រតនគិរីៈ អ្នកបើករថយន្តឡិចស៊ីសទៅកៀររ៉ឺម៉កនិងដើមក្ងោកក្រឡាប់បណ្តាលឲ្យនារីខារ៉ាអូខេ២នាក់រួមដំណើរគាបស្លាប់នៅក្នុងរថយន្ត កាលពីថ្ងៃទី២៥ ខែវិច្ឆិកា ត្រូវសមត្ថកិច្ចនគរបាលស្រុកអូរយ៉ាដាវបញ្ជូនទៅកាន់សាលាដំបូងខេត្តកាលពីម្សិលមិញ។
លោក កែវ អ៊ិនសាម៉ន អធិការរងនគរបាលស្រុកអូរយ៉ាដាវបានប្រាប់ពីម្សិលមិញថា អ្នកបើកបរឡានឈ្មោះ ណុប សាម៉ុន អាយុ៤២ឆ្នាំ មានស្រុកកំណើតនៅខេត្ដកំពង់ចាមដែលបានបើកឡានទៅកៀររ៉ឺម៉កនិងដើមក្ងោកបណ្តាលឲ្យនារីខារ៉ាអូខេស្លាប់ បានបញ្ជូនទៅតុលាការខត្តហើយកាលពីម្សិលមិញបន្ទាប់ពីសមត្ថកិច្ចរកឃើញថាមានកំហុស។
លោកឲ្យដឹងថា ហេតុការណ៍នោះបានកើតឡើងកាលពីថ្ងៃទី២៥វិច្ឆិកា នៅភូមិសោមតានិញ ឃុំសោមធំ ស្រុកអូរយ៉ាដាវ ដែល ជនបង្កបានបើកឡានក្នុងល្បឿនលឿនហើយទៅកៀរនឹងរ៉ឺម៉កម៉ូតូលក់នំប៉័ង ម៉ាកហុងដាសេ១២៥ ពាក់ស្លាកលេខ កណ្ដាល 1E-6261 ជិះគ្នា២ នាក់ប្ដីប្រពន្ធ រស់នៅភូមិ១ ឃុំឡាមិញ ស្រុកបរកែវ ខេត្ដរតនគិរី បណ្ដាលឱ្យប្ដី ឈ្មោះរតនា អាយុ៣៦ឆ្នាំរបួសស្រាល។លោកឲ្យដឹងដែរថា រថយន្តនិង រ៉ឺម៉កមានទិសដៅស្របគ្នាពីលិចទៅកើត ហើយរថយន្តនោះបាន កៀររ៉ឺម៉កធ្លាក់ចិញ្ចើមផ្លូវហើយជ្រុលចង្កូតទៅកៀរដើមក្ងោកនិងត្រូវក្រឡាប់ជាច្រើនជុំហើយអ្នកបើកបរលោតចេញមុនរថយន្តក្រឡាប់ដោយស្ត្រីម្នាក់ត្រូវខ្ទាតចេញពីរថយន្តហើយម្នាក់ទៀតត្រូវគាបជាប់នឹងរថយន្ត។ នារី យឹម រតនា អាយុ២០ឆ្នាំ មានស្រុកកំណើតនៅ ខណ្ឌទួលគោករាជធានីភ្នំពេញនិងឈ្មោះ នី វីណា អាយុ២៤ឆ្នាំ ស្នាក់នៅភូមិជ័យជម្នះសង្កាត់ឡាបានសៀក ក្រុងបានលុង។ រីឯអ្នកបើកបរគ្រាន់តែរលាតដៃជើងបន្តិចបន្តួចប៉ុណ្ណោះ។
លោកឲ្យដឹងថា រថយន្ដបង្កហេតុម៉ាកឡិចស៊ីស៤៧០ ពណ៌ ស្ករ ពាក់ស្លាកលេខភ្នំពេញ2M-3357 ជាកម្មសិទ្ធិរបស់ប្រធានច្រកទ្វារអន្តរជាតិអូរយ៉ាដាវមិនមែនរបស់លោក កែប ស៊ីណា ជាអនុប្រធានច្រកទ្វារអន្ដរជាតិនេះទេ ប៉ុន្តែអ្នកបើកបរឡានឲ្យលោកអនុប្រធានជាអ្នកបើក។
លោកបានបញ្ជាក់ថា៖«រថយន្ដបានក្រពឹតខូចខ្ទេចខ្ទីសមត្ថកិច្ចអូសយកទៅរក្សាទុកនៅអធិការដ្ឋាននគរបាលស្រុកអូរយ៉ាដាវរង់ចាំដោះស្រាយ ឯសាកសពនារីខារ៉ាអូខេទាំង២នាក់នោះត្រូវបានសមត្ថកិច្ចចេញលុយដឹកយកទៅប្រគល់ឱ្យក្រុមគ្រួសារនៅថ្ងៃដដែលនោះ» ៕
