ព្រះសីហនុៈ រដ្ឋបាលខេត្តព្រះសីហនុកាលពីថ្ងៃចន្ទបានបញ្ឈប់ការសាងសង់ និងបានយកគ្រឿងចក្រវាយកម្ទេចសំណង់ធ្វើពីគ្រោងដែកនិងថ្មរបស់ជនជាតិចិនចំនួន ២ ទីតាំង នៅតំបន់ឆ្នេរអូរត្រេះ ១ ក្នុងក្រុងព្រះសីហនុ បន្ទាប់ពីរកឃើញសំណង់ទាំងនេះសង់ឡើងខុសច្បាប់រំលោភលើតំបន់ឆ្នេរ ខណៈការត្រួតពិនិត្យសំណង់ទើបធ្វើបានជាង ១០០ ទីតាំង នៅក្នុងខេត្តនេះ។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុបានប្រាប់ភ្នំពេញប៉ុស្ដិ៍ពីម្សិលមិញថា ការអនុវត្ដវិធានការនេះបានធ្វើឡើង តាមបញ្ជាពីលោក គួច ចំរើន អភិបាលខេត្ដព្រះសីហនុ ក្រោយពីរកឃើញថា សំណង់ទាំងនេះសង់ផ្ទុយពីសារាចរណែនាំរបស់រាជរដ្ឋាភិបាលនិងរំលោភលើចំណីឆ្នេរហើយសង់ទៅជាសំណង់រឹងមាំខុសពីទម្រង់ចាស់ដែលមានទម្រង់ជាក្យូសឈើសម្រាប់ទេសចរមកលេងកម្សាន្ដ។
លោកថា៖ «សំណង់នេះ ពលរដ្ឋបានជួលបន្តឲ្យជនបរទេស ជនជាតិចិន ហើយពួកគាត់សាងសង់ខុសពីសំណង់ដើម។ ដើមឡើយតំបន់នេះ មានត្រឹមជាក្យូសធ្វើពីឈើធម្មតាទេ។ប៉ុន្ដែពេលពលរដ្ឋជួលឲ្យបរទេសនេះ គាត់បានសង់ជាសំណង់រឹងមាំ ជាគ្រោងឆ្អឹងដែក និងថ្ម នេះហើយជាការសង់ខុសច្បាប់ទើបមានបទបញ្ជាដាច់ខាតត្រូវតែយកសំណង់នេះចេញ ហើយមិនឲ្យសង់ឡើងវិញទេនៅទីតាំងនេះ ព្រោះជាដីសាធារណៈរបស់រដ្ឋ»។
បើតាមលោក ភារម្យ សំណង់ខុសច្បាប់ទាំង ២ នេះ គឺមាន ១ ត្រូវបានប្រើគ្រឿងចក្រកម្ទេចដល់ដី ចំណែកសំណង់ ១ ទៀតបានកំណត់ពេលឲ្យម្ចាស់រុះរើខ្លួនឯងព្រោះម្ចាស់បានសំណូមពរ និងបានចុះកិច្ចសន្យានៅថ្ងៃអង្គារ[ម្សិលមិញ]ហើយ។
ទាក់ទងនឹងការចុះត្រួតពិនិត្យគុណភាពសំណង់ លោក ភារម្យ ឲ្យដឹងថា ក្រុមការងារធ្វើបានជាង ១០០ ទីតាំងហើយ ប៉ុន្ដែលោកមិនបានបញ្ជាក់ពីតួលេខសំណង់ខុសច្បាប់ទេ ដោយគ្រាន់តែថាបច្ចុប្បន្នកំពុងបន្ដត្រួតពិនិត្យ និងធ្វើរបាយការណ៍ជូនថ្នាក់ជាតិត្រួតពិនិត្យ។
លោក ភារម្យ បានបន្ថែមថា ចំពោះការអនុវត្ដនីតិវិធីលើសំណង់ខុសច្បាប់ឬគ្មានគុណភាព គឺជាសមត្ថកិច្ចរបស់ក្រសួងរៀបចំដែនដី នគរូបនីយកម្ម និងសំណង់។ រីឯខេត្តគ្រាន់តែសម្របសម្រួលប៉ុណ្ណោះ។
លោកបានបន្ដថា៖ «ឯកឧត្ដមអភិបាលខេត្ដគាត់បានដឹកនាំក្រុមការងារផ្ទាល់ចុះទៅពិនិត្យ ឃើញសំណង់វាមានខុសបច្ចេកទេស ដោយស្នើសុំឲ្យផ្អាកសិន ដោយទុកលទ្ធភាពឲ្យក្រុមការងារជំនាញវាយតម្លៃលើបច្ចេកទេស»។
លោកថា៖ «ការងារនេះ បើយើងមើលទៅស្ថាប័នជំនាញដែលត្រូវវាយម្លៃនោះគឺក្រសួងរៀចំដែនដីដែលបានចាត់តាំងក្រុមការងារមកត្រួតពិនិត្យបញ្ហាគុណភាពសំណង់នេះ។ ចំណែកចំណាត់ការយ៉ាងណា នោះក្រសួងរៀបចំដែនដីនឹងប្រាប់ជូនពេលបញ្ចប់ការស្រង់ស្ថិតិសំណង់រួចរាល់នៅក្នុងកិច្ចប្រជុំ»។
លោក តាំង សុចិត្តគ្រឹស្នា ប្រធានមន្ទីរទេសចរណ៍ និងជាអនុប្រធានអចិន្រៃ្តយ៍នៃគណៈកម្មការគ្រប់គ្រង និងអភិវឌ្ឍន៍ឆ្នេរសមុទ្រខេត្តព្រះសីហនុបានបញ្ជាក់ថា សំណង់រឹងមាំមិនត្រូវបានអនុញ្ញាតឲ្យសង់នៅតំបន់ឆ្នេរទេ។ ចំណែកសំណង់ចាស់យូរហើយ ត្រូវរក្សាស្ថានភាពដើមសិនរង់ចាំចំណាត់ការជាក្រោយ។
លោកថា៖«ឆ្នេរអូរត្រេះនេះក៏គ្រោងនឹងរៀបចំជាឆ្នេរគំរូទុកធ្វើពិធីបុណ្យសមុទ្រនៅឆ្នាំក្រោយផងដែរ។ ដូច្នេះរដ្ឋបាលខេត្តត្រូវត្រៀមរៀបចំសណ្តាប់ធ្នាប់ បរិស្ថាន សោភណភាពតាមឆ្នេរឲ្យបានល្អប្រសើរ មិនអាចឲ្យមានសង់សំណង់មិនរៀបរយផ្តេសផ្តាសថ្មីទៀតបានទេ»។
ទាក់ទងនឹងការជួយសង្គ្រោះករណីមានឧបទ្ទវហេតុផ្សេងៗក្នុងខេត្ដព្រះសីហនុកាលពីថ្ងៃចន្ទ គណៈកម្មាធិការជាតិគ្រប់គ្រងគ្រោះមហន្តរាយ បានគ្រោងរៀបចំកម្លាំងនិងឧបករណ៍សង្គ្រោះ ប្រចាំខេត្តផ្ទាល់តែម្តង ដើម្បីត្រៀមបម្រុងទុកជួយសង្គ្រោះក្នុងករណីមានគ្រោះមហន្តរាយកើតឡើង។
លោក គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយធ្លាប់បានថ្លែងក្នុងពិធីបំពាក់មេដាយដល់កងកម្លាំងចម្រុះជិត ៥០០ នាក់ ដែលបានចូលរួមសង្គ្រោះជនរងគ្រោះដោយការរលំបាក់អគារ ៧ ជាន់ នៅក្រុងព្រះសីហនុកាលពីថ្មីៗនេះថា ត្រូវត្រៀមទុកជាមុននូវកម្លាំងសង្គ្រោះ និងឧបករណ៍សង្គ្រោះដែលមានមូលដ្ឋាននៅក្នុងខេត្តព្រះសីហនុផ្ទាល់ ប្រសើរជាងការរង់ចាំចល័តកម្លាំងឬឧបករណ៍មកពីឆ្ងាយ ដែលធ្វើឱ្យការសង្គ្រោះយឺតយ៉ាវ។
លោកបានបញ្ជាក់ថា៖ «ក្រុងព្រះសីហនុ ជាទីក្រុងដែលកំពុងមានការអភិវឌ្ឍខ្លាំង ដូច្នេះបញ្ហាជាច្រើនត្រូវកើតមានឡើង ជាពិសេសបញ្ហាសំណង់ ដែលទាមទារឱ្យអាជ្ញាធរ និងមន្ត្រី ឬសមត្ថកិច្ចជំនាញ ត្រូវយកចិត្តទុកដាក់ខ្ពស់បំផុត ចំពោះគុណភាពសំណង់ដើម្បីបញ្ចៀសបញ្ហានៃការរលំបាក់បង្កជាសោកនាដកម្មជាថ្មីទៀត»។
លោក គួច ចំរើន អភិបាលខេត្ដព្រះសីហនុមិនអាចសុំការអត្ថាធិប្បាយពីបញ្ហានេះបានទេ កាលពីម្សិលមិញ ដោយលោកថា រវល់ប្រជុំ។ ប៉ុន្តែលោកធ្លាប់បានថ្លែងក្នុងពិធីបំពាក់មេដាយជូនក្រុមសង្គ្រោះដែរថា មានអគារគ្មានគុណភាពជាច្រើនត្រូវបានរកឃើញនៅខេត្តព្រះសីហនុ។
អ្នកស្រី ជៀប សុធារី មន្រ្តីសម្របសម្រួលសមាគមអាដហុក ប្រចាំខេត្តព្រះសីហនុ បានឲ្យដឹងថាតំបន់ឆ្នេរអូរត្រេះកន្លងមក អាជ្ញាធរខេត្ដព្រះសីហនុក៏ធ្លាប់បានឲ្យពលរដ្ឋរុះរើតូបលក់ដូរមួយចំនួនចេញដែរដើម្បីអភិវឌ្ឍ ឆ្នេរ ប៉ុន្ដែបានទុកឲ្យអ្នកមានទីតាំងចាស់យូរមកហើយអាចបន្ដលក់ដូរធម្មតាសិន តាមរយៈការជួលដីរដ្ឋដោយមិនមានចេញបណ្ណកម្មសិទ្ធិឲ្យ។
អ្នកស្រីថា៖ «យើងមិនដឹងថា អាជ្ញាធរគាត់មានចំណាត់ការបែបណាខ្លះទេ ព្រោះយើងឃើញមានអគារធំៗខ្ពស់ៗជាច្រើនក្នុងខេត្ដបានសាងសង់ឡើងប៉ះពាល់ចំណីឆ្នេរសាធារណៈ និងសំណង់មួយចំនួនទៀតកំពុងបន្តសង់តាមរយៈក្រុមហ៊ុនវិនិយោគ ប៉ុន្ដែចំពោះការលក់ដូរតូចតាចរបស់ពលរដ្ឋគឺត្រូវបានរុះរើដោយអាជ្ញាធរថា សំណង់នោះខុសច្បាប់ដែលសង់លើដីហាមឃាត់»៕