.jpg)
ស្ត្រីសង្ស័យ (កណ្ដាល) និងគ្រឿងញៀនដែលចាប់បាន។ រូបថត សហការី
តាកែវៈ កងរាជអាវុធហត្ថខេត្តតាកែវកំពុងរៀបចំបញ្ជូនជនសង្ស័យប្រុសស្រី ២ នាក់ទៅសាលាដំបូងខេត្តតាកែវនៅថ្ងៃនេះ ពាក់ព័ន្ធករណីជួញគ្រឿងញៀនជិត ៦ គីឡូ បន្ទាប់ពីចាប់ខ្លួនពីយប់ថ្ងៃទី ២២ មីនា នៅភូមិពេជ្រចង្វារ ឃុំបឹងត្រាញ់ខាងជើង ស្រុកសំរោង ខេត្តតាកែវ និងម្នាក់ចាប់នៅភ្នំពេញ។
លោកវរសេនីយ៍ឯក ង៉ែត ចាន់ធី មេបញ្ជាការរងកងរាជអាវុធហត្ថខេត្តតាកែវ បានឲ្យភ្នំពេញប៉ុស្តិ៍ដឹងពីម្សិលមិញថា ជនសង្ស័យឈ្មោះ ចែម គឹមស្រ៊ុន ភេទប្រុសអាយុ ២៧ ឆ្នាំរស់នៅភូមិពេជ្រចង្វារ ឃុំបឹងត្រាញ់ខាងជើង ស្រុកសំរោង ខេត្តតាកែវ និងម្នាក់ទៀតឈ្មោះ ហេង ច្រឹប ភេទស្រី អាយុ ៣១ ឆ្នាំមានលំនៅភូមិព្រៃទា១ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
លោកថា៖ «ករណីនេះ មន្ត្រីជំនាញយើងបានសាកសួរជនសង្ស័យ និងរៀបចំឯកសារពាក់ព័ន្ធទៅតាមនីតិវិធីច្បាប់អស់ហើយ ហើយយើងបញ្ជូនពួកគេទៅតុលាការនៅថ្ងៃស្អែកនេះ (ថ្ងៃទី ២៦ មីនា)»។
លោកបន្តថា មុនបង្ក្រាបគឺសមត្ថកិច្ចជំនាញកងរាជអាវុធហត្ថខេត្តបានស្រាវជ្រាវដឹងថាមានករណីជួញដូរគ្រឿងញៀននៅក្នុងភូមិសាស្ត្រស្រុកសំរោង។
បន្ទាប់មកក៏សុំការសម្របសម្រួលផ្លូវច្បាប់ពីលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវដើម្បីចុះប្រតិបត្តិការ។
លោកបន្តទៀតថា ប្រតិបត្តិការនេះដឹកនាំដោយលោកអនុសេនីយ៍ទោ ហួត វឿន នាយការិយាល័យប្រឆាំងគ្រឿងញៀន និងទទួលបញ្ជាពីលោក ឡា ឡៃ មេបញ្ជាការកងរាជអាវុធហត្ថខេត្តដោយមានកិច្ចសហការពីកងរាជអាវុធហត្ថស្រុកសំរោងផង។ ក្នុងប្រតិបត្តិការនៅម៉ោងជាង ១០ យប់ថ្ងៃទី ២២ មីនានោះសមត្ថកិច្ចក៏ចាប់បានឈ្មោះ ចែម គឹមស្រ៊ុន ។ រីឯវត្ថុតាងដែលដកហូតមានម្សៅក្រាមពណ៌សថ្លា (សង្ស័យគ្រឿងញៀន) បានចំនួន ១ កញ្ចប់ទម្ងន់ ២៥,៩១ ក្រាម និងទូរស័ព្ទដៃ ១ គ្រឿង ។
បើតាមលោក ចាន់ធី បន្ទាប់ពីសួរចម្លើយឈ្មោះ ចែម គឹមស្រ៊ុន បានសារភាពថា រូបគេជាអ្នកយកគ្រឿងញៀនពីស្ត្រីម្នាក់ឈ្មោះ ហេង ច្រឹប នៅសង្កាត់ចោមចៅ ៣ ខណ្ឌ ពោធិ៍សែនជ័យ រាជធានីភ្នំពេញរួចដឹកមកចែកចាយនៅតាកែវ។
បន្ទាប់មក សមត្ថកិច្ចលោកបានសុំសហការពីកងរាជអាវុធហត្ថលើផ្ទៃប្រទេស និងកងរាជអាវុធហត្ថរាជធានីភ្នំពេញដោយមានការសម្របសម្រួលផ្លូវច្បាប់ពី លោក ច្រឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញទើបចាប់បានស្ត្រីឈ្មោះ ហេង ច្រឹប ស្នាក់នៅផ្ទះជួលក្នុងភូមិព្រៃទា ១ សង្កាត់ចោមចៅ ៣ ខណ្ឌពោធិ៍សែនជ័យ រាជធានីភ្នំពេញ។
លោក ចាន់ធី បន្តថា លុះទៅឆែកឆេរផ្ទះជួលឈ្មោះ ហេង ច្រឹប ១ កន្លែងទៀតនៅក្នុងភូមិ សង្កាត់ដដែលក៏ឃើញម្សៅក្រាមពណ៌សថ្លា (ICE) ចំនួន ៥ ដុំធំ និង ៥ កញ្ចប់តូចដែលមានទម្ងន់ ៥ ៤៩៨,៨២ ក្រាម ម៉ូតូ ១ គ្រឿង និងស្លាកលេខរថយន្តចំនួន ៦ បន្ទះដែលស្មើនឹងរថយន្ត ៣ គ្រឿង៕
