The Phnom Penh Post Search

Search form




Logo of Phnom Penh Post newspaper Phnom Penh Post - បញ្ជូន​ខ្លួន ក្រុម​ចោរ​ប្លន់​កាំភ្លើង​ជ័រ​ទៅ​តុលាការ​រាជធានី​ភ្នំពេញ




បញ្ជូន​ខ្លួន ក្រុម​ចោរ​ប្លន់​កាំភ្លើង​ជ័រ​ទៅ​តុលាការ​រាជធានី​ភ្នំពេញ

បញ្ជូន​ខ្លួន ក្រុម​ចោរ​ប្លន់​កាំភ្លើង​ជ័រ​ទៅ​តុលាការ​រាជធានី​ភ្នំពេញ

កណ្តាលៈ ក្រុម​ចោរ​ប្លន់​កាំភ្លើង​ជ័រ​៣​នាក់​ដែល​ធ្វើ​សកម្មភាព​ប្លន់ នៅ​ក្នុង​ទឹក​ដី​ខណ្ឌ​ដង្កោ ហើយ​រត់​ទៅ​សម្ងំ​លាក់​ខ្លួន​នៅ​ក្រុង​តាខ្មៅ ហើយ​នគរបាល​ក្រុង​តាខ្មៅ​ចាប់​បាន​និង​បញ្ជូន​ឲ្យ​ខណ្ឌ​ដង្កោ​នោះ​ត្រូវ​បញ្ជូន​ខ្លួន​ទៅ​តុលាការ​រាជធានី នៅ​ថ្ងៃ​អង្គារ​នេះ ពី​បទ​ប្លន់។

លោក មុំ សុវត្ថិ អធិការ​នគរបាល​ខណ្ឌ​ដង្កោ​បាន​ឲ្យ​ដឹង​ពី​ម្សិលមិញ​ថា ក្រុម​ចោរ​ប្លន់​កាំភ្លើង​ជ័រ​ដែល​រត់​គេច​ខ្លួន​ទៅ​ក្រុង​តាខ្មៅ សមត្ថកិច្ច​សាកសួរ​រួច​ហើយ។

លោក​ប្រាប់ថា៖ «សំណុំ​រឿង​យើង​បាន​រៀបចំ​រួចរាល់​ហើយ យើង​បញ្ជូន​ទៅ​តុលាការ​នៅ​ថ្ងៃ​អង្គារ​នេះ» ។

លោក​អធិការ​រំឭកថា ហេតុការណ៍​ប្លន់​នេះ ដោយ​សារ​តែ​ក្រុម​ចោរ​បាន​ដឹង​ថា​ជនរងគ្រោះ​បាន​លក់​ដី​បាន​លុយ​ជាង​១ម៉ឺន​ដុល្លារ ទើប​ពួក​វា​រៀបចំ​គម្រោង​ប្លន់។ ប៉ុន្តែ​លុយ​ជាង​១ម៉ឺន​ដុល្លារ​នោះ​ជនរងគ្រោះ​បាន​យក​ទៅ​ចង​ការ​ឲ្យ​គេ​ហើយ​យក​ប្លង់​ដី​មក​ទុក។

លោក​បន្ត​ទៀត​ថា អំពើ​ប្លន់​កាលពី​ថ្ងៃទី​៩ធ្នូ នោះ​ពួក​ចោរ​ប្លន់​បាន​តែ​លុយ​៥០​ដុល្លារ​និង​លុយ​ខ្មែរ​៨ម៉ឺន​រៀល ទូរស័ព្ទ​ដៃ​១​គ្រឿង​ប៉ុណ្ណោះ តែ​ពួក​ចោរ​វាយ​ជន​រងគ្រោះ​ឲ្យ​របួស​ដៃ​និង​យក​ថង់​យាម​ទៅជា​មួយ​ដែល​ពួក​វា​មិន​ដឹង​ថា​ជា​អ្វី​ទេ។

លោក​បន្ត​ថា៖ «ពេល​ប្លន់​បាន​ហើយ​ពួក​វា​នាំ​គ្នា​គេច​ខ្លួន​ទៅ​ក្រុង​តាខ្មៅ​ឯ​ថង់​យាម​នោះ​វា​បាន​បោះចោល​នៅ​ម្តុំ​ផ្លូវ​វេងស្រេង ហើយក៏​មិន​ដឹង​ថា ថង់​យាម​នោះ មាន​ប្លង់ដី​នៅ​ក្នុង​នោះ​ទេ»។

លោក​ឲ្យ​ដឹង​ថា ក្រុម​ចោរ​ប្លន់​មាន​ឈ្មោះ កង សាមឺឌី ភេទ​ប្រុស អាយុ​២១ ឆ្នាំ​ជា​សិស្ស, កង ច័ន្ទធារ៉ា ភេទ​ប្រុស អាយុ​២០​ឆ្នាំ ជា​សិស្ស អ្នក​ទាំង​ពីរ​មាន​លំនៅ​ក្នុង​ភូមិ​ឃុំ​កើត​ហេតុ​នេះ និង​ឈ្មោះ ឈុន បញ្ញា ភេទ​ប្រុស អាយុ​២០​ឆ្នាំ​មុខរបរ​មិន​ពិតប្រាកដ មាន​លំនៅ​ក្រុម​១៧ ផ្លូវ​លេខ​២៨៦ ភូមិ៣ សង្កាត់​អូឡាំពិក ខណ្ឌ​ចំការមន។

លោក​ប្រាប់​បន្តថា មុន​កើត​ហេតុ​ក្រុម​ចោរ​បាន​តាម​ស្ត្រី​រងគ្រោះ និង​ចៅ​ប្រុស​ម្នាក់ ក្នុង​ទិសដៅ​ចូល​មក​រាជធានី​ភ្នំពេញ លុះ​ដល់​ចំណុច​កើត​ហេតុ​ស្រាប់​តែ​ក្រុម​ជន​សង្ស័យ​ពីរ​នាក់ ស្លៀកពាក់​ជា​សិស្ស សាលា បាន​ជិះ​ម៉ូតូ​ស្មាស់​បិទ​ស្កុត​ពណ៌​ខ្មៅ ទៅ​កៀរ​ម៉ូតូ​ជន​រងគ្រោះ​ភ្ជង់​គំរាម​ទារ​កាបូប​លុយ។ ពេល​នោះ​ស្ត្រី​រងគ្រោះ​មិន​ព្រម​ឲ្យ ជន​សង្ស័យ​បាន​យក​កាំភ្លើង​ជ័រ​វាយ​ក្បាល​ស្ត្រី​រងគ្រោះ​ធ្វើ​ឲ្យ​បែក​កាំភ្លើង។ ពេល​ដឹង​ថា ជា​កាំភ្លើង​ជ័រ ចៅ​ប្រុស​ស្ត្រី​រងគ្រោះ​ក៏​ស្ទុះ​ទៅ​ប្រវាយ​ប្រតប់​គ្នា​ជាមួយ​ចោរ តែ​ត្រូវ​ពួក​វា​ឆក់​យក​កាបូប​ពី​ស្ត្រី​រងគ្រោះ​បាន ហើយ​ស្ទុះ​ឡើង​ម៉ូតូ​ជិះ​គេច​ខ្លួន​បាត់​ទៅ។

លោក ស៊ឹម ប៊ុត​បណ្ឌិត អធិការ​ក្រុង​តាខ្មៅ​ប្រាប់​ថា ជន​សង្ស័យ​ត្រូវ​ចាប់​នៅ​ក្នុង​ផ្ទះ​ជួល​មួយ​នៅ​តា​ខ្មៅ​និង​បញ្ជូន​មក​ខណ្ឌ​ដង្កោ​ជា​កន្លែង​កើត​ហេតុ​វិញ៕

អត្ថបទគួរចាប់អារម្មណ៍