិជ្ជាជីវៈរបស់ខ្លួន។
លោកបានបញ្ជាក់ថា៖ «កន្លងទៅយើងឃើញមាន ៣ ករណីធំៗដែលពាក់ព័ន្ធនឹងការគំរាមកំហែងដោយបានរំលោភទៅលើវិជ្ជាជីវៈរបស់ខ្លួន។
គាត់មិនត្រូវអាងខ្លួនកាន់កាតកាសែតហើយចុះទៅជំរិតទារលុយគេគឺវាខុសនឹងវិជ្ជាជីវៈ»។
កាលពីម្សិលមិញ ភ្នំពេញប៉ុស្ដិ៍មិនអាចរកប្រភពទាក់ទងអ្នកកាសែតទាំង ៤ នោះដើម្បីសុំការអត្ថាធិប្បាយបានទេ។ ប៉ុន្តែបើតាមសារព័ត៌មានក្នុងស្រុក ១ ចុះផ្សាយកាលពីថ្ងៃទី ២០ ខែសីហា ឲ្យដឹងថាឈ្មោះ ឯម សូវិសាល និងឈ្មោះ ឯម សុវិសិដ្ឋ គឺ ជាកូនភ្លោះនឹងគ្នា។ រីឯឈ្មោះ ថុង គឹមងួន កាលពី ៣-៤ ខែមុនធ្លាប់បានគំរាមទារលុយ ២០ ម៉ឺនរៀលដែលមានឈើទុកក្រោមផ្ទះ នៅភូមិបំណក់ ស្រុកក្រគរ ដោយអះអាងថាក្រុមខ្លួនជាមេព្រៃ នគរបាលក្រសួង ហើយពេលនោះត្រូវបានពលរដ្ឋខ្លះដែលអត់លុយឲ្យក៏ប្តឹងទៅសមត្ថកិច្ច។
សារព័ត៌នោះបញ្ជាក់ថា៖ «ក្រុមអ្នកកាសែតខិលខូចនេះតែងដើរបោកប្រាស់គេស្ទើរគ្រប់ខេត្ត ពេលទៅដល់កន្លែងកាយរណ្តៅដី តាំងខ្លួនជាអង្គភាពក្រសួងរ៉ែ និងក្រសួងបរិស្ថានដល់ប្រទះឃើញអ្នកដឹកឈើគឺតាំងជាមេព្រៃមកពីក្រសួងកសិកម្ម។ បើជួបបទល្មើសល្បែងស៊ីសងពួកគេទាំងនោះតាំងខ្លួនជានគរបាលហើយពួកនេះទារលុយគេច្រើនៗណាស់ បើមិនឲ្យគេដាក់កម្លាំងមកបង្ក្រាប»។
កាលពីថ្ងៃ ១៩ ខែកក្កដា ឆ្នាំ ២០១៩ កម្លាំងកងរាជអាវុធហត្ថខេត្តព្រះសីហនុ ធ្លាប់បានឃាត់ខ្លួនលោក ហ៊ុន សុខា ប្រធានក្លិបអ្នកកាសែតឯករាជ្យ និងលោក កែវ រតនា ចាងហ្វាងកាសែត TN រួមទាំង មនុស្ស ៥ នាក់ទៀតដើម្បីសួរនាំពាក់ព័ន្ធបញ្ហាដីធ្លីនៅក្រុងព្រះសីហនុ ប៉ុន្តែក្រោយមកត្រូវបានដោះលែងវិញ៕