.jpg)
ជនបង្កដែលបើកបុកនគរបាលអោយដួលទៅកាន់តុលាការ។ រូបថត នគរបាល
ភ្នំពេញ: សមត្ថកិច្ចនៃស្នងការដ្ឋាននគរបាលរាជធានីភ្នំពេញបានបញ្ជូនបុរសម្នាក់ទៅសាលាដំបូងភ្នំពេញពីថ្ងៃទី ២១ ខែមិថុនា បន្ទាប់ពីឃាត់ខ្លួនករណីមិនស្តាប់ការណែនាំនគរបាលចរាចរណ៍នៅម្តុំរង្វង់មូលចោមចៅ ខណ្ឌពោធិ៍សែនជ័យ ហើយបានបើករថយន្តលឿនបង្កឲ្យមន្ត្រីចរាចរណ៍ម្នាក់ដួល។
លោក សែម រតនា នាយការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញបានថ្លែងពីម្សិលមិញថា ជនបង្កឈ្មោះ ពុធ មនោរម្យ ត្រូវបាននគរបាលបញ្ជូនទៅសាលាដំបូងរាជធានីភ្នំពេញនៅរសៀលថ្ងៃទី ២១ ខែមិថុនា ដើម្បីបន្តនីតិវិធីច្បាប់។
លោកថា៖ «យើងបានបញ្ជូនទៅសាលាដំបូងរាជធានីភ្នំពេញហើយ ប៉ុន្ដែខ្ញុំមិនទាន់បានដឹងពីនីតិវិធីរបស់តុលាការទេ...»។
លោក គុជ គឹមឡុង ព្រះរាជអាជ្ញារង និងជាអ្នកនាំពាក្យសាលាដំបូងរាជធានីភ្នំពេញបានឲ្យដឹងពីម្សិលមិញថា សំណុំរឿងនេះកំពុងត្រូវបានលោកព្រះរាជអាជ្ញារង ឡុង ជៀប សាកសួរតែមិនទាន់សម្រេចយ៉ាងណាទេ។
លោកបញ្ជាក់ថា៖ «លោកព្រះរាជអាជ្ញារង ឡុង ជៀប កំពុងសួរគាត់ មិនទាន់ចប់ទេ ព្រោះជនសង្ស័យកំពុងត្រូវការមេធាវីជួយការពាររឿងក្ដីហ្នឹងឲ្យគាត់ ប្រសិនបើលោកព្រះរាជអាជ្ញារងសួរចប់ ឬសម្រេចយ៉ាងណាទៀតចាំខ្ញុំជម្រាបជូនពេលក្រោយទៀត»។
លោក ចេវ ហាក់ ស្នងការរងនគរបាលរាជធានីភ្នំពេញទទួលបន្ទុកចរាចរណ៍ផ្លូវគោកបានបដិសេធធ្វើអត្ថាធិប្បាយពីករណីនេះកាលពីម្សិលមិញ ដោយលោកថា កំពុងរវល់ខ្លាំង។
លោក ម៉ន វុធី អធិការនគរបាលខណ្ឌពោធិ៍សែនជ័យបានថ្លែងពីម្សិលមិញថា ករណីនេះសមត្ថកិច្ចលោកមិនមែនជាអ្នករៀបចំសំណុំរឿងទេ។
លោកថា៖ «មន្ត្រីជំនាញចរាចរណ៍រាជធានីភ្នំពេញជាអ្នកចាត់ចែងរឿងនេះ ខាងខ្ញុំអត់ពាក់ព័ន្ធទេ។ តែរឿងនេះ ខ្ញុំបានដឹងថា សមត្ថកិច្ចបានបញ្ជូនទាំងសំណុំរឿង និងជនសង្ស័យទៅតុលាការ ប៉ុន្ដែខ្ញុំមិនទាន់ដឹងតុលាការសម្រេចបែបណាទេ»។
តាមរបាយការណ៍ស្នងការដ្ឋាននគរបាលរាជធានីភ្នំពេញក្រៅពីបើករថយន្តបង្កឲ្យមន្ត្រីនគរបាលចរាចរណ៍ដួល ជននេះបានប្រើស្លាកលេខមិនត្រឹមត្រូវដោយយកស្លាកលេខរថយន្តផ្សេងមកពាក់លើរថយន្តខ្លួន។
តាមរបាយការណ៍នេះ ជនបង្កត្រូវបានចោទប្រកាន់លើ ៣ ចំណុចផ្សេងគ្នារួមមាន ទី១- ការរារាំងសមត្ថកិច្ចពេលកំពុងអនុវត្តការងារ ទី២- ការប្រើប្រាស់ស្លាកលេខក្លែងក្លាយ (យកស្លាកលេខរថយន្តផ្សេងមកពាក់) និងទី៣- បើករត់គេចពីកន្លែងកើតហេតុក្នុងគោលបំណងគេចវេះពីការទទួលខុសត្រូវ៕
