ភ្នំពេញ៖ បុរសអ្នកបើករថយន្តម្នាក់ត្រូវបាននគរបាលកសាងសំណុំរឿងបញ្ជូនទៅសាលាដំបូងរាជធានីភ្នំពេញកាលពីម្សិលមិញ ពាក់ព័ន្ធករណីវាយនគរបាលយាមគោលដៅបិទខ្ទប់នៅភូមិត្រពាំងទា សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ពីថ្ងៃទី ៣០ ខែមេសា។
លោកវរសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញបានប្រាប់ ភ្នំពេញ ប៉ុស្តិ៍ នៅថ្ងៃទី ២ឧសភានេះថា ជនសង្ស័យមានឈ្មោះ ឈួន ពុទ្ធា ត្រូវបានសមត្ថកិច្ចជំនាញនៃស្នងការដ្ឋាននគរបាលរាជធានីភ្នំពេញបញ្ជូនទៅសាលាដំបូងរាជធានីភ្នំពេញនៅថ្ងៃទី ១ ឧសភា។ ក៏ប៉ុន្តែគិតត្រឹមរសៀលថ្ងៃទី ២ ឧសភានេះ លោកមិនទាន់ដឹងថា ជននោះត្រូវបានតុលាការចោទប្រកាន់ ឬមួយយ៉ាងណានៅឡើយទេ។
លោកបានថ្លែងថា៖ «រឿងនេះ ខ្ញុំមិនទាន់ទទួលបានព័ត៌មានពីខាងតុលាការទេ។ ជនសង្ស័យបានល្មើសនឹងបម្រាមបិទខ្ទប់»។
លោកបានបញ្ជាក់ប្រាប់ដែរថា មុនកើតហេតុ សមត្ថកិច្ចនៃអធិការដ្ឋាននគរបាលខណ្ឌពោធិ៍សែនជ័យ បានយាមប្រចាំការនៅគោលដៅត្រួតពិនិត្យក្នុងគោលបំណងការពារមិនឱ្យមានការធ្វើដំណើរឆ្លងកាត់ដោយមិនចាំបាច់ ដើម្បីទប់ស្កាត់ការរីករាលដាលជំងឺកូវីដ ១៩ តាមការណែនាំរបស់រាជរដ្ឋាភិបាល និងក្រសួងសុខាភិបាល។
លោកបានបន្តថា ខណៈសមត្ថកិច្ចកំពុងអនុវត្តភារកិច្ចដែលស្ថិតនៅតាមបណ្ដោយផ្លូវវិមានឈ្នះឈ្នះក្នុងភូមិត្រពាំងទា សង្កាត់សំរោងក្រោម ក៏មានរថយន្ត ១ គ្រឿងម៉ាកនីសាន់ ពណ៌ខៀវពាក់ស្លាកលេខភ្នំពេញ 3A-8709 មានសណ្ដោងទូកុងតឺន័រឆ្លងកាត់គោលដៅនោះ។ ពេលនោះសមត្ថកិច្ចបានឃាត់ឱ្យរថយន្ត តែជនសង្ស័យនៅតែបើករថយន្តឆ្លងកាត់គោលដៅបិទខ្ទប់នោះ ទើបកម្លាំងនគរបាលបានដេញតាមទាន់ ខណៈជនសង្ស័យកំពុងបម្រុងបើកចូលក្នុងក្រុមហ៊ុនផែស្ងួត អ៊ុយញ៉ុង។
លោកបន្តថា ពេលនោះសមត្ថកិច្ចបានហៅជនសង្ស័យមកប្រាប់តាមសម្រួលតែត្រូវជនសង្ស័យយកដៃវាយលើសមត្ថកិច្ចត្រូវចំចុងចិញ្ចើមខាងស្តាំបណ្ដាលឱ្យពក និងជាំ។
ពាក់ព័ន្ធនឹងការចោទប្រកាន់ ឬសម្រេចឃុំខ្លួនជនសង្ស័យយ៉ាងណានោះ លោក គុជ គឹមឡុង អ្នកនាំពាក្យសាលាដំបូងរាជធានីភ្នំពេញបានប្រាប់ ភ្នំពេញ ប៉ុស្ដិ៍ នៅរសៀលថ្ងៃទី ២ ឧសភានេះថា ករណីនេះ លោកមិនទាន់ទទួលបានព័ត៌មានពីខាងអយ្យការនៅឡើយទេ៕